توتەنشە جاعداي تارتىبىنە باعىنعان قاراعاندى وبلىسىندا شەكتەن شىققان وقيعالار ازىرگە بايقالا قويعان جوق. ءوندىرىستى وڭىردە ءومىر وزەنى ءوزىنىڭ قالىپتى ارناسىمەن اعىپ جاتىر دەۋگە نەگىز بار.
وزىڭدىكىن الماي ءوسۋ جوق
قاراعاندى وبلىسىنداعى الپاۋىت كاسىپورىندار جەرگىلىكتى قامتۋدىڭ كورسەتكىشتەرى بويىنشا وتكەن جىلدى جامان قورىتىندىلاماپتى. مىسالى, «ارسەلورميتتال تەمىرتاۋ» كومپانياسىندا ساتىپ الۋداعى قازاقستاندىق قامتۋ 72%-دى قۇراسا, «قازاقمىس» كاسىپورنىندا ول مەجە 50%-عا جەتكەن. اتالعان كاسىپورىندار جەرگىلىكتى اكىمدىكپەن ەكى جىل بىرلەسە جۇمىس ىستەگەن ۋاقىت ىشىندە ساتىپ الۋلار بويىنشا وتاندىق تاۋارلاردىڭ ۇلەسىن ۇلعايتىپ قانا قويماي, جەتكىزۋشىلەر ءتىزىمىن دە كەڭەيتۋ ۇستىندە ەكەن. مۇنى جەرگىلىكتى قامتۋدى دامىتۋ بويىنشا ىنتىماقتاستىقتىڭ قورىتىندىلارى تۋرالى ونەركاسىپشىلەر مەن جەرگىلىكتى وندىرۋشىلەردىڭ قاتىسۋىمەن وتكەن ونلاين-كەزدەسۋدە ءوڭىر باسشىسى جەڭىس قاسىمبەك تە قۋاتتادى. وبلىستىق ونەركاسىپ جانە يندۋستريالىق-يننوۆاتسيالىق دامۋ باسقارماسىنىڭ باسشىسى مۇرات قىدىرعانبەكوۆ جەرگىلىكتى وندىرۋشىلەردىڭ شيكىزاتتىق ەمەس تاۋارلار كولەمىن ارتتىرۋعا باسا نازار اۋدارعانىن ايتادى.
– جەرگىلىكتى قامتۋ ۇلەسىن ارتتىرۋ ءۇشىن «ارسەلورميتتال تەمىرتاۋ» اق-مەن بىرلەسىپ مەموراندۋمعا قول قويدىق. وعان قاراعاندى وبلىسىنىڭ 44 تاۋار ءوندىرۋشىسى ەنگىزىلدى. 2021 جىلدىڭ قورىتىندىسى بويىنشا مۇنداي ساتىپ الۋ كولەمى 34,2 ملرد تەڭگەنى قۇرادى. بۇل 2,9 ملرد تەڭگەگە ارتىق نەمەسە 2020 جىلمەن سالىستىرعاندا 9,3%-عا ءوستى. «قازاقمىس» بويىنشا بۇل سوما 96,3 ملرد تەڭگەنى قۇرادى. جەرگىلىكتى تاۋارلاردىڭ ۇلەسى ەكى اكتسيونەرلىك قوعامدا دا ءوستى, – دەپ مالىمدەدى ول.
وبلىس اكىمى جەڭىس قاسىمبەك جەرگىلىكتى كومپانيالاردىڭ اشىق سيپاتتا جۇمىس ىستەي باستاعانىن اتاپ ءوتتى.
– بۇگىندە وڭ وزگەرىستى بايقاۋعا بولادى: قازاقستاندىق جانە جەرگىلىكتى قامتۋدىڭ ءوسۋى ءجۇرىپ جاتىر. كومپانيالار اشىق بولا باستادى. وسى ورايدا ءبىز قاراعاندىلىق كاسىپورىنداردىڭ ونىمدەرى سۇرانىسقا يە بولۋىنا مۇددەلىمىز. ءبىز «باعا – ساپانىڭ» تەڭ جاعدايىندا سىزدەر جەرگىلىكتى تاۋارلاردى ساتىپ الۋلارىڭىز كەرەك دەپ ەسەپتەيمىز. وسىنداي فورماتتا كەزدەسۋدى جالعاستىرا بەرەمىز جانە تولعاعى جەتكەن ماسەلەلەردى بىرىگىپ شەشەمىز, – دەدى ول.
بۇل رەتتە كومپانيا وكىلدەرى 2022 جىلعا ارنالعان ساتىپ الۋ جوسپارلارىن تاياۋ ارادا ۇسىناتىندىقتارىن ايتىپ, ۋادە بەردى. ياعني ولار الداعى 1 اقپانعا دەيىن «قازاقستاندىق قامتۋ» ينتەرنەت-پورتالىندا ورنالاستىرىلادى. وبلىس اكىمى قاراعاندى ءوڭىرىنىڭ تاۋار وندىرۋشىلەرىن قولداۋ جانە جۇيە قۇراۋشى كاسىپورىنداردىڭ ساتىپ الۋلارىنداعى جەرگىلىكتى قامتۋدى ۇلعايتۋ جونىندەگى جۇمىستىڭ ۇدايى باقىلاۋدا بولاتىنىن ايتتى.
تارتىپسىزدەردى تاۋبەسىنە كەلتىرەدى
وڭىردە توتەنشە جاعداي رەجىمى جانە وعان بايلانىستى بىرقاتار شەكتەۋلەر شارالارىن بۇزۋشىلار ازايماي تۇر. بۇگىندە ەنگىزىلگەن ءتارتىپ پەن ەرەجەنى بۇزعان تۇرعىندارعا قاتىستى 680 اكىمشىلىك حاتتاما تولتىرىلدى. سونداي-اق 69 ادام اكىمشىلىك قاماۋعا الىنىپ, 26 بۇزۋشىعا ايىپپۇل سالىنعان. ال 525 تۇرعىن ەسكەرتۋمەن قۇتىلىپتى. وبلىستىق پوليتسيا دەپارتامەنتىنىڭ مالىمەتىنشە, وتكەن تاۋلىكتە وڭىردە 34 قىلمىستىق قۇقىق بۇزۋشىلىق تىركەلگەن ەكەن. پوليتسيا قىزمەتكەرلەرى ولاردىڭ 19-ىن ءىزىن سۋىتپاي اشىپتى. اتاپ ايتقاندا, تىيىم سالىنعان 45 زات تاركىلەنگەن. ونىڭ ىشىندە 18 دانا تەگىس ۇڭعىلى قارۋ بار. سونداي-اق ەسىرتكى زاتتارىن ساقتاۋدىڭ 9 فاكتىسى انىقتالعان. شەتەلدىك 6 ازامات كوشى-قون زاڭناماسىن بۇزعانى ءۇشىن اكىمشىلىك جاۋاپكەرشىلىككە تارتىلدى.
– پوليتسيا دەپارتامەنتى تۇرعىنداردى توتەنشە جاعداي رەجىمىن بۇزباۋعا شاقىرادى جانە پوليتسەيلەردىڭ جۇمىسىنا تۇسىنىستىكپەن قارايتىن ازاماتتارعا العىس بىلدىرەدى, – دەيدى قاراعاندى وبلىسىنىڭ كومەندانتى, جەرگىلىكتى پوليتسيا دەپارتامەنتىنىڭ باسشىسى ەرلان فايزۋللين.
«وميكرون» ومىراۋلاماسىن دەسەك...
قاراعاندى وبلىسىندا ەپيدەميالىق احۋال اياقاستىنان ناشارلاپ كەتتى. ماسەلەن, وتكەن تاۋلىكتە وڭىردە كوروناۆيرۋس ينفەكتسياسىن جۇقتىرۋدىڭ 669 جاڭا وقيعاسى تىركەلدى. وسىعان سايكەس, وبلىس كەشەگى كۇننەن باستاپ «قىزىل ايماققا» اۋىستى. مەديتسينالىق جانە فارماتسەۆتيكالىق باقىلاۋ كوميتەتىنىڭ قاراعاندى وبلىسى بويىنشا دەپارتامەنتىنىڭ ۇجىمى وزدەرى باس بولىپ, جۇمىس ورنىندا قايتا ۆاكتسينالاۋ ءىس-شاراسىن ۇيىمداستىردى. بۇل ىستە ولارعا وبلىس ورتالىعىنداعى №1 كوپسالالى اۋرۋحانانىڭ ءموبيلدى ەگۋ توبى كومەكتەستى. قاراعاندى وبلىسى بويىنشا مفكد باسشىسى ولگا سميرنوۆا مۇنداي قادامعا تۇرعىندارعا ۇلگى كورسەتۋ ماقساتىندا بارعاندارىن ايتادى.
– دەپارتامەنت اكىمشىلىگى وتكەن جىلدىڭ جەلتوقسان ايىندا رەۆاكتسينالاۋدان ءساتتى وتكەن بولاتىن. ال بۇگىن بۇكىل ۇجىم باسشىلىقتىڭ باستاماسىن قولدادى. جالپى, قىزمەتكەرلەرىمىز وتكەن جىلى العاشقىلاردىڭ ءبىرى بولىپ ەكپە العان ەدى. ەندى ۆيرۋستىڭ جاڭا شتامىنىڭ قاۋپىن جانە انتيدەنەلەردىڭ اسەر ەتۋ مەرزىمىن ەسكەرە وتىرىپ, العاشقىلاردىڭ ءبىرى بولىپ رەۆاكتسينالاۋدان ءوتتى. بارلىعىمىز ءوز تاجىريبەمىزدە COVID-19-عا قارسى وسىنداي الدىن الۋ شاراسىنىڭ تيىمدىلىگىنە كوز جەتكىزدىك. ەندى ءوزىمىزدى قورعاپ, جاقىندارىمىزدى اۋرۋدىڭ جاڭا شتامدارىنان قورعاعىمىز كەلەدى, – دەدى و.سميرنوۆا.
قاراعاندى وبلىستىق سانەپيدباقىلاۋ دەپارتامەنتىنىڭ مالىمەتىنە ساي, شەكتەۋ شارالارىن قاتاڭداتۋ «سارى ايماقتان» «قىزىل ايماققا» وتكەن سوڭ, بەس كۇننەن كەيىن جۇرگىزىلەتىنىن حابارلادى. ياعني «سارى ايماقتان» «قىزىل ايماققا» ءوتۋ وسى مەرزىم بىتكەننەن كەيىن جۇزەگە اسىرىلادى.
قاراعاندى وبلىسى