قازاقتىڭ تانىمال كاسىپقوي بوكسشىسى قانات يسلامنىڭ قارسىلاسى بەلگىلى بولدى. ول 21 قاڭتاردا اقش-تىڭ پلانت-سيتي قالاسىندا ۇلىبريتانيالىق دجيممي كەلليمەن كۇش سىناسادى.
تۇماندى البيون ەلى وكىلىنىڭ كاسىپقوي رينگتە جيعان ءبىراز بەدەلى بار. 29 جاستاعى دجيممي وسى كۇنگە دەيىن 27 كەزدەسۋ وتكىزىپ, 25 مارتە جەڭىسكە جەتتى. 10 قارسىلاسىن نوكاۋتقا جىبەردى. تەك ەكى رەت عانا جەڭىلىستىڭ كەرمەك ءدامىن تاتتى. ۇلىبريتانيا بوكسشىنىڭ 2015 جىلدىڭ جەلتوقسان ايىندا WBO نۇسقاسى بويىنشا الەم چەمپيونى اتانۋعا تاماشا مۇمكىندىگى بولدى. الايدا ءوزىنىڭ وتانداسى ليام سميتپەن بولعان جەكپە-جەكتىڭ جەتىنشى راۋندىندا ول تەحنيكالىق نوكاۋتپەن ۇتىلدى. ءوزىنىڭ سوڭعى باسەكەسىن كەللي وسى جىلدىڭ 12 جەلتوقسانىندا گارري مەتتيۋسقا قارسى وتكىزىپ, ونى ءۇشىنشى راۋندتا ۇرىپ جىقتى.
ال قانات يسلامنىڭ ءجۇرىپ وتكەن جولى جانكۇيەرلەردىڭ كوز الدىندا. 10 جىلعا جۋىق ۋاقىت ارالىعىندا 28 رەت شارشى الاڭعى شىعىپ, بارلىق باسەكەنى ءوز پايداسىنا شەشكەن قازاق بوكسشىسى 22 ايقاستى مەرزىمىنەن بۇرىن اياقتادى.