ەنەرگەتيكا مينيسترلىگى الەۋمەتتىك جەلىلەردە تاراعان جانارماي قۇيۋ ستانتسيالار جەلىسى بويىنشا 2022 جىلعا ارنالعان ديزەل مەن بەنزين باعاسىنا قاتىستى پىكىر ءبىلدىردى, دەپ حابارلايدى Egemen.kz.
«الەۋمەتتىك جەلىلەردە اي-92 ماركالى بەنزيننىڭ بولجامدى باعاسى 240 تەڭگە, ديزەل باعاسى 400 تەڭگە بولاتىنى كورسەتىلگەن جانارماي قۇيۋ ستانتسيالارى جەلىسىنىڭ قۇجاتى تاراپ جاتىر. بۇل بولجام قانشالىقتى راس؟ 2022 جىلى باعا قانداي بولادى؟», دەپ سۇرادى باق وكىلدەرى.
ەنەرگەتيكا ۆيتسە-ءمينيسترى اسەت ماعاۋوۆ اقپاراتتىق بيۋللەتەندى الەۋمەتتىك جەلىدەن كورىپ, كومپانياعا حابارلاسقانىن ايتتى.
«بۇل حات ەكى ايدان بەرى الەۋمەتتىك جەلىلەردە تاراپ جاتىر. كومپانيا ءوز تۇتىنۋشىلارى ءۇشىن وسىنداي بولجامدار جاساپ, كوممەرتسيالىق ۇسىنىس جاساعانىن ايتتى. ياعني, بۇل شارۋاشىلىق سۋبەكتىلەرى مەن نارىقتى باعالاۋ اراسىنداعى قارىم-قاتىناس.
مەنىڭ ويىمشا, ديزەل 400 تەڭگەدەن بولمايدى. نەگىزىندە قازىر باعانىڭ ءبىرشاما تومەندەگەنىن كورىپ وتىرمىز», دەدى ماعاۋوۆ.
ول ناقتى باعا مۇناي باعاسىنا بايلانىستى بولاتىنىن جانە بولجاۋ قيىن ەكەنىن ءتۇسىندىردى.
ء«بىز ىشكى نارىقتاعى باعالارعا اسەر ەتەتىن بەلگىلى ءبىر كوررەلياتسيانى كورىپ وتىرمىز. سەبەبى ديزەل وتىنىن يمپورتتاۋدى جالعاستىرامىز. بىراق قازان-قاراشاداعىداي ءىرى كولەمدە ەمەس. قازىر يمپورت كولەمى تومەندەدى, بىراق جالپى باعالارمەن كوررەلياتسيا بار», دەدى ول.
بەنزين باعاسى بويىنشا, ۆيتسە-مينيستر ناقتى جاۋاپ بەرگەن جوق.
«قازاقستان قازىر بەنزينگە قاتىستى ءوزىن قامتاماسىز ەتەدى. ديزەل بويىنشا بيىل ايتارلىقتاي يمپورت ءوتتى. بەنزين بويىنشا, ىشكى قاجەتتىلىكتەرىمىزدى جابامىز, كەيىن ءبارى بەنزين تۇتىنۋ قانشالىقتى وسەتىنىنە بايلانىستى بولادى. ءبىز بەنزين بويىنشا بيرجالىق ساۋدا جۇرگىزەمىز, بۇل نارىقتىق ينديكاتور. كۇرت ءوسۋ ءۇردىسىن كورىپ وتىرعان جوقپىز», دەدى ماعاۋوۆ.
بىراق ول قازاقستاندا 2022 جىلى اي-92-ءنىڭ ءليترى 240 تەڭگەگە جەتۋى مۇمكىن بە دەگەن سۇراققا جاۋاپ بەرمەدى.