حالقىنىڭ سانى تىعىز جاڭاوزەن قالاسىندا جۇمىسسىزدىق – باستى ماسەلە. تىعىرىقتان شىعۋ جولى قانداي؟ قايتكەندە تۇرعىنداردى تۇراقتى جۇمىسپەن قامتاماسىز ەتۋگە بولادى؟
وسى ورايدا ماڭعىستاۋ وبلىسى اكىمىنىڭ تاپسىرماسىنا سايكەس 8 اقپاننان باستاپ ماڭعىستاۋ وبلىسى اكىمىنىڭ ءبىرىنشى ورىنباسارى ابزال مەڭدىباەۆتىڭ توراعالىعىمەن جاڭاوزەن قالاسىندا حالىقتى جۇمىسپەن قامتۋ ماسەلەلەرى جونىندەگى وبلىستىق كوميسسيا جۇمىسىن باستادى. وبلىستىق كوميسسيانىڭ باستى مىندەتى – جۇمىسپەن قامتۋ الگوريتمىنىڭ اشىقتىعى مەن ادىلدىگىن قامتاماسىز ەتۋ جانە جۇمىسسىز ازاماتتارعا جۇمىسقا ورنالاسۋعا مۇمكىندىك بەرۋدى جالعاستىرۋ.
كوميسسيا قۇرامىنا مەملەكەتتىك ورگاندار, «قازمۇنايگاز» ۇك» اق, «وزەنمۇنايگاز» اق وكىلدەرى كىردى. ارنايى قۇرىلعان وبلىستىق كوميسسيا باستاماشىل توپ وكىلدەرىمەن كەزدەسىپ, حالىقتى جۇمىسپەن قامتۋ ماسەلەلەرىن تالقىلادى. ەكى تاراپ تا وزەكتى ماسەلەلەردى جان-جاقتى قاراستىرىپ, كەلىپ تۇسكەن ۇسىنىستاردى زەرتتەدى.
ماڭعىستاۋ وبلىسىنىڭ اكىمى ءباسپاسوز قىزمەتىنىڭ حابارلاۋىنشا, وبلىستىق كوميسسيا جۇمىسسىز ازاماتتاردى 3 باعىت بويىنشا جۇمىسقا ورنالاستىرۋ تۋرالى شەشىم قابىلدادى.
قازىر قالالىق جۇمىسپەن قامتۋ ورتالىعى ارقىلى «وزەنمۇنايگاز» اق-دا 100, سەرۆيستىك قىزمەت كورسەتەتىن سەرىكتەستىكتەردە 61 جاڭا جۇمىس ورنى قۇرىلىپ, حالىقتىڭ وسال توپتارىنا جاتاتىن ازاماتتاردى جۇمىسقا ورنالاستىرۋ جوسپارلانىپ وتىر. بۇل باعىتتا ارنايى كوميسسيانىڭ شەشىمىنە سايكەس 2022 جىلدىڭ اقپان ايىنداعى جاعداي بويىنشا قولدانىستاعى الگوريتم نەگىزىندە 5 سانات بويىنشا كەزەكتە تۇرعان 100 ادامدى جۇمىسقا ورنالاستىرۋ جوسپارلانۋدا. جىل سوڭىنا دەيىن 400-دەن استام ادامدى جۇمىسپەن قامتۋ كوزدەلىپ وتىر. وسى الگوريتم بويىنشا ءتيىستى شارالار الداعى ۋاقىتتا دا جالعاسادى.
جاڭادان قۇرىلاتىن 61 جۇمىس ورنىنا ۇمىتكەرلەر جۇمىسسىز ازاماتتار قاتارىنان ىرىكتەلىپ, «وزەنمۇنايگاز» اق سەرۆيستىك قىزمەت كورسەتۋ مەكەمەلەرى – «كەزبي», «وزەنپرومگەوفيزيكا», «باتىسگەوفيزسەرۆيس», «اليانسويلسەرۆيس», «كازپرومتەحكومپاني», «سەمسەر-ءورت ءسوندىرۋشى», KUNAN-HOLDING جشس-نا جۇمىسقا قابىلدانادى.
جاڭاوزەن قالالىق جۇمىسپەن قامتۋ ورتالىعىندا 5 سانات بويىنشا جانە ورتا مەرزىمدى كەزەڭ بويىنشا كەزەكتە تۇرعان ازاماتتاردى ەڭبەكپەن قامتۋ جۇمىستارى جىل بويى جالعاسادى. سونداي-اق جاڭاوزەن قالاسىنداعى شاعىن جانە ورتا بيزنەس وكىلدەرىن جۇمىسقا تارتۋ ارقىلى «وزەنمۇنايگاز» اق-دا ۇزاق مەرزىمدى تالاپ ەتىلەتىن جوسپار بويىنشا ءتۇرلى قىزمەتتەر كورسەتەتىن جەكە كاسىپكەرلەردى تارتۋ ارقىلى جاڭا جۇمىس ورىندارىن قۇرۋ كوزدەلۋدە. وسى ماقساتتا «قازمۇنايگاز» ۇك» اق مەن شاعىن جانە ورتا بيزنەس وكىلدەرى اراسىندا ۇزاق مەرزىمدى كەلىسىمشارتتار جاساسۋ بويىنشا جۇمىس جۇرگىزۋ تۋرالى شەشىم قابىلداندى.
«اۋتستاففينگ» مەكەمەلەرىندە جۇمىسقا قابىلداۋدىڭ ورتالىقتاندىرىلعان جۇيەسى اياسىندا سوڭعى 2 جىلدا 1 700 ازامات جۇمىسقا ورنالاستى. بۇل ءوز كەزەگىندە اتالعان الگوريتمنىڭ تيىمدىلىگىن كورسەتتى, دەپ ءتۇسىندىردى ماڭعىستاۋ وبلىسى اكىمدىگىنىڭ ءباسپاسوز قىزمەتى.
ەگەر جۇمىس تابىلاتىن بولسا ەلدى شۋلاتپاي, كوميسسيا قۇرماي-اق جۇمىس ىزدەگەندەردى قابىلداي بەرۋگە بۇعان دەيىن قانداي كەدەرگى بولعان؟
ماڭعىستاۋ وبلىسى