ناۋرىز – بىرلىكتىڭ, تاتۋلىقتىڭ, ەڭبەكتىڭ, ىزگىلىكتىڭ, باقىتتىڭ مەرەكەسى. كوكتەمنىڭ لەبى ەسكەن وسى ايتۋلى مەيرامعا وراي بيىل قازاقستاندىقتار 5 كۇن بويى دەمالادى. وسىعان بايلانىستى تۇرعىنداردىڭ ەلىمىز بويىنشا ساپارعا شىعۋى جيىلەيدى.
«جولاۋشىلار تاسىمالى» اكتسيونەرلىك قوعامى ناۋرىز مەرەكەسىنىڭ وسىنداي ەرەكشەلىكتەرىن ەسكەرە كەلىپ, ەلگە قىزمەت كورسەتۋ ساپاسىن جاقسارتۋ ماقساتىندا كەشەندى شارالاردى جۇزەگە اسىرۋدا. اتاپ ايتقاندا, مەرەكە قارساڭىنداعى جانە ناقتى مەرەكە كۇندەرى جولاۋشىلار تاراپىنان بولاتىن جوعارى سۇرانىستى قاناعاتتاندىرۋ ماقساتىندا «جولاۋشىلار تاسىمالى» اق 2014 جىلدىڭ 19-25 ناۋرىز كۇندەرى جولاۋشىلار پويىزدارىنىڭ كەستەسىن قوسىمشا ۆاگوندارمەن تولىقتىرۋدى قامتاماسىز ەتتى. ءسويتىپ, قازاقستاننىڭ سۇرانىسى اسا جوعارى دەگەن ايماقتارىنا قاتىنايتىن پويىزدارعا قوسىمشا بارلىعى 116 ۆاگون تىركەلمەك. ۆاگونداردى تىركەۋ كەستەسىنە بايلانىستى جولاۋشىلاردىڭ بارلىق سۇرانىستارى ەسكەرىلەتىن بولادى.
«ەگەمەن-اقپارات».