گالىشەۆا جۇلدەسىز قالدى

فريستايلشى يۋليا گالى­شەۆانىڭ جارىس جولىنا شىعۋىن بارشا قازاقستاندىق جانكۇيەردىڭ تاعاتسىزدانا كۇتكەنى جاسىرىن ەمەس. سەبەبى ول ءبىزدىڭ وسى دوداداعى باستى ءۇمىتىمىز ەدى. 29 جاستاعى شىعىس قازاقستان وبلىسى تۋماسىنىڭ بۇعان دەيىن دە باعىندىرعان بەلەستەرى ءبىر توبە. ونىڭ الەم چەمپيونى, الەم چەمپيوناتىنىڭ بىرنەشە دۇركىن جۇلدەگەرى, ازيا ويىندارىنىڭ ءۇش دۇركىن جەڭىمپازى, دۇنيەجۇزىلىك ۋنيۆەرسيادانىڭ ەكى دۇركىن جەڭىمپازى جانە باسقا دا تولىپ جاتقان اتاقتارى بار. 2018 جىلى وڭتۇستىك كورەيانىڭ پحەن­چحان قالاسىندا الاۋى تۇتان­عان وليمپيا ويىندارىندا قازاق­ستان قۇراما كومانداسىنىڭ قور­جىنىنا جالعىز مەدالدى سالعان دا ءدال وسى سپورتشى.

بەيجىڭدەگى جارىستىڭ باس­تاپقى ساتىلارىندا ءتاۋىر ونەر كورسەتكەن گالىشەۆا «توپ-12» فريستايلشىنىڭ قاتارىنان كورىنىپ, ءوز كورەرمەندەرىن ءبىر جەلپىندىرىپ تاستاعان ەدى. بىراق ودان ارىگە يۋليانىڭ شاماسى جەتپەدى. ەكىنشى فينالدا نەبارى 49.74 ۇپاي جيعان ول ۇزدىك التىلىقتىڭ ساناتىنا قوسىلا المادى. ناتيجەسىندە, جۇلدەلى ورىندار ءۇشىن تالاسۋ مۇمكىندىگىنەن ايى­رىلىپ, بەيجىڭ وليمپياداسىن 11-ورىنمەن قورىتىندىلادى. 

فريستايل-موگۋلدان وتكەن جارىستا 23 جاستاعى اۋستراليانىڭ ارۋى دجاكارا ەنتوني التىن­نان القا تاقتى. ءدال وسى سپورتشىنىڭ پحەنچحانداعى ويىنداردا جەڭىس تۇعىرىنا سىنىق سۇيەم جەتپەي ءسۇرىنىپ, ءتورتىنشى ورىنعا تۇ­راقتاعانى ەسىمىزدە. بۇل جو­لى دجاكارانىڭ جۇلدىزى جار­قىرادى. امەريكالىق دجەلين كاۋف كۇمىس السا, رەسەيلىك اناس­تاسيا سميرنوۆا قولا مەدال­دى موينىنا ءىلدى.  

شاڭعىشىلاردىڭ سكياتلون ءتۇرى بويىنشا رەسەيلىك الەكساندر بولشۋنوۆ الدىنا جان سالمادى. بريانسكىنىڭ تۋماسى وسىدان ءتورت جىل بۇرىن پحەنچحاندا قان­شا تالپىنعانىمەن, باس جۇل­دەگە قول جەتكىزە الماعان ەدى. سارى قۇرلىقتا وتكەن وليمپيا­دانى ول 3 كۇمىس جانە 1 قولامەن قورىتىندىلادى. بۇل جولى 25 جاس­تاعى بولشۋنوۆتىڭ باعى جانىپ, التىن تۇعىردان قول بۇلعا­دى. الەكساندردىڭ كوماندالىق ارىپتەسى, ءۇش دۇركىن وليمپيا ويىن­دارىنىڭ جۇلدەگەرى دەنيس سپيتسوۆ كۇمىسپەن كۇپتەلسە, سوچي مەن پحەنچحان وليمپيا­دالا­رى­نىڭ جەڭىمپازى, الەم چەمپيو­نى, فينليانديالىق يۆو نيسكا­نەن قولا مەدالدى قاناعات تۇتتى. قازاقستاندىق ۆيتالي پۋحكالو 32-ورىندا قالىپ قويسا, ەۆگەني ۆەليچكو جارىس جولىنان شىعىپ قالدى.

كونكيشىلەردىڭ سايىسىندا نيدەرلاندتىڭ جىگىتتەرى جاسىنداي جارقىلدادى. الەمنىڭ ەكى دۇركىن چەمپيونى نيلس ۆان دەر پۋل باس جۇلدەنى ولجالاسا, پاتريك رۋست ەكىنشى ورىنعا تابان تىرەدى. ءۇشىنشى ساتىعا نورۆەگيالىق حالل­گەير ەنگەبروتەن جايعاس­تى. سنوۋبوردتا جاڭا زەلان­ديا­نىڭ وكىلى حاللگەير ەنگە­بروتەن جەڭىسكە جەتسە, امەري­كا­لىق دجۋ­ليا مارينو مەن اۋس­ترا­ليا­لىق تەسس كوۋدي جۇلدەگەرلەر قاتار­ى­نان كورىندى.

شاڭعىمەن ترامپليننەن سەكىرۋدە جاپونيانىڭ جۇلدىزى رەيۋ كوباياسيدىڭ الدىنا ەشكىم تۇسە المادى. اۋستريالىق ما­نۋەل فەتتنەر ەكىنشى جانە پول­شالىق داۆيد كۋباتسكي ءۇشىن­شى ورىنداردى ەنشىلەدى. قازاق­ستاندىق سەرگەي تكاچەنكو مەن دا­نيل ۆاسيلەۆ سىن ساعاتتا بىل­گەن­دەرىنەن جاڭىلىپ, كوش سوڭىندا قالىپ قويدى. شانا سپورتىندا گەرمانيالىق يوحاننەس ليۋدۆيگكە تەڭ كەلەر ەشكىم تابىلماسا, ودان كەيىنگى ورىندارعا اۋستريالىق ۆولفگانگ كيندل مەن يتاليالىق دومينيك فيشناللەر تۇراقتادى.

كەشە مانەرلەپ سىرعاناۋدان كوماندالىق جارىس ءوز مارەسىنە جەتىپ, رەسەي قۇراماسى باس جۇل­دەنى جەڭىپ الدى. بۇل كوماندا ساپىندا مارك كوندراتيۋك (ەرلەردىڭ جەكەلەگەن سايىسى), اناستاسيا ميشينا مەن الەكساندر گاللياموۆ (جۇپتىق سايىس), ۆيكتوريا سينيتسينا مەن نيكيتا كاتسالاپوۆ (مۇزداعى بي), كاميلا ۆاليەۆا (ايەلدەردىڭ جەكەلەگەن سايىسى) سىندى ساڭلاقتار ونەر كورسەتتى. كۇمىس مەدال اقش-قا بۇيىرسا, جاپونيا قولا جۇلدەنى يەمدەندى. 

بەيجىڭ وليمپياداسىندا ازىرگە 18 ەلدىڭ ورەندەرىنە جۇلدە الۋ باقىتى بۇيىردى. كوش باسىندا – رەسەي سپورتشىلارى. ولار ءتۇرلى-ءتۇستى مەدالداردىڭ ارقايسىنان ەكى-ەكىدەن يەلەنىپ وتىر. ەكىنشى جانە ءۇشىنشى ورىنداردى نورۆەگيا مەن شۆەتسيا ءوزارا بولىسۋدە. سكانديناۆيا تۇبەگىندە ورنالاسقان قوس مەملەكەت وكىلدەرى ەكى التىننان ولجالادى. وعان قوسا نورۆەگيالىقتاردىڭ تاعى ءبىر قولاسى بار. ءتورتىنشى جانە بەسىنشى ساتىلارعا گەرمانيا مەن نيدەرلاند جايعاستى. بۇل ەلدەردىڭ سپورتشىلارى 1 التىن مەن 1 كۇمىستەن ەنشىلەۋدە. التىنشى ورىندا – جاپونيا. كۇنشىعىس ەلىنىڭ ورەندەرى 1 التىن مەن 2 قولانى ولجالادى. جەتىنشى جانە سەگىزىنشى ورىندار  اۋستراليا مەن سلوۆەنياعا تيەسىلى. ولاردىڭ قورجىنىندا 1 التىن مەن 1 قولا مەدال بار. ۇزدىك وندىقتى باس جۇلدەنى ءبىر-بىردەن يەلەنگەن قىتاي مەن جاڭا زەلانديانىڭ وكىلدەرى تۇيىندەپ تۇر.