الماتى وبلىسىندا الاساپىران كۇندەردىڭ جاڭعىرىعى الىستاپ, ەل كوڭىلى ورنىنا تۇسە باستاعانداي. وبلىس ورتالىعى مەن جەكەلەگەن ەلدى مەكەندەردە اسكەريلەر ءالى دە ارنايى وپەراتسيا جۇرگىزىپ جاتقانىنا قاراماستان, وڭىردەگى تىرشىلىك بەيبىت قالىپقا ورالدى.
سونىڭ ءبىر بەلگىسىن تالدىقورعان قالاسى بويىنشا قوعامدىق كولىكتىڭ قاتىناي باستاعانىنان كورۋگە بولادى. الماتى وبلىستىق جولاۋشىلار كولىگى جانە اۆتوموبيل جولدارى باسقارماسى حابارلاعانداي, وبلىس ورتالىعىنداعى باعىتتار بويىنشا 7 تاسىمالداۋشى مەكەمەنىڭ 82 اۆتوبۋسى جۇمىسقا شىققان. قوعامدىق كولىك تاڭەرتەڭگى ساعات 8.00-مەن كەشكى 18.00 ارالىعىندا جۇرەدى.
سونداي-اق وبلىس اكىمدىگىندە وڭىردەگى قالىپتى ءومىر ءسۇرۋ جاعدايىنا كەزەڭ-كەزەڭىمەن كوشۋ ماسەلەسى پىسىقتالدى. وبلىس اكىمى قانات بوزىمباەۆ جيىن وتكىزىپ, وندا پرەزيدەنت جاريالاعان جالپىۇلتتىق ازا تۇتۋ كۇنىنە وراي قازا بولعانداردى ءبىر مينۋت ۇنسىزدىكپەن ەسكە الدى. جيىندا وبلىس اۋماعىندا شتاتتىق رەجىمدەگى جۇمىسقا كوشۋ تۋرالى تاپسىرمالار بەرىلدى.
– وبلىستا كەلتىرىلگەن شىعىنداردى ەسەپتەۋ كوميسسياسى جۇمىسىن باستادى. كوممۋنالدىق جۇيەلەردىڭ ۇزدىكسىز جۇمىسىن قامتاماسىز ەتۋدى جالعاستىرامىز. سول سياقتى ساۋدا نىساندارى, ءىرى بازارلار, جانار-جاعارماي بەكەتتەرى تولىقتاي ىسكە قوسىلۋى ءتيىس. بۇل رەتتە وسى نىسانداردىڭ باعانى وسىرمەۋى قاتاڭ باقىلانادى. قازىر قالادا ينتەرنەت جەلىسى ىسكە قوسىلدى. ەندى كوممۋنالدىق تولەمدەردى قابىلداۋ, زەينەتاقى, جاردەماقى تولەمدەرى دە كەدەرگىسىز جۇرگىزىلۋى كەرەك, – دەدى ءوز سوزىندە ق.بوزىمباەۆ.
قازىر ايماقتاعى اۋرۋحانالار مەن ءدارىحانالاردىڭ جۇمىسى جاندانعان. وندا ءدارى-دارمەك قورى جەتكىلىكتى, قالىپتى رەجىمدە جۇمىس ىستەپ تۇر. سول سياقتى تالدىقورعان قالاسىندا قوعامدىق كولىك تولىق جۇمىسقا كىرىستى. وبلىستىڭ تۇكپىر-تۇكپىرىنە الماتى قالاسىنان جۇيەلى تۇردە ازىق-ت ۇلىك جەتكىزۋ ءۇردىسى ۇزىلگەن جوق. سونىمەن بىرگە جيىندا پوليتسيا جانە ارنايى ورگاندار قىزمەتكەرلەرىنە جاعداي جاساۋ, ولاردى ماتەريالدىق تۇرعىدا قولداۋ, تۇرعىن ۇيمەن قامتۋ, شتات سانىن ۇلعايتۋ سياقتى بىرقاتار كەشەندى شارالار جوباسىن ۇسىنۋ جايى ايتىلدى.
– جالپى, وبلىستاعى احۋال تۇراقتى. تالدىقورعان قالاسى تولىق باقىلاۋدا. سوندىقتان قالىپتى ومىرگە بىرتە-بىرتە كوشۋىمىز كەرەك. جۇدىرىقتاي جۇمىلىپ, بىرگە جۇمىس ىستەسەك, جۋىق ارادا وبلىستاعى شارۋاشىلىق جۇمىستارىن, جەتىسۋلىقتاردىڭ ءومىر ءسۇرۋ سالتىن بۇرىنعى قالپىنا كەلتىرە الامىز دەپ ويلايمىن, – دەدى ايماق باسشىسى ق.بوزىمباەۆ.
الماتى وبلىسى