بيىل 4-5 ناۋرىز ارالىعىندا وتەتىن دەۆيس كۋبوگىنىڭ ىرىكتەۋ سىنىندا قازاقستاننىڭ تەننيسشىلەرى نورۆەگيا قۇراماسىمەن كۇش سىناسادى.
وسلونىڭ «تەننيس ارەناسىندا» وتەتىن باسەكەدە جەرلەستەرىمىزدىڭ قانداي قۇرامدا ونەر كورسەتەتىنى انىقتالدى. جەكەلەگەن سايىستا الەكساندر بۋبليك, ميحايل كۋكۋشكين جانە دميتري پوپكو كورتقا شىعادى. قازىرگى كەزدە بۋبليك الەمدىك رەيتينگتە 35-ورىندى يەلەنۋدە. سوڭعى ۋاقىتتا ول ورەلى ونەرىمەن كوزگە ءتۇسىپ, ەلەۋلى تابىستارعا قول جەتكىزۋدە. كۋكۋشكين 166-ورىندى ەنشىلەسە, پوپكو 180-ساتىعا جايعاستى. جۇپتىق باسەكەدە اندرەي گولۋبەۆ پەن الەكساندر نەدوۆەسوۆكە سەنىم ارتىلۋدا. كوپشىلىك بۇل كەزدەسۋدىڭ قازاقستاندىقتاردىڭ پايداسىنا شەشىلەتىنىنە ەش كۇمانى جوق. سەبەبى سكانديناۆيا تۇبەگى تەننيسشىلەرى اراسىندا تەك كاسپەر رۋدتى عانا بولە-جارا اتاپ وتۋگە بولادى. اتر تۋرنيرلەرىن التى رەت ۇتىپ, بىلتىر اۋستراليانىڭ اشىق بىرىنشىلىگىنىڭ شيرەك فينالىنا دەيىن جەتكەن سايىپقىران بۇل كۇندەرى الەمنىڭ سەگىزىنشى راكەتكاسى اتانىپ وتىر. ال وزگەلەرى, تىپتەن «توپ-300» ويىنشىنىڭ قاتارىندا جوق. وسى ماتچتا جەڭىسكە جەتكەن كوماندا دەۆيس كۋبوگىنىڭ فينالدىق سايىسىنا جولداما الادى.