بيىل اقش-تىڭ كاسپي ءوڭىرى ەلدەرىمەن ديپلوماتيالىق قارىم-قاتىناستارىنىڭ ورناعانىنا 30 جىل تولۋىنا وراي ۆاشينگتونداعى Caspian Policy Center اناليتيكالىق ورتالىعىنىڭ الاڭىندا قر پرەزيدەنتى اكىمشىلىگى باسشىسىنىڭ ورىنباسارى - قر پرەزيدەنتىنىڭ حالىقارالىق ىنتىماقتاستىق جونىندەگى ارنايى وكىلى ەرجان قازىحاننىڭ قاتىسۋىمەن ۆەبينار ءوتتى, دەپ حابارلايدى Egemen.kz اقورداعا سىلتەمە جاساپ.
ءىس-شاراعا اقش-تىڭ وڭتۇستىك جانە ورتالىق ازيا ىستەرى جونىندەگى مەملەكەتتىك حاتشىسىنىڭ كومەكشىلەرى دونالد لۋ جانە ەۋروپا مەن ەۋرازيا ىستەرى بويىنشا كارەن دونفرايد, سونداي-اق ازەربايجان, ارمەنيا, گرۋزيا, قىرعىزستان, تاجىكستان, تۇركىمەنستان جانە وزبەكستاننىڭ جوعارى وكىلدەرى قاتىستى. كەزدەسۋدىڭ مودەراتورى اقش-تىڭ قازاقستانداعى بۇرىنعى ەلشىسى ريچارد حوۋگلاند بولدى.
قر پرەزيدەنتىنىڭ ارنايى وكىلى ەرجان قازىحان كاسپي ءوڭىرى ەلدەرىنىڭ اقش-پەن ىنتىماقتاستىعىن دامىتۋ ءۇشىن ەلەۋلى الەۋەتى بارىن اتاپ ءوتتى.
ء«بىز اقش-پەن بىرقاتار نەگىزگى باعىتتار بويىنشا, سونىڭ ىشىندە تەرروريزمگە جانە قاۋىپسىزدىكتىڭ باسقا دا سىن-تەگەۋرىندەرىنە قارسى كۇرەس, ترانزيتتىك-كولىك جۇيەسىن ءارتاراپتاندىرۋ, كليماتتىڭ وزگەرۋىنە قارسى ءىس-قيمىل جاساۋ, ايەلدەردىڭ ەكونوميكالىق قۇقىقتارى مەن مۇمكىندىكتەرىن كەڭەيتۋ بويىنشا ءىس جۇزىندە ءوزارا ءىس-قيمىل جاساۋ ءۇشىن ءتيىمدى مۇمكىندىكتەردى كورىپ وتىرمىز», دەدى ەرجان قازىحان.
قازاقستانداعى قاڭتار وقيعالارى جونىندە ەرجان قازىحان مەملەكەت باسشىسىنىڭ ەلدىڭ ساياسي, ەكونوميكالىق جانە ينستيتۋتسيونالدىق جاڭعىرۋىن جالعاستىرۋعا دەگەن بەرىك ۇستانىمىن ەرەكشە اتاپ ءوتتى.
«جاقىن ارادا جاڭا كابينەت 2022 جىلعا ارنالعان ءىس-قيمىل جوسپارىن ۇسىنادى. وسىلايشا, جاڭا ەكونوميكالىق ساياسات جاڭا قازاقستاننىڭ نەگىزىنە اينالادى», دەپ تۇيىندەدى ول.
قازاقستاندا بولعان وقيعالار د. لۋ ۇسىنعان بايانداماسىنىڭ دا باستى نازارىندا بولدى. ول قر باسشىلىعىنىڭ ودان ءارى ساياسي جانە ەكونوميكالىق قايتا قۇرۋلار باعىتىن جالعاستىرۋدى قامتاماسىز ەتەتىنىنە سەنىم ءبىلدىردى.
«باتىستىڭ مىندەتى - قازاقستاندى ۇيرەتۋ ەمەس, قولداۋ جانە ەلگە قاڭتار ايىندا تۋىنداعان ادام قۇقىقتارى ماسەلەسىن تۇسىنۋگە مۇمكىندىك بەرۋ جانە بولاشاقتا مۇنداي جاعدايدىڭ الدىن الۋ ءۇشىن قاجەتتى الەۋمەتتىك, ساياسي جانە ەكونوميكالىق رەفورمالاردى ودان ءارى دامىتۋ», دەدى د. لۋ.
جالپى, ۆەبينارعا قاتىسۋشىلار ساياسي, ەكونوميكالىق جانە مادەني-گۋمانيتارلىق ديالوگتى ودان ءارى دامىتۋ ماقساتىندا ايماق ەلدەرىنىڭ اقش-پەن ىنتىماقتاستىعىنىڭ ماڭىزدىلىعىن اتاپ ءوتتى.