قارجى پوليتسياسى ۇيىمداسقان قىلمىستىق توپقا كومەك كورسەتىپ كەلگەن رەسپۋبليكا ايماقتارىنداعى سالىق ورگاندارىنىڭ 18 قىزمەتكەرىن انىقتادى. بۇل تۋرالى Mail.ru حابارلادى.
18 اقپاندا قارجى مينيسترلىگىنىڭ سالىق كوميتەتى تاۋارلاردى يمپورتتاۋ كەزىندەگى قوسىمشا قۇن سالىعىن اكىمشىلدەندىرۋ باسقارماسىنىڭ باستىعى بۇلعىنوۆ قۇقىق قورعاۋ قىزمەتكەرلەرىنىڭ قولىنا ءتۇسىپ, سوت سانكتسياسىمەن قاماۋعا الىندى.
بۇلعىنوۆ 2009-2010 جىلدار ارالىعىندا قوستاناي وبلىستىق سالىق دەپارتامەنتىنىڭ باستىعى بولعان تۇستا قىزمەت بابىن تەرىس پايدالانعان. ناقتى ايتقاندا, جالعان كاسىپورىندارعا تەكسەرۋ جۇرگىزىپ, ولاردىڭ ەسەپ-شوتتارىنا زاڭسىز تۇردە ارتىق تولەنگەن قوسىمشا قۇن سالىعىنىڭ تۇسۋىنە سەبەپكەر بولعان. سونداي-اق, 2010-2012 جىلدارى وڭتۇستىك قازاقستان وبلىستىق سالىق دەپارتامەنتىنىڭ باستىعى بولعان ج. ءنۇسىپوۆ تە قىلمىستىق توپتىڭ جالعان كاسىپورىندارىن تەكسەرۋگە قاتىسى بولعان ەكەن. مۇنان وزگە, بەلگىلى ءبىر قىلمىس ءتۇرى بويىنشا اقمولا, جامبىل جانە قوستاناي وبلىستارىنداعى سالىق ورگاندارىنىڭ 16 قىزمەتكەرى جاۋاپقا تارتىلدى.
ەسكە سالا كەتەيىك, وتكەن جىلدىڭ قىركۇيەك ايىندا قارجى پوليتسياسى اگەنتتىگىنىڭ قىزمەتكەرلەرى ارتۋر كيم مەن فارحاد قاليەۆتى قاماۋعا الدى. ولار جالعان كاسىپورىندارى ارقىلى وزگە كوممەرتسيالىق ۇيىمداردىڭ سالىق تولەۋدەن جالتارۋىنا ىقپال جاساعان كورىنەدى. سونىڭ سالدارىنان مەملەكەتكە 2,3 ملرد. تەڭگەدەن اسا شىعىن كەلگەن. جالپى, وتكەن جىلى سالىق ورگاندارىنىڭ 49 قىزمەتكەرى قىلمىستىق جاۋاپكەرشىلىككە تارتىلىپتى.
ءامىرحان الماعانبەتوۆ.
دەرەككوز: Mail.ru.
فوتو: Mirvam.org.