بيىلعى «بالالار جىلىندا» بالالارعا جان-جاقتى جاعداي جاساۋ – باستى نازاردا. بۇل رەتتە بالالاردى وڭالتۋ ءىس-شارالارىن ودان سايىن كۇشەيتە تۇسۋگە ەرەكشە ءمان بەرىلەدى.
وسى جىلدى «بالالار جىلى» دەپ بەلگىلەگەن مەملەكەت باسشىسى قاسىم-جومارت توقاەۆ وسىدان ءۇش جىل بۇرىنعى جولداۋىندا قامكوڭىل بالالارعا ايرىقشا كوڭىل ءبولۋ قاجەت ەكەنىن العا تارتىپ, وڭالتۋ ورتالىقتارىنىڭ سانىن ارتتىرۋدى تاپسىرعان ەدى. «تەك رەسمي ستاتيستيكا بويىنشا 80 مىڭنان اسا بالا مۇگەدەكتىگىنە بايلانىستى ەسەپتە تۇر. ۇكىمەت بتسپ دياگنوزى بار بالالارعا مەديتسينالىق جانە الەۋمەتتىك قولداۋ كورسەتۋدى جاقسارتۋ ءۇشىن شارالار قابىلداۋى كەرەك. بالالارعا قولجەتىمدى بولۋى ءۇشىن شاعىن جانە ورتاشا وڭالتۋ ورتالىقتارىنىڭ جەلىسىن كەڭەيتۋ قاجەت. ءبىز ەرەكشە قاجەتتىلىكتەرى بار ادامدار ءۇشىن بىردەي مۇمكىندىك جاساۋعا مىندەتتىمىز. مەن بۇل تۋرالى ءوزىمنىڭ سايلاۋ الدىنداعى باعدارلامامدا ايتتىم. ۇكىمەتكە ەندى وسى ماقساتقا ءۇش جىل ىشىندە كەم دەگەندە 58 ملرد تەڭگە ءبولۋدى تاپسىرامىن», دەلىنگەن پرەزيدەنت جولداۋىندا.
كەيىنگى جىلدارى قازاقستاندا مەديتسينالىق وڭالتۋ, سونىڭ ىشىندە بالالاردى وڭالتۋ بەلسەندى تۇردە دامىپ كەلەدى. بۇگىندە ەلىمىزدە 36 وڭالتۋ ورتالىعى جۇمىس ىستەيدى. بۇل قاتاردا «بالبۇلاق» رەسپۋبليكالىق بالالاردى وڭالتۋ ورتالىعى بار. اتالعان ورتالىق 1995 جىلى جۇيكە جۇيەسى زاقىمدانعان, پسيحونەۆرولوگيالىق اۋرۋلارى بار, نەگىزىنەن بتسپ دياگنوزى قويىلعان بالالار ءۇشىن اشىلدى. ەلىمىزدىڭ بارلىق وڭىرىنەن بالالار قابىلدايتىن ورتالىق 75 توسەكتىك ورىنعا ارنالعان.
«بالبۇلاق» وڭالتۋ ورتالىعىندا بالالارعا دياگنوستيكا, زەرتتەۋ جانە ەمدەۋدىڭ زاماناۋي ادىستەرىن قولدانا وتىرىپ, مامانداندىرىلعان كەشەندى ەمدەۋ-ساۋىقتىرۋ, مەديتسينالىق-دياگنوستيكالىق, پسيحولوگيالىق-پەداگوگيكالىق جانە الەۋمەتتىك-بەيىمدەۋ كومەگى كورسەتىلەدى. جىل سايىن ورتالىقتا پسيحونەۆرولوگيالىق اۋرۋلارى بار 900-گە جۋىق بالا ەمدەلەدى. ونىڭ 60%-دان استامى – بتسپ دياگنوزى بار بالالار.
جىل سايىن ەلىمىزدە ستاتسيونار جاعدايىندا مەديتسينالىق وڭالتۋ العان بالالاردىڭ سانى ارتىپ كەلەدى. ماسەلەن, 2019 جىلى 15 063 بالا مەديتسينالىق وڭالتۋ السا, 2021 جىلدىڭ العاشقى جارتىجىلدىعىنىڭ وزىندە بۇل كورسەتكىش ەكى ەسەگە ارتىپ, وڭالتۋدان وتكەن بالالاردىڭ سانى 31 671-ءدى قۇرادى. بۇل وڭ وزگەرىس بيىل ودان سايىن جاقسارا تۇسەدى دەگەن ءۇمىت باسىم.
سونىمەن قاتار بىلتىردان باستاپ العاش رەت امبۋلاتوريالىق وڭالتۋ ەنگىزىلدى. 28 مىڭنان اسا بالا ەمحانالار دەڭگەيىندە 1,3 ملرد تەڭگە سوماسىنا وڭالتۋ قىزمەتتەرىن الدى. مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋمەن مەديتسينالىق وڭالتۋدى قارجىلاندىرۋ 2019 جىلمەن سالىستىرعاندا 10 ەسەگە ۇلعايدى (2019 جىلى – 6,7 ملرد تەڭگە). 2021 جىلى وڭالتۋعا بولىنگەن قارجى كولەمى 61,9 ملرد تەڭگەنى قۇرادى. ونىڭ ىشىندە بالالار ءۇشىن قارجىلاندىرۋ سوماسى 27%-عا ارتىپ, 11,4 ملرد تەڭگەنى قۇرادى.
بالالاردى مەديتسينالىق وڭالتۋ قىزمەتتەرىمەن قامتۋدى ۇلعايتۋ جانە ولاردىڭ قولجەتىمدىلىگىن ارتتىرۋ جونىندەگى جۇمىس جالعاسا بەرەدى.