قر قم مەملەكەتتىك كىرىستەر كوميتەتىنىڭ مالىمەتىنشە, وتكەن جىلى مەملەكەتتىك بيۋدجەتكە سالىقتان 10,7 ترلن تەڭگە تۇسكەن. اتالعان كورسەتكىش 2020 جىلمەن سالىستىرعاندا 25,3 پايىزعا ارتقان, دەپ جازادى Egemen.kz.
«2021 جىلى مەملەكەتتىك بيۋدجەتكە سالىق تۇسىمدەرى بويىنشا جوسپار 103,6 پايىز (جوسپار بويىنشا 10 346,9 ملرد تەڭگە, 377,4 ملرد تەڭگەگە اسىرا ورىنداۋمەن 10 724,3 ملرد تەڭگە ءتۇستى) ورىندالدى», دەپ حابارلادى كوميتەت.
ۆەدومستۆو مالىمەتىنشە, 2020 جىلمەن سالىستىرعاندا رەسپۋبليكالىق بيۋدجەتكە تۇسىمدەر ءوسىمىنىڭ ەڭ كوپ سوماسى مۇنايعا سالىناتىن كورپوراتيۆتى تابىس سالىعى بويىنشا 533,7 ملرد تەڭگەگە, ەكسپورتتىق كەدەن باجدارى بويىنشا 441,0 ملرد تەڭگەگە نەمەسە 1,8 ەسە, ەاەو ەلدەرىنەن يمپورتقا قوسىلعان قۇن سالىعى بويىنشا 235,8 ملرد تەڭگەگە, ءۇشىنشى ەلدەردەن يمپورتقا ققس بويىنشا 149,3 ملرد تەڭگەگە نەمەسە 23,1% جانە پايدالى قازبالاردى ءوندىرۋ سالىعى بويىنشا 116,8 ملرد تەڭگەگە وسكەنى انىقتالدى.
ال 2021 جىلى ونلاين باقىلاۋ-كاسسا ماشينالارىنان ءبىر سالىق تولەۋشىدەن ورتاشا ءتۇسىم 16,6 پايىزعا ارتقان.