ءال-فارابي اتىنداعى قازاق ۇلتتىق ۋنيۆەرسيتەتىنىڭ Farabi Hub يننوۆاتسيالىق ونىمدەر جانە جوعارى تەحنولوگيالىق جوبالار ورتالىعىندا قازاقستان-سينگاپۋر كۆانتتىق تەحنولوگيالار ورتالىعى سالتاناتتى تۇردە اشىلدى. ASTRASEC PTE. LTD (سينگاپۋر) كومپانياسى مەن «Qubitera» جشس سەرىكتەستىگى نەگىزىندە جۇزەگە اسقان جوبا ۇلتتىق كۆانتتىق ەكوجۇيەنى قالىپتاستىرۋعا سەرپىن بەرمەك, دەپ حابارلايدى Egemen.kz.
عىلىم جانە جوعارى ءبىلىم مينيسترلىگىنىڭ مالىمەتىنشە, جاڭا ورتالىق ىرگەلى جانە قولدانبالى زەرتتەۋلەر جۇرگىزۋگە, زەرتتەۋشىلەر مەن ينجەنەرلەردى, تەحنولوگيالىق كاسىپكەرلەردى دايارلاۋعا, كۆانتتىق قورعالعان بايلانىس پەن ەسەپتەۋ شەشىمدەرىن دامىتۋعا باعىتتالعان. سونىمەن قاتار وزىق حالىقارالىق تاجىريبەنى ەنگىزۋ, بىرلەسكەن عىلىمي-زەرتتەۋ جانە تاجىريبەلىك-كونسترۋكتورلىق جوبالاردى ىسكە اسىرۋ, تەحنولوگيالىق ستارتاپتاردى قولداۋ دا باسىم مىندەتتەردىڭ قاتارىندا تۇر.
العاشقى كەزەڭدە زاماناۋي فوتوندىق جۇيەلەرمەن جابدىقتالعان كۆانتتىق كريپتوگرافيا جانە كۆانتتىق بايلانىس زەرتحاناسى ىسكە قوسىلدى. وقۋ-تاجىريبەلىك ينفراقۇرىلىم عىلىمي ىزدەنىستەر جۇرگىزۋگە جانە مامانداردى تاجىريبەلىك تۇرعىدا دايارلاۋعا مۇمكىندىك بەرەدى.
شىعىس قازاقستان تەحنيكالىق ۋنيۆەرسيتەتى Horizon Europe جەڭىمپازى اتاندى
سالتاناتتى جيىندا ءسوز سويلەگەن عىلىم جانە جوعارى ءبىلىم ءمينيسترى ساياسات نۇربەك اتالعان جوبانىڭ عىلىم مەن جوعارى ءبىلىمدى دامىتۋ, تسيفرلىق جانە تەحنولوگيالىق قاۋىپسىزدىكتى نىعايتۋ, يننوۆاتسيالىق ەكونوميكانى ىلگەرىلەتۋ جانە ستراتەگيالىق سالالارعا بىلىكتى كادر دايارلاۋ باعىتىنداعى مەملەكەتتىك باسىمدىقتارعا ساي كەلەتىنىن اتاپ ءوتتى.
«بۇگىندە الەم كۆانتتىق رەۆوليۋتسيانىڭ قارساڭىندا تۇر. ونىڭ ماڭىزدىلىعى – ءداستۇرلى كرەمني تەحنولوگيالارىنا نەگىزدەلگەن زاماناۋي تسيفرلىق, كوممۋنيكاتسيالىق جانە ەسەپتەۋ جۇيەلەرىنىڭ الەۋەتى ءوزىنىڭ شارىقتاۋ شەگىنە جەتكەنىندە تۇر. ءال-فارابي اتىنداعى قازاق ۇلتتىق ۋنيۆەرسيتەتى بازاسىنداعى بۇل ورتالىق ەلىمىزدىڭ عىلىمى مەن ەكونوميكاسىن دامىتۋعا جاڭا مۇمكىندىكتەرگە جول اشادى», دەدى مينيستر.
قازاق اگروتەحنيكالىق زەرتتەۋ ۋنيۆەرسيتەتىندە Smart-اۋديتوريا اشىلدى
قازۇۋ باسقارما توراعاسى – رەكتور جانسەيىت تۇيمەباەۆ عىلىم مەن بيزنەستىڭ ىقپالداسۋى ستراتەگيالىق ماڭىزعا يە ەكەنىن ايتتى. ونىڭ سوزىنشە, ۋنيۆەرسيتەت جاھاندىق يننوۆاتسيالار توعىساتىن ورتالىققا اينالىپ كەلەدى.
«جاڭا ورتالىقتىڭ قۇرىلۋى – قازۇۋ-دى الەمدىك دەڭگەيدەگى زەرتتەۋ ۋنيۆەرسيتەتىنە اينالدىرۋ ستراتەگياسىن ىسكە اسىرۋداعى ماڭىزدى قادام. ءبىز بولاشاق تەحنولوگيالارىن جاساۋ ءۇشىن قۋاتتى اكادەميالىق الەۋەتتى سينگاپۋرلىق سەرىكتەستەردىڭ وزىق تاجىريبەسىمەن بىرىكتىرەمىز. قازاقستان مەن سينگاپۋردىڭ كۆانتتىق سالاداعى ىنتىماقتاستىعى سينەرگەتيكالىق اسەر بەرەدى», دەدى رەكتور.
ASTRASEC PTE. LTD كومپانياسى ديرەكتورلار كەڭەسىنىڭ توراعاسى كۆانتتىق زەرتتەۋلەردى دامىتۋ قازاقستان ءۇشىن ستراتەگيالىق قاجەتتىلىك ەكەنىن اتاپ ءوتتى.
«كۆانتتىق زەرتتەۋلەردى دامىتۋ – قازاقستان ءۇشىن ستراتەگيالىق قاجەتتىلىك. جاڭا بۋىن كۆانتتىق تەحنولوگيالارىنا يە ەلدەر اقپاراتتىق قاۋىپسىزدىك سالاسىندا شەشۋشى ارتىقشىلىققا قول جەتكىزەدى. بۇگىندە نەگىزگى باسىمدىق كۆانتتىق كوممۋنيكاتسياعا بەرىلىپ وتىر: ول مەملەكەتتىڭ تسيفرلىق تۇراقتىلىعىن قامتاماسىز ەتىپ, بولاشاقتاعى ەڭ پەرسپەكتيۆالى تەحنولوگيالاردى دامىتۋعا جول اشادى», دەدى ول.
جيىندا سونداي-اق تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى تسيفرلىق اكتيۆتەر جانە سەرپىندى تەحنولوگيالار كوميتەتىنىڭ توراعاسى عيززات بايتۇرسىنوۆ, ەنەرگەتيكا ۆيتسە-ءمينيسترى ءىلياس ناسسەن ۇلى, قورعانىس مينيسترلىگى تسيفرلاندىرۋ دەپارتامەنتىنىڭ ديرەكتورى سەرىك بوجعۇلوۆ جانە وزگە دە قاتىسۋشىلار ءسوز سويلەدى.
ورتالىقتىڭ اشىلۋىنا وراي «قازاقستان-سينگاپۋر كۆانتتىق تەحنولوگيالار ورتالىعى – ۇلتتىق كۆانتتىق ەكوجۇيەنىڭ ءوسۋ نۇكتەسى» تاقىرىبىندا دوڭگەلەك ۇستەل ءوتتى. عالىمدار مەن تەحنولوگيالىق كومپانيا باسشىلارى قاتىسقان تالقىلاۋدا ورتالىقتىڭ دامۋ باعىتتارى, كۆانتتىق كيبەرقاۋىپسىزدىك, يندۋستريالىق ارىپتەستىك جانە بىرلەسكەن جوبالار شەڭبەرىندە زياتكەرلىك مەنشىكتى قورعاۋ ماسەلەلەرى جان-جاقتى قارالدى.
توقاەۆ: جاساندى ينتەللەكت مامانداندىرىلعان زەرتتەۋ ۋنيۆەرسيتەتى اشىلادى