تالدىقورعان قالالىق كوپسالالى اۋرۋحانادا حالىقارالىق دەڭگەيدە العاش رەت شەبەرلىك كلاسسى ءوتتى. كوپسالالى اۋرۋحانادا مەديتسينا عىلىمدارىنىڭ كانديداتى دانيار جاقىپوۆتىڭ قاتىسۋىمەن لاپاروسكوپيالىق گيستەرەكتوميا, پرومونتوفيكساتسيا, كونسەرۆاتيۆتى ميومەكتوميا وپەراتسياسى جاسالدى, دەپ حابارلايدى Egemen.kz.
وتا جاساۋ ءساتى بىرىكتىرىلگەن وپەراتسيالىق بولمەدە ماسكەۋ, مينسك, باكۋ قالالارىنداعى دارىگەرلەردىڭ ونلاين قاتىسۋىمەن ءوتتى. سونىمەن قاتار «OR1 FEST» ەندوحيرۋرگيالىق ونلاين جانە وفلاين كونگرەسى اياسىندا ۇيىمداستىرىلعان حالىقارالىق ماستەر-كلاسس اقتاۋ, نۇر-سۇلتان, الماتى, تالدىقورعان, ماسكەۋ, مينسك, باكۋ قالالارىندا ءوتتى. وپەراتسيا OR1 بىرىكتىرىلگەن وپەراتسيالىق بولمەدە تىكەلەي ەفيردە ترانسلياتسيالاندى.
«وپەراتسيا كەزىندە حيرۋرگتار, گينەكولوگتار ءوز تاجىريبەلەرىمەن ءبولىسىپ, بىرىكتىرىلگەن وپەراتسيالىق بولمەلەردە جۇمىس ىستەۋدىڭ مۇمكىندىكتەرى مەن ارتىقشىلىقتارى تۋرالى ايتتى. بۇنداي تاجىريبە دارىگەرلەردىڭ بىلىكتىلىگىن ارتتىرىپ, حيرۋرگتار مەن گينەكولوگتاردىڭ جاڭا دەڭگەيدە وتا جاساۋىنا مۇمكىندىك بەرەدى. بۇل اۋرۋحانانىڭ وپەراتسيا بولمەلەرى بارلىق قاجەتتى جابدىقتارمەن جابدىقتالعان», دەدى تالدىقورعان قالالىق كوپسالالى اۋرۋحانانىڭ ديرەكتورى مولداكۋلوۆ جۇماحان مۇقاش ۇلى.
ايتپاقشى, «OR1 FEST» ەندوحيرۋرگيالىق ونلاين جانە وفلاين كونگرەسى اقتاۋ قالاسىنداعى وبلىستىق پەريناتالدىق ورتالىعىندا OR1 بىرىكتىرىلگەن وپەراتسيالىق جۇيەسىنىڭ اشىلعانىنا 10 جىل تولۋىنا وراي ۇيىمداستىرىلعان بولاتىن.