قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ جىل سوڭىنا دەيىن قازاقستاندا قانشا تۇرعىن ءۇي تۇرعىزىلاتىنىن ايتتى, دەپ حابارلايدى Egemen.kz.
«بيىل ءبىز 17 ملن شارشى مەتر تۇرعىن ءۇي نەمەسە 163 مىڭ تۇرعىن ءۇي سالۋدى قامتاماسىز ەتۋىمىز كەرەك. الدىن الا دەرەكتەر بويىنشا, 26 جەلتوقسانداعى جاعداي بويىنشا 16 ملن شارشى مەتردەن استام تۇرعىن ءۇي پايدالانۋعا بەرىلدى. تۇرعىن ءۇي قۇرىلىسى قارقىنىنىڭ ارتۋى وتكەن جىلمەن سالىستىرعاندا 12 وڭىردە بايقالادى», دەدى بەيبىت اتامقۇلوۆ ۇكىمەت وتىرىسىندا.
مينيستر قۇرىلىس جۇمىستارىنىڭ كولەمى تۋرالى باياندادى. ونىڭ ايتۋىنشا, ەلدىڭ ءجىو-دەگى قۇرىلىس سالاسىنىڭ ۇلەسى 2020 جىلدىڭ قورىتىندىسى بويىنشا 6,1%-دى قۇرايدى, ال بولجامدى دەرەكتەر بويىنشا 2021 جىلدىڭ قورىتىندىسى بويىنشا 6,25% كۇتىلۋدە.
«2021 جىلدىڭ 11 ايىنىڭ قورىتىندىسى بويىنشا قۇرىلىس جۇمىستارىنىڭ كولەمى 4,6 ترلن تەڭگەگە ورىندالدى, بۇل 2020 جىلدىڭ دەڭگەيىنەن 6,2%-عا جوعارى», دەپ اتاپ ءوتتى مينيستر.