ناۋرىزدىڭ 23-ءى كۇنى امەريكانىڭ ۆاشينگتون شتاتىندا ورىن العان توپىراق كوشكىننەن 18 ادام جوق بولىپ, حابارسىز كەتتى. بۇل تۋرالى يتار-تاسس حابارلادى.
KTLE تەلەارناسىنىڭ مالىمەتىنشە, وسى توپالاڭ تۇسىندا تاعى 3 ادام قازا تاۋىپ, 8 ادام جاراقاتتارىمەن اۋرۋحاناعا تۇسكەن.
ۆاشينگتون بيلىگى 3 ادامنىڭ قازا تاۋىپ, 8 ادامنىڭ اۋرۋحاناعا جەتكىزىلگەنىن راستادى. سەلدەتىپ جاۋعان جاۋىننىڭ سالدارىنان ورىن العان توپىراق كوشكىنى ناتيجەسىندە داررينگتون قالاسىنا باراتىن تاس جول جابىلىپ قالعان. سازدى بالشىق پەن قۇلاعان اعاشتاردىڭ الىپ جاتقان اۋماعى 1,6 شاقىرىمعا دەيىن بارادى. كەي جەرلەردىڭ تەرەڭدىگى 10 مەترگە دەيىن جەتەدى.
تاس جولدىڭ بويىنداعى 28 تۇرعىن ءۇي قيراۋعا ۇشىراعان. شتات بيلىگى ەندى قاۋپى ءتونىپ جاتقان سۋ تاسقىنىنا بايلانىستى تۇرعىنداردى شۇعىل باسقا جاقتارعا كوشىرە باستادى. كوشكىننەن امان قالعان ادامداردى جوعارىدان تىكۇشاقپەن ىزدەستىرۋ جالعاسىپ جاتىر.
مۇرات ايتقوجا.
دەرەككوز:يتار-تاسس.
فوتو: يتار-تاسس: