«ومىردە الىس, ولەڭدە جاقىن جانبىز» دەپ تەبىرەنە جىرلاعان اقىن قالقامان ءساريننىڭ ولەڭىنەن تۋعان كارتينا سەكىلدى كورىنەدى كوزگە. ءبىز العاش تاماشالاعاندا قالامگەردىڭ سول جىرىن ىشتەي قايتالادىق. كەنەپ بەتىندەگى ارۋدىڭ جۇزىنەن توگىلگەن مەيىرىم وزىنە قاراي تارتادى دا تۇرادى. ءبىر ساعىنىشتىڭ شىر كوبەلەك اينالىپ جۇرگەنى انىق.
بەلگىلى سۋرەتشى مارات تۇرعامبايدىڭ «كەشكىلىك» كارتيناسى ايەل وبرازىنا قۇرىلعان. كەيىپكەردىڭ سۇلۋلىعىن تابيعاتپەن ۇندەستىرىپ, ونى اقىل تارازىسىنا سالعان شەبەردىڭ تۋىندىسى ۇلكەن ىڭكارلىكتەن باستاۋ العانى كورىنىپ تۇر. بۇل – اۆتوردىڭ مۋزاسى بولۋى دا مۇمكىن. سەبەبى مودەل بىرنەشە كارتيناسىندا كەزدەسەدى.
بوياۋدىڭ قىر-سىرىن تەرەڭ مەڭگەرگەن سۋرەتشى بەينەلەۋ ونەرىن ۇلتتىق داستۇرمەن ساباقتاستىرىپ, پورترەت سومداۋدا جىگەرلى كۇش جۇمسادى جانە ونى گيپەررەاليزممەن بايلانىستىردى. اتالعان كارتينادان سونى بايقاۋعا بولادى.
سۋرەتتەگى ارۋ اق ءتۇستى ۆودولازكا, قىزىل داقتارمەن ساندەلگەن ۇزىن بەلدەمشە كيىپ, قوڭىرقاي ءتۇستى ءشالىسىن ۇستىنە جامىلا سۋرەتتەلگەن. باسىن تىك كوتەرە ۇستاپ وپكەن جەلدىڭ ىرعاعىن سەزىنۋدە. وڭ قولىن نازىك ءارى جۇمساق بەتىنە ءالسىن تيگىزسە, سول قولىنا كىتاپ ۇستاعان. كەيىپكەردىڭ بەت-الپەتىنە جاعىلعان بوياۋعا قاراپ, ونىڭ زامانعا ساي ادەپتەلگەنىن اڭعارۋعا بولادى.
جانارىن تومەن قاداپ, جۇپار اۋانى مەيىرلەنە جۇتىپ, ىشكى ەموتسياسىن سىرتقا شىعارۋدا. بۇل ونىڭ باقىتتى ءساتىنىڭ ءبىر بەكەتى سەكىلدى قۋانىشتان باسى اينالارداي شالقىپ وتىر. ءوز سەزىمىنە ءوزى ماستانىپ, ءبىر عاجايىپتىڭ بولاتىنىن الدىن الا سەزگەندەي. كوزقاراسىنان ازداپ كۇرسىنىس تە بايقالادى.
«كەشكىلىك» كارتيناسى تەك كومپوزيتسيانىڭ نەگىزى بولىپ تۇرعان كەيىپكەرگە عانا نازار اۋدارتادى. ال ارتقى پلان تەك اشىق تۇستەرمەن عانا شەشىم تاپقان. كەنەپتەگى وقىرمان قىزدىڭ ءبىر ساتتىك كوڭىل كۇيى قىلقالام ۇشىندا تەربەلىپ تۇرعانداي قايران قالدىرادى. سۋرەتشى بالكىم اقىن بولسا:
«مۇڭايماشى,
تۇسپەسىن ەڭسەلى ارمان.
ىقىلاسىن ءبىر ساعان اۋدارار ەم,
ىڭعايىما وسى ءبىر كونسە جالعان»,
دەپ جازار ما ەدى!؟ سۇلۋعا سۇقتانۋ سۇندەت ەمەس پە؟