جاڭا جىلداعى جاڭا بەلەس

ۇزاق ۋاقىت بويى حالىقارالىق ارەنادا قازاقستاننىڭ تۋى استىندا ونەر كورسەتكەن جانە كورسەتىپ جۇرگەن تەننيسشىلەردىڭ دەنى رەسەي تۋمالارى ەكەنى بارشاعا ءمالىم. سولاردىڭ اراسىنان ياروسلاۆا شۆەدوۆانى بولە-جارا اتاۋعا بولادى. 34 جاستاعى ماسكەۋدىڭ تۋما­سى كەزىندە رولان گارروس (2010, 2012) پەن ۋيمبلدوننىڭ (2016) شيرەك فينالىنا دەيىن جەتتى. وسى تابىسىنىڭ ارقاسىندا 2012 جىلى WTA رەي­تينگىندە 25-ورىنعا كوتەرىلدى. ەلەنا رىبا­كينا قارقىنىن كۇ­شەيت­كەنگە دەيىن قازاقستاندىق تەن­نيسشىلەر اراسىنداعى ەڭ ۇزدىك ناتيجە وسى ەدى. ودان بولەك, جۇپتىق سايىستا شۆەدوۆا ۋيمبلدون (2016) مەن اقش-تىڭ اشىق بىرىنشىلىگىنىڭ (2010) باس جۇلدەسىن ولجالاپ, رولان گارروستىڭ (2015) فينالىندا وينادى. بۇل رەكوردتاردىڭ كۇنى بۇگىنگە دەيىن مۇرتى بۇزىلماي تۇر.

2017 جىلى نارەستەلى بولعان ياروسلاۆا ءبىراز ۋاقىت سۇيىكتى ىسى­نەن قول ءۇزىپ قالدى. ءبىراز ۋاقىت بالاسىن باقتى, سونىمەن قوسا ەسكى جاراقاتتارىن ەمدەدى. ارادا ءۇش جىل وتكەن سوڭ كورتقا قايتا ورالدى. بىراق ول بۇرىنعى بابىنا قايتا كەلە المادى. ورتاڭقول جارىستاردىڭ وزىندە جەڭىسكە جەتۋ وعان وڭايعا سوقپادى. سودان شۆە­دوۆا بىلتىرعى جىلدىڭ سوڭىندا كارەراسىن اياقتايتىنى جايىندا رەسمي تۇردە مالىمدەدى.

سپورتتىق مانسابىن اياقتا­عان­دار اراسىندا سەسيل كاراتان­چەۆا مەن گالينا ۆوسكوبوەۆا ءوز زا­مانىندا ءتاۋىر وينادى. ولار­دىڭ ءبىرى بولگاريادان كەلسە, ەكىنشىسى رەسەيدەن قونىس اۋداردى. جالىنداپ تۇرعان شاعىنداعى كاراتانچەۆانىڭ ەڭ ۇزدىك كورسەت­كىشى – 35-ورىن (2005), ۆوسكو­بوە­ۆا­نىڭ جەتكەن مەجەسى – 42-ساتى (2012).

بۇل كۇندەرى ونەر كورسەتىپ جۇر­گەن قىزداردىڭ اراسىنان يۋليا پۋتينتسەۆا مەن زارينا دياس ارا-تۇرا ەلەۋلى تابىستارعا قول جەت­كىزىپ ءجۇر. قازىرگى كەزدە ۇزدىكتەر تىزىمىندە 42-ورىنعا تابان تىرەگەن پۋتينتسەۆا 2017 جىلى 27-ساتىعا دەيىن كوتەرىلدى. ونىڭ «ۇلكەن دۋلىعا» ساناتىنداعى تۋرنير­لەردەگى ناتيجەلەرى دە جا­مان ەمەس. ماسكەۋدىڭ تۋماسى رولان گارروستىڭ ەكى رەت (2016, 2018) جانە اقش-تىڭ اشىق بىرىنشىلىگىنىڭ ءبىر مارتە (2020) شيرەك فينالىندا كۇش سىناستى. وزىق 100 ويىنشىنىڭ ءتىزى­مىن ماڭايلاپ جۇرگەن دياس ءبىر كەزدەرى 31-ورىندى ەنشىلەگەن ەدى. ول ۋيمبلدون جارىسىنىڭ ءتورت رەت (2014, 2015, 2020, 2021) ءتورتىنشى كەزەڭىنە دەيىن جەتكەنىن جانكۇيەرلەر ۇمىتا قويعان جوق.

ەرلەر اراسىندا بىرەر جىل اندرەي گولۋبەۆ پەن ميحايل كۋكۋش­كين ءوز كورەرمەندەرىن قۋان­­تىپ كەلدى. العاشقىسى 2010 جىلى اتر تىزىمىندە 33-سا­تىعا تابان تىرەسە, ەكىن­شىسى 2019 جىلى 39-ورىندى يە­لەن­دى. سالىس­تىرمالى تۇردە الساق, «ۇل­­كەن دۋلىعا» دودالارىن­دا گو­لۋ­­بەۆكە قاراعاندا كۋكۋش­كين­­­نىڭ كورسەتكىشى جاقسى­راق بول­­دى. ميحايل اۋستراليانىڭ اشىق بىرىنشىلىگى (2019) مەن ۋيم­بلدوننىڭ (2019) ءتورتىنشى كەزە­ڭىنە دەيىن جەتتى. ال اندرەي ەش­ۋاقىتتا اتالعان جارىستاردىڭ ەكىنشى اينالىمىنان اسپاعان. سوعان قاراماستان, دەۆيس كۋبوگىندا قازاقستان قۇراماسىنىڭ مىقتىلار ساناتىنا قوسىلۋىنا قوس جەرلەسىمىز سۇبەلى ۇلەس قوس­قانىن ەشكىم جوققا شىعارا المايدى.

ءدال قازىرگى كەزدە 24 جاستاعى الەكساندر بۋبليكتىڭ قارقىنى قۋانتادى. نەۆا جاعالاۋىنان كەلگەن سپورتشىنىڭ قازاقستاننىڭ ازاماتتىعىن العانىنا التى جىل­عا جۋىقتادى. ءالى بۋىنى بەكي قويما­عان بوزبالانىڭ مىقتى تەننيسشى بولىپ قالىپتاسۋىنا ءبىزدىڭ ەلدە بارلىق جاعداي جاسالدى. ناتيجە كوپ كۇتتىرگەن جوق. بۇگىنگى تاڭدا بۋبليكپەن ساقا سپورت­شىلاردىڭ وزدەرى ساناسادى. بىل­تىر كۇزدە ول اتر رەي­تينگىندە 34-ورىنعا دەيىن كوتەرىلدى. ال قازىر الەكساندر سول بيىگىنەن نەبارى ءۇش ساتى عانا تو­مەندەدى.

قازاقستان تەننيسى جايىندا اڭگىمە قوزعاعاندا, ەلەنا ليحوۆ­تسەۆاعا توقتالماي كەتۋگە بولمايدى. 1975 جىلى الماتىدا تۋىپ-وسكەن وتانداسىمىز 1999 جىلى الەم­دىك رەيتينگتە 15-ورىنعا جاي­­عاستى. كەزىندە ول رولان گار­روس­تىڭ جارتىلاي (2005) جانە اۋس­تراليانىڭ اشىق بىرىنشىلىگى (2000) مەن ۋيمبلدوننىڭ (2002) شيرەك فينالدارىندا وينادى. بىراق بۇل جەتىستىكتەرىنىڭ بار­لىعىنا ليحوۆتسەۆا رەسەيدىڭ ساپىندا ونەر كورسەتكەن ۋاقىتتا قول جەتكىزدى. سوندىقتان دا اتال­عان ويىنشىنىڭ تابىستارى قازاق­ستانعا تيەسىلى ەمەس.

ال بۇگىنگى تاڭدا ورەلى ونەرى­مەن كوزگە ءتۇسىپ جۇرگەن ەلەنا رى­باكيناعا كەلەر بولساق, ول 1999 جىلى ماسكەۋدە تۋدى. جەر­گىلىكتى فەدەراتسيا تاراپىنان كوڭىل­دەگىدەي قولداۋ تاپپاعاننان كەيىن 2018 جىلى قازاقستانعا قونىس اۋداردى. سول كەزدەن بەرى ونىڭ سپورتتىق كارەراسىندا ورلەۋ كەزەڭى باستالدى. الەمدىك رەيتينگتە 191-ورىندا تۇرعان رىباكينانىڭ كور­­سەتكىشى ۋاقىت وزعان سايىن جاقسارا ءتۇستى. بىلتىر ول مەل­بۋرندەگى جارىستىڭ ءۇشىنشى كەزە­­ڭىنە شىقسا, بيىل ۋيمبل­دون­نىڭ ءتورتىنشى اينالىمىنا جەتىپ, رولان گارروستىڭ شيرەك فينا­لىندا شەبەرلىك بايقاستى. WTA تۋرنيرلەرىن ەكى رەت ۇتتى. بىلتىر توكيو وليمپياداسىندا ءتورتىنشى ورىنعا تابان تىرەدى. سونىڭ ارقاسىندا ەلەنا بۇگىنگى تاڭدا الەمنىڭ 13-راكەتكاسى اتانىپ وتىر. تاعى دا قايتالاپ ايتامىز, بۇل – ازىرگە قازاقستاندىق تەننيسشىلەر اراسىنداعى ەڭ زور كورسەتكىش!