قارقىندى قۇرىلىس حالىققا قولايلى ما؟

جالپى, وبلىستىڭ 2021-2025 جىلدارعا ارنالعان الەۋمەتتىك-ەكونوميكالىق دامۋى كەشەندى جوسپارىنىڭ اياسىندا بىلتىر 346 مىڭ شارشى مەتر تۇرعىن ءۇي پايدالانۋعا بەرىلدى. سونىڭ 217 شارشى مەترى – تەك پەتروپاۆل قالاسىندا. بۇل قالا سوڭعى بەس جىلدا اجەپتاۋىر وزگەردى. بۇ­رىن قالانىڭ كىرەبەرىسى – كيروۆ كوشەسىنىڭ بويىندا ءبىر قاباتتى ۇيلەر سەكتورى بولاتىن. شاھارعا جوعارى لاۋازىمدى قوناق كەلە قالسا, قالا باسشىلارى سول ۇي­لەردىڭ سىرتىن سىرلاتىپ, بىر­كەلكى شارباق سالدىرىپ, شالا شابىلىپ قالاتىن. بىراق جارتىسى جەرگە كىرىپ كەتكەن ۇيلەردى قانشا ارلەسەڭ دە جاسىرا المايسىڭ.

قازىر قالاداعى ەڭ ۇلكەن وسى كوشە – تۇتاسىمەن جىر الىبى جامبىلدىڭ اتىندا. مۇنداعى بارلىق جۇتاڭ ءۇي سىرىلىپ, ونىڭ ورنىنا زاماناۋي ارحيتەكتۋراعا ساي ۇيلەر بوي تۇزەگەن. «جاس وركەن» شاعىن اۋدانىندا 900 ورىندىق قازاق مەكتەبى اشىلعان, قازاق تەاترىنىڭ قۇرىلىسى قولعا الىنعان. وكىنىشكە قاراي, تەاتر­دىڭ قۇرىلىسى ەكى جىلداي تۇرالاپ, بيىل قايتا باستالدى.

بىلتىر وبلىستىڭ بارلىق اۋماعىندا قۇرىلىس جۇرگىزۋ ءۇشىن 106 ملرد تەڭگە يگەرىلدى. بۇل – 2020 جىلمەن سالىستىرعاندا 4,7 پايىزعا كوبىرەك. قۇرىلىستىڭ نەگىزگى باعىتى – الەۋمەتتىك نىساندار. سونىڭ ىشىندە پەتروپاۆل قالاسىنداعى ءۋاليحانوۆ كوشە­سىندە 900 ورىندىق مەكتەپ, شال اقىن اۋدانىندا 160 ورىندىق دەنە تاربيەسى جانە ساۋىقتىرۋ كەشەنى سالىندى. وسىدان ءسال كىشىرەك كەشەن جامبىل اۋدانىنداعى قايرانكول اۋىلىندا دا تۇرعىزىلدى. ال ماعجان جۇماباەۆ اۋدانىنىڭ ورتالىعىندا حوككەي كورتى بوي كوتەردى.

«مەملەكەتتىك «نۇرلى جەر» باعدارلاماسىنىڭ شەڭبەرىندە «وتباسى بانكىنەن» 1,4 ملرد تەڭگەنىڭ 285 زايمى بەرىلدى. زايم­نىڭ جىلدىق ءوسىمى – 5 پايىز عانا. وسى باعدارلامانىڭ «شاڭىراق» قاناتقاقتى جوباسى بويىنشا كەزەكتە تۇرعان 208 اكىمدىك قىز­مەتكەرى ءۇي جايىن جاقسارتتى. «باقىتتى وتباسى» باعىتى بو­يىن­شا 437 ملن تەڭگەنىڭ 47 زايمى بەرىلگەن. «وتباسى بانكىنىڭ» قاراجاتىنا بارلىعى 8 عيماراتتان تۇراتىن 861 پاتەرلىك تۇرعىن ءۇي سالىندى», دەيدى بانك فيليالىنىڭ ديرەكتورى الماس جاپاباەۆ.

الەۋمەتتىك قۇرىلىس جۇمىس­تارىمەن قاتار وسى سالادا الدا­عى جىلى ىسكە اسىرىلاتىن جوبا­لاردىڭ سمەتالىق قۇجاتتارى دايىندالدى. سونىڭ ىشىندە پەترو­پاۆل قالاسىندا سپورتتىڭ 32 تۇرىمەن 3 124 ادامعا اينالىسۋعا مۇمكىندىك بەرەتىن جاڭا سپورت سارايىنىڭ جوباسى اياقتالدى. ال ءۋاليحانوۆ اۋدانىنىڭ ورتالى­عى كىشكەنەكول اۋىلىندا 2,5 ملرد تەڭگەنىڭ 250 ورىندىق ەمحانا­سىنىڭ جوباسى دايىندالدى.

قۇرىلىس باسقارماسىنىڭ باستىعى ق.گالەەۆتىڭ ايتۋىنشا, سولتۇستىك قازاقستان وبلىسىنىڭ قۇرىلىس سالاسى وسى جىلى 120 ملرد تەڭگەنىڭ جۇمىسىن يگەرۋدى جوسپارلاپ وتىر. سونىڭ ىشىندە پايدالانۋعا بەرىلگەن تۇرعىن ۇيلەردىڭ اۋقىمى 401 مىڭ شارشى مەترگە جەتتى.

حالىق اراسىندا «كاپاي» اتانىپ كەتكەن شاعىن اۋداننىڭ ەسكى ۇيلەرى دە بىلتىر ءسۇرىلىپ, جەرى بوساتىلعان. قىزىلجاردا كوشە سالۋدى ويلاماي, ويىلعان شىمنان قالانعان جاپپالارىن ءبىر-بىرىنە جالعاستىرىپ جىپىرلاتىپ سالا باستاعان ءXىح عاسىردان بەرى بۇل شاعىن اۋداننىڭ قالپى وزگەرمەگەن. كەڭەس وداعى جىلدارىندا دا بۇل اۋداندى تۇزەتۋگە ەشكىمنىڭ ءتىسى باتپادى. جاقسى ۇيلەر سالىنسا دا, كوشەلەرىن قالىپ­قا كەلتىرۋ وڭاي بولمادى. «كاپايدا» كوشە جوق, تەك ۇيلەر نومىرلەنگەن بولاتىن, بىراق ءنومىردىڭ ءوزى قىزىق. مىسالى, 100-ءشى ءنومىرلى ۇيدەن كەيىن كەلەسى تۇرعانى 1000-شى بولىپ كەتە بەرەتىن. ەندى سول جەرگە 647 پاتەرلى 9 تۇرعىن ءۇي سالىنباق.

ال قالا بويىنشا بارلىعى 983 پاتەرلى 13 كوپ قاباتتى ءۇي تۇرعىزۋ جوسپارلانعان. سونىمەن قاتار بيۋدجەتتىك قاراجاتتان تىس, جەكەمەنشىك كاپيتالدىڭ كۇشىمەن 1 732 پاتەرلى 24 كوممەرتسيالىق ۇيلەر سالىنباق. الايدا حالقى قۇجىناپ جاتاتىن ميلليونەر قالالار سياقتى 18 قاباتتى 10 ءۇيدىڭ سالىناتىنى كوپ ادامدى قۋانتا قويمادى. «زەرتتەۋ سك» اتتى جەكەمەنشىك قۇرىلىس كوم­پانياسى ءتىپتى 30 جانە 35 قاباتتى 267 پاتەردەن تۇراتىن ەكى تۇرعىن ءۇي قۇرىلىسىن بيىل باستاماق. حالقىنىڭ سانى 250 مىڭعا جەتپەيتىن شاعىن قالاعا تۇرعىنداردى, اۆتوكولىكتەردى تار جەرگە قۇمىرسقانىڭ يلەۋىندەي قۇجىناتاتىن تىم بيىك ۇيلەردىڭ قانداي قاجەتتىلىگى بار؟ حالىق ەركىن تىنىستاۋ ءۇشىن قالانىڭ بيىككە ەمەس جازىققا وسكەندىگى پايدالى عوي.

بىلتىر جەلتوقسان ايىندا پەتروپاۆل قالاسىنىڭ باس جو­سپارىنىڭ تولىقتىرىلعان نۇسقاسى ساراپتان ءوتىپ, يندۋستريا جانە ينفراقۇرىلىمدىق دامۋ مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋا­شىلىعى كوميتەتىندە بەكىتىلدى. ەندى بۇل بيىلعى قاڭتار ايىندا ادىلەت, ۇلتتىق ەكونومي­كا, قارجى, يندۋستريا جانە ينفرا­قۇرىلىمدىق دامۋ مينيس­ترلىگىنىڭ كەلىسىمىن الادى. وسى مينيسترلىكتەردىڭ ءبىرى بولسىن وسى ساۋالدى العا تارتار دەگەن ۇمىت­تەمىز.

سولتۇستىك قازاقستان وبلىسى