قۇرلىقتىق حوككەي ليگاسىنىڭ گاگارين كۋبوگى ءۇشىن 12 ناۋرىز كۇنى ەكاتەرينبۋرگتە جەرگىلىكتى «اۆتوموبيليستپەن» 1/8 فينالدىڭ ءتورتىنشى كەزدەسۋىن وتكىزگەن استانانىڭ «بارىسى» 2:1 ەسەبىمەن جەڭىسكە جەتىپ, 1/4 فينالعا شىقتى.
وسى جەڭىستەن كەيىن سەريانىڭ جالپى ەسەبى 4:0-گە جەتتى. بۇل جولى ول قارسىلاسىنان قاتارىنان ءتورت رەت باسىم ءتۇسىپ, ءوزى ءبىر رەت تە ەسە جىبەرگەن جوق.
«بارىس» كومانداسىنىڭ باس جاتتىقتىرۋشىسى اري-پەككا سەلين «اۆتوموبيليستپەن» وتكەن ويىنعا تۇسىندىرمە بەرە وتىرىپ: «ماتچ سەريانىڭ الدىڭعى كەزدەسۋلەرىنە ۇقساس جاعدايدا ءوربىدى. ايدىندا تارتىس تەكەتىرەس ءجۇردى. سوڭىنا دەيىن جۇمىلا ءبىلىپ, ءبىر دەممەن ويناپ, جەڭىستى قامتاماسىز ەتكەن ويىنشىلارىما العىس بىلدىرەمىن», – دەدى.
ەسكە سالا كەتەيىك, بۇعان دەيىن ءبىردە-ءبىر پلەي-وففتى جىبەرمەگەنىنە قاراماستان, قازاقستاندىق كلۋب ءوزىنىڭ تاريحىندا ءبىرىنشى رەت گاگارين كۋبوگىنىڭ ەكىنشى راۋندىنا شىعىپ وتىر. «بارىس» بۇعان دەيىن ءۇش رەت ءبىرىنشى راۋندتا «اق بارىسقا», ءبىر رەتتەن «ماگنيتكا» مەن «تراكتورعا» جول بەرىپ قويعان ەدى.
جەرلەستەرىمىزدىڭ كەلەسى قارسىلاسى كەيىنىرەك بەلگىلى بولادى.
دامير قوجامقۇل.