ەلورداداعى پرەزيدەنتتىك كلينيكادا تىك ىشەك قاتەرلى ىسىگى دياگنوزى قويىلعان پاتسيەنتكە العاش رەت ەندوسكوپيالىق تاسىلمەن وپەراتسيا جاسالىپ, قاۋىپتىڭ بەتى قايتتى.
وسىدان ءتورت اي بۇرىن پرەزيدەنتتىك كلينيكاعا تەكسەرىلۋگە كەلگەن جانات كۇزدەنوۆانى ەش جەرى اۋىرىپ مازالاماعان ەكەن. جاي عانا تەكسەرىلمەك بولعان پاتسيەنتتەن قاسەرلى ىسىك تابىلادى. بيوپسيا جاساۋ ءۇشىن ۇلگى الىنىپ, ونىڭ ناتيجەسىندە قاتەرلى ىسىكتىڭ ءوسىپ جاتقانى بەلگىلى بولعان.
سونىمەن, دارىگەردىڭ كەڭەسىمەن پاتسيەنتكە ەندوسكوپيالىق ادىسپەن وپەراتسيا جاسالدى. پرەزيدەنتتىك كلينيكا ماماندارى ەندوسكوپيستى اشىق ارالاسۋسىز, دەنەگە تابيعي ساڭىلاۋ جاساۋ ارقىلى ونى الىپ تاستادى. قازىرگى ۋاقىتتا پاتسيەنت ءوزىن جاقسى سەزىنەتىنىن ايتتى.
«تەكسەرۋ ناتيجەسىندە ىسىك تابىلدى. دارىگەر-ەندوسكوپيست جەڭىسبەك تىنكوزيەۆ كونسۋلتاتسيا بەرىپ, ەندوسكوپيالىق وپەراتسيا جاساۋدى ۇسىندى. ياعني ءىش قۋىسىنا اشىق وپەراتسيا جاسالمايدى ەكەن. ارينە, قاۋىپ تە بار ەدى. بىراق وپەراتسيا سول كەزدەگى جالعىز, دۇرىس شەشىم بولدى. ونىڭ ۇستىنە دارىگەردىڭ كاسىبيلىگىنە سەندىم. وپەراتسيادان كەيىنگى كەزەڭ جاقسى ءوتتى, قازىر دەنساۋلىعىم جاقسى, دارىگەردىڭ ۇسىنىستارىن ورىنداپ وتىردىم. مىنە, ءتورت اي ءوتتى, ءوزىمدى جاقسى سەزىنەمىن», دەيدى جانات.
وپەراتسيا ەندوسكوپيالىق تاسىلمەن جاسالعاندىقتان, پاتسيەنت وپەراتسيادان سوڭ ەكى ساعاتتان كەيىن ۇيىنە شىعارىلدى. ءۇش ايدان كەيىن قايتا تەكسەرۋ جۇرگىزىلدى. تەكسەرۋ ناتيجەلەرى تاڭعالارلىقتاي.
«وكىنىشكە قاراي, مۇنداي وپەراتسياعا بارلىق پاتسيەنت جاراي بەرمەيدى. وپەراتسيادان كەيىن ىسىكتىڭ ورنىن مۇقيات تەكسەردىك. ءۇش اي عانا ءوتتى عوي, ال وپەراتسيا ءبىر جىل بۇرىن جاسالعان سياقتى. مۇنداي ناتيجەگە قالاي قۋانبايسىڭ», دەيدى دارىگەر ج.تىنكوزيەۆ.
ونىڭ ايتۋىنشا, ەرتە ساتىدا جاڭا دامىپ كەلە جاتقان كىشكەنتاي ىسىكتەردى ەندوسكوپيالىق ادىسپەن الىپ تاستاۋعا بولادى. سوندىقتان دا دارىگەر ادامدارعا ءوز دەنساۋلىعىن ۇنەمى تەكسەرىپ, باقىلاپ وتىرۋدى ۇسىنادى.