سىرتقى ىستەر مينيسترلىگى رەسمي سايتىندا توتەنشە جاعداي ەنگىزىلگەننەن كەيىنگى رەسپۋبليكاداعى جاعداي تۋرالى شەتەلدىك باق-تاعى جاريالانىمدارعا قاتىستى پىكىر ءبىلدىردى, دەپ حابارلايدى Egemen.kz.
«ەلىمىزدە توتەنشە جاعداي ەنگىزىلگەننەن بەرى قالىپتاسقان احۋالعا بايلانىستى شەتەلدىك باق-تاعى بىرقاتار جاريالانىمدار ءاتۇستى جانە بىرجاقتى سيپاتتا بولدى. وسى ورايدا قر سىرتقى ىستەر مينيسترلىگى كەلەسىنى اتاپ ءوتۋدى ءجون سانايدى. ماڭعىستاۋ وبلىسى مەن ەلدىڭ بارلىق ءىرى قالالارىندا بەيبىت ميتينگىلەر ءوتتى. ولاردىڭ تالاپتارى تولىق قاناعاتتاندىرىلدى. الايدا, تەررورشىل, ەكسترەميستىك جانە قىلمىستىق توپتار شيەلەنىس پەن زورلىق-زومبىلىقتى ۋشىقتىرۋ ءۇشىن بۇل جاعدايدى ءوز مۇددەسىنە پايدالانىپ الدى. وسىعان بايلانىستى ەلدە توتەنشە جاعداي جاريالاندى. الماتى قالاسىنداعى جانە ەلدىڭ باسقا دا وڭىرلەرىندەگى وقيعالار كورسەتكەندەي, قازاقستان شەتەلدە دايىندىقتان وتكەن جانە جاقسى ۇيلەستىرىلگەن تەررورشىل توپتاردىڭ شابۋىلىنا تاپ بولدى. الدىن الا مالىمەتكە قاراعاندا, شابۋىلشىلاردىڭ اراسىندا جانجال ايماقتارىندا ءدىني راديكالدىق توپتاردىڭ قاتارىندا قاقتىعىستارعا قاتىسۋ تاجىريبەسىنە يە ادامدار بار. قازىرگى ۋاقىتتا قازاقستاننىڭ قۇقىق قورعاۋ ورگاندارى مەن قارۋلى كۇشتەرى, كەيبىر شەتەلدىك باق بۇرمالاپ كورسەتكەندەي, «بەيبىت سيپاتتاعى نارازى توپتارعا» ەمەس, تەرروريستەرگە قارسى تۇرۋدا», دەلىنگەن ۆەدومستۆو مالىمەتىندە.
قر ءسىم-ءنىڭ جازۋىنشا, قازاقستان ۇجىمدىق قاۋىپسىزدىك تۋرالى شارت ۇيىمىنا (ۇقشۇ) كومەككە جۇگىنۋگە ءماجبۇر بولدى «قالىپتاسقان جاعدايدا, قازاقستان ۇجىمدىق قاۋىپسىزدىك تۋرالى شارت ۇيىمىنا كومەككە جۇگىنۋگە ءماجبۇر بولدى, ول جاعدايدى تۇراقتاندىرۋ ماقساتىندا جالپى سانى 2 500 ادام قۇرايتىن بىتىمگەرشىلىك كۇشىن جىبەردى. بىتىمگەرشىلەردىڭ مانداتىنا ستراتەگيالىق نىسانداردى كۇزەتۋ جانە قازاقستاندىق قۇقىق قورعاۋ كۇشتەرىنە جاردەمدەسۋ كىرەدى. تەررورشىل توپتارعا قارسى نەگىزگى ءىس-قيمىلدى قازاقستاننىڭ قۇقىق قورعاۋ ورگاندارى مەن قارۋلى كۇشتەرى جۇرگىزەتىنىنە نازار اۋدارامىز.
ۇقشۇ-دىڭ بىتىمگەرشىلىك كۇشتەرى قازاقستاندا ۋاقىتشا نەگىزدە بولاتىنىن جانە جاعداي تۇراقتالعان سوڭ قازاقستان تاراپىنىڭ ءبىرىنشى سۇراۋى تۇسكەن كەزدە ءوز ەلدەرىنە ورالاتىنىن اتاپ وتكەن ءجون. نارازىلىق ميتينگىلەردىڭ بەيبىت قاتىسۋشىلارى ەشقانداي قۋدالاۋعا ۇشىرامايتىنى اسا ماڭىزدى. قۇقىق قورعاۋ ورگاندارىنا قالىپتاسقان جاعدايدىڭ سەبەپتەرىنە كەشەندى تەرگەۋ جۇرگىزۋ تاپسىرىلدى, ونىڭ ناتيجەلەرى حالىقارالىق قوعامداستىققا جەتكىزىلەتىن بولادى. قازاقستان حالقىنىڭ ىنتىماعىن جانە پرەزيدەنت ق. توقاەۆتىڭ بەيبىت ءومىردى قالپىنا كەلتىرۋ جونىندەگى شەشىمدەرى مەن شارالارىنا قولداۋىن اتاپ وتكەن ءجون. قازاقستان دەموكراتيا مەن ەل كونستيتۋتسياسىن ءدىني راديكالدار مەن تەررورشىلداردان تاباندىلىقپەن قورعاۋعا دايىن! وكىنىشكە وراي, قاقتىعىستاردىڭ سالدارىنان ەلىمىزدىڭ ازاماتتارى, سونىڭ ىشىندە قۇقىق قورعاۋ ورگاندارىنىڭ قىزمەتكەرلەرى مەن اسكەريلەر قازا تاپتى. وسىعان بايلانىستى, 2022 جىلدىڭ 10 قاڭتارى ەلىمىزدە جالپىۇلتتىق ازا تۇتۋ كۇنى بولىپ جاريالاندى», دەلىنگەن سىرتقى ىستەر مينيسترلىگىنىڭ حابارلاماسىندا.