ورتالىق كوممۋنيكاتسيالار قىزمەتىندە وتكەن بريفينگ بارىسىندا تىلشىلەر ساۋالىنا جاۋاپ بەرگەن قر ەنەرگەتيكا ءمينيسترى ماعزۇم مىرزاعاليەۆ سۇيىتىلعان گاز باعاسىن 50 تەڭگەگە ءتۇسىرۋدىڭ ەكىتالاي ەكەنىن جەتكىزدى, دەپ حابارلايدى Egemen.kz inform.kz-كە سىلتەمە جاساپ.
«گاز ءوندىرىسىنىڭ وزىندىك قۇنى شامامەن 100 مىڭ ەكەنىن, بۇل حالىق تالاپ ەتكەن 50-60 تەڭگەدەن اساتىنىن ەسكەرسەك, وزەكتى ماسەلەنى شەشۋدىڭ ەكى جولىن كورەمىز. تاپشىلىققا تاپ بولىپ, زاۋىتتارىمىزدى توقتاتامىز, بولماسا وسىنداي اسا جاعىمدى ەمەس شەشىم قابىلداۋ كەرەك. نارىقتىڭ زاڭىن ەشكىم جوققا شىعارا الماق ەمەس. ءدال قازىر ەل قالاعان تالاپتى تولىق ورىنداۋدىڭ مۇمكىندىگىن كورىپ تۇرعان جوقپىن», دەدى مينيستر.