پوليتسيا قىزمەتكەرلەرى ءوز ىسىنە ارقاشان سەرگەك قاراپ, قىراعىلىق تانىتىپ جۇرسە, قىلمىسكەرلەر دە اياعىن تارتا باسىپ, قوعامدا قىلمىس تا ازايار ەدى.
وسى ورايدا پەتروپاۆلدىڭ پب كريمينالدىق ءبولىمى باستىعىنىڭ ورىنباسارى كاپيتان جاسۇلان بالدىقوۆتى كاسىبي قىراعىلىعى زور پوليتسەي دەپ اتاۋعا بولادى. بىردە ول بوكەتوۆ كوشەسىندەگى ءوز ۇيىنەن شىعا بەرگەندە ارقالارىندا سومكەلەرى بار اسىعا باسىپ بارا جاتقان ەكى جىگىتكە كوزى تۇسەدى. قىراعى پوليتسەي ولاردىڭ قولدارىن ءجيى سەرمەپ, قىسقا سويلەپ بارا جاتقاندارىنان بىردەن كۇدىك الادى. وسىنىڭ الدىندا عانا ساتباەۆ كوشەسىندەگى ۇيلەردىڭ ءبىرىن توناعانداردىڭ سىرت كەلبەتتەرىنە دە ەكەۋى ۇقسايدى ەكەن. ارينە, ەكى كوشەنىڭ اراسى اجەپتاۋىر جەر. بىراق قىراعى پوليتسەي مىنالاردىڭ سۋىت جۇرگەنىن بىردەن بولجايدى.
ول كۇدىكتىلەردىڭ سوڭىنان بەيقام اڭدىپ وتىرىپ, ءوزى جەدەل توپتى كۇدىكتىلەردىڭ بەت العان باعىتىنا دەرەۋ جەتۋگە شاقىرادى. ال جەدەل توپتىڭ جىگىتتەرى كۇدىكتىلەردىڭ قارسى الدىنان توقتاعاندا ارتقا بەزبەك بولعان ءوزى ولاردىڭ الدىنان شىعا كەلىپ, ۇستاۋعا جاردەمدەسەدى. پوليتسيانىڭ كومانداسىن ورىنداماي قارسىلىق كورسەتكەن كۇدىكتىلەر كۇشپەن باعىندىرىلعان. ءسويتىپ, كاسىبي قىراعىلىعى زور پوليتسەيدىڭ ارقاسىندا ەكى كۇدىكتى ىڭ-شىڭسىز ۇستالدى, ال ولاردىڭ سومكەسىنەن ۇرلانعان التىن, كۇمىس زاتتار مەن ءىرى كولەمدەگى اقشا شىعا كەلگەن.
كەيىن انىقتالعانداي ساتباەۆ كوشەسىندەگى ءۇيدى توناعان ناق وسىلار بولىپ شىعادى. سومكەدەن شىققان ايعاق زاتتاردى يەلەرى تاپ باسىپ تانىعان. كۇدىكتىلەر كوكشەتاۋ قالاسىنان كەلگەن, بۇرىن بىرنەشە رەتتەن سوتتالعان «گاسترولەر» قاراقشىلار بولىپ شىقتى. ولار پەتروپاۆلعا تاكسيمەن كەلىپ, باقۋات تۇراتىن ادامدار مەن ولاردىڭ ۇيلەرىن توريدى ەكەن. وسال تۇسىن تاپقان كەزدە قىمبات زاتتارىن قولدى قىلىپ, قالادان زىتىپ وتىرعان.
قازىر وسى فاكتى قىلمىستىق كودەكستىڭ 188-ءشى – «ۇرلىق» بابى بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلدى. سونىمەن بىرگە كۇدىكتىلەردىڭ پوليتسيا قىزمەتكەرىنىڭ تالابىنا بىردەن باعىنباي, قارسىلىق كورسەتكەندەرى ءۇشىن سوتقا دەيىنگى تەرگەۋ باستالدى. ۇستالعاندار قاماۋعا الىنىپ, تەرگەۋ جۇرگىزىلۋدە.
پەتروپاۆل