ماناش قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ پروفەسسورى, بەلگىلى ابىلايتانۋشى زارقىن تايشىباي تاۋەلسىزدىكتىڭ 30 جىلدىعىنا ارناپ «ابىلاي حان تاريحى» اتتى 3 تومدىق جيناق شىعاردى.
وندا رەسەي ارحيۆتەرى مەن قازاقستان قالالارىنداعى حانعا قاتىستى ارحيۆ ماتەريالدارى توپتاستىرىلعان. بۇل – عالىمنىڭ كوپجىلدىق ەڭبەگىنىڭ ناتيجەسى. بولاشاق ابىلايتانۋشىلار ارحيۆ شاڭدارىن جۇتپاي, ءبىر كىتاپقا شوعىرلاندىرىلعان حانعا قاتىستى مالىمەتتەردى وسى جيناقتان تابا الادى.
جۋىردا وبلىس ورتالىعىنداعى ەڭ ۇلكەن مادەنيەت ورنى – جاسوسپىرىمدەر سارايىندا كىتاپتىڭ تۇساۋكەسەر ءراسىمى بولىپ ءوتتى. ونى ۋنيۆەرسيتەت رەكتورى ەرلان شولانوۆ اشىپ جۇرگىزىپ وتىردى. ءوزىنىڭ سوزىندە رەكتور بۇل ەڭبەكتىڭ سقۋ قابىرعاسىندا جارىق كورۋى وزدەرى ءۇشىن ۇلكەن ابىروي ەكەنىن ايتتى. «قازاق حالقىنىڭ مىڭجىلدىق تاريحىندا ەل باسقارعان كوسەمدەر, ءسوز باستاعان شەشەندەر مەن قول باستاعان باتىرلار كوپ بولعان. ەلباسى ن.نازارباەۆ ابىلاي حان ەسىمىن جوعارى باعالايدى. بارشامىزدى ابىلاي حان رۋحى قولداپ ءجۇرسىن», دەدى ول.
وبلىس اكىمىنىڭ ورىنباسارى عاني نىعمەتوۆ ءوڭىر باسشىسىنىڭ قۇتتىقتاۋ حاتىن وقىدى جانە ەڭبەكتىڭ ماڭىزدىلىعىنا توقتالىپ ءوتتى. «مىڭنان ارتىق قۇجاتتىڭ باسىن قۇراعان بۇل ەڭبەكتىڭ تانىمدىق ماڭىزى اسا زور بولماق. ولار ۇلى حانىمىزدى بۇگىنگى جانە بولاشاق ۇرپاققا جان-جاقتى تانىتادى», دەدى ول ءوزىنىڭ سوزىندە. ەڭبەكتىڭ ماڭىزدىلىعى جونىندە سقۋ رەكتورىنىڭ كەڭەسشىسى, تاريح عىلىمدارىنىڭ دوكتورى اقمارال ىبىراەۆا, وبلىستىق ءارحيۆتىڭ ديرەكتورى ساۋلە مالىكوۆا, تاريح عىلىمدارىنىڭ كانديداتى ساۋلە قارتوۆا, «رۋحاني جاڭعىرۋ» زەرتتەۋ ينستيتۋتىنىڭ باسشىسى گۇلنار احمەتجانوۆا جانە ت.ب. ايتىپ بەردى.
كىتاپتىڭ تۇساۋىن وبلىس اكىمىنىڭ ورىنباسارى عاني نىعمەتوۆ, وبلىسقا بەلگىلى ازاماتتار قۇدايبەرگەن قاليەۆ, جومارت وماروۆ, ناعاشىباي بارلىباەۆ, كەمەل وسپانوۆ جانە ت.ب. كەستى.