وسكەمەندەگى كاسىپورىنعا قىزعىلت ءتۇتىن ءۇشىن ايىپپۇل سالىندى

شقو ەكولوگيا دەپارتامەنتى مالىمەتىنشە, ايىپپۇل سوماسى 4 631 690 تەڭگەنى قۇراعان.

«21 جەلتوقساندا № 2 تسەحتا فۋرۋم-قوندىرعىنى تازالاۋ بويىنشا جوسپارلى تەحنولوگيالىق جۇمىستار جۇرگىزىلدى. بۇل پروتسەدۋرا جوبالىق شەشىم رەتىندە قاراستىرىلماعان. كاسىپورىن قر اقبتك-ءنىڭ 332-بابى بويىنشا اكىمشىلىك جاۋاپكەرشىلىككە تارتىلدى («مەملەكەتتىك ەكولوگيالىق ساراپتاما قورىتىندىسىندا قامتىلعان تالاپتاردى ورىنداماۋ»), ايىپپۇل سوماسى 510 مىڭ تەڭگە بولادى.

ۆيدەودان قىزعىلت ءتۇستى گاز-اۋا قوسپاسىنىڭ ارتىق مولشەرى بايقالدى. سوندىقتان تازارتۋ قاعيدالارىن بۇزعانى ءۇشىن قر اقبتك-ءنىڭ 331-بابى بويىنشا («اتموسفەرالىق اۋاعا لاستاعىش زاتتاردىڭ شىعارىندىلارىن تازالاۋعا جانە باقىلاۋعا ارنالعان قۇرىلىستاردى نەمەسە جابدىقتاردى پايدالانباۋ جانە سارقىندى سۋلاردى اعىزۋ») ايىپپۇل سالىندى, ونىڭ سوماسى - 1 ميلليون 750 مىڭ تەڭگە.

ءتۇتىن قۇبىرىن ولشەۋ ناتيجەلەرى بويىنشا كومىرتەگى وكسيدى 8,9 ەسە, حلورسۋتەگى 2,1 ەسە اسىپ كەتكەنى انىقتالدى. وسى جايتتار ءۇشىن «تمك» اق-عا قر اقبتك 328-بابى بويىنشا («قورشاعان ورتاعا رۇقسات ەتىلگەن انتروپوگەندىك اسەر نورماتيۆتەرىن بۇزۋ») ايىپپۇل سالىندى, ايىپپۇل سوماسى - 2 ميلليون 371 مىڭ تەڭگە», دەدى شقو باس مەملەكەتتىك ەكولوگيالىق ينسپەكتور, وبلىستىق ەكولوگيا دەپارتامەنتى باسشىسىنىڭ ورىنباسارى راۋان تۇراروۆ.

ەسكە سالايىق, 2021 جىلى 21 جەلتوقساندا «تمك» اق ورنالاسقان اۋدان تۇرعىندارىن كاسىپورىننىڭ قۇبىرلارىنان شىققان قىزعىلت ءتۇتىن شوشىتقان ەدى. ادامدار زاۋىتتا اپات بولدى دەپ بولجاعان بولاتىن.