كوشى-قون جونىندەگى حالىقارالىق ۇيىم GFFO قارجىلىق قولداۋىمەن قازاقستان رەسپۋبليكاسىنداعى ادام قۇقىقتارى جونىندەگى ۋاكىلمەن, قر ىشكى ىستەر مينيسترلىگىنىڭ كوشى-قون قىزمەتى كوميتەتىمەن جانە قر ەڭبەك جانە حالىقتى الەۋمەتتىك قورعاۋ مينيسترلىگىمەن بىرلەسىپ, اۋعانستان ازاماتتارىنا كومەك كورسەتۋ بويىنشا گۋمانيتارلىق اكتسيا وتكىزدى, دەپ حابارلايدى Egemen.kz.
وسى جىلدىڭ جەلتوقسان ايىندا قازاقستاندىق جوو-دا وقيتىن اۋعان ستۋدەنتتەرى حالىقارالىق كوشى-قون ۇيىمىنان كومەك سۇرادى. نىتيجەسىندە, جوعارىدا اتالعان ۆەدومستۆو وكىلدەرى گۋمانيتارلىق اكتسيا ۇيىمداستىردى.
گۋمانيتارلىق كومەك اياسىندا 200-دەن استام اۋعان ستۋدەنتتەرى قارجىلىق جانە كونسۋلتاتسيالىق-قۇقىقتىق قولداۋ الدى. ءىس-شارالار الماتى, شىمكەنت, قاراعاندى, وسكەمەن جانە نۇر-سۇلتان قالالارىندا ءوتتى.
«كوشى-قون قىزمەتى كوميتەتى ەلىمىزدىڭ جوعارى وقۋ ورىندارىندا وقيتىن اۋعانستاننىڭ 155 ازاماتىنا وقۋ ۆيزالارىن بەردى جانە ۇزارتتى. كوشى-قون قىزمەتى كوميتەتى ۇيىمداستىرۋشىلىق جاسادى. حالىقارالىق كوشى-قون ۇيىمى تاراپىنان ءتيىستى قارجىلىق كومەك كورسەتىلدى», دەدى پوليتسيا پولكوۆنيگى, قر ءىىم كوشى-قون قىزمەتى كوميتەتى توراعاسىنىڭ ورىنباسارى تىلەۋبەك تاحتانوۆ.
«قازىر ءبىز وتباسىلارىمىزدان اقشا الاتىن مۇمكىندىگىمىز جوق, ويتكەنى اۋعانستانداعى بانك جۇيەسى ءالى جۇمىس ىستەمەيدى. ەشكىم اقشا اۋدارا المايدى. سوندىقتان بىزگە بۇۇ-نىڭ كوشى-قون جونىندەگى اگەنتتىگى سياقتى ۇيىمدارعا سۇراۋ سالۋدى ءجون كوردىك», دەدى گۋمانيتارلىق كومەك الۋشىلاردىڭ ءبىرى مۇحاممەد كابير ەحسان.
قر ادام قۇقىقتارى جونىندەگى ۋاكىل اپپاراتىنىڭ ءرولىن اتقاراتىن ادام قۇقىقتارى جونىندەگى ۇلتتىق ورتالىقتا اتاپ وتكەندەي, بارلىق ستۋدەنتتەرگە زاڭدىق, قۇقىقتىق جانە كونسۋلتاتسيالىق قولداۋ كورسەتىلدى. اكتسيانىڭ نەگىزگى مىندەتتەرىنىڭ ءبىرى - ولاردىڭ قر-دا بولۋىنىڭ قۇقىقتىق مارتەبەسىن زاڭداستىرۋدى قامتاماسىز ەتۋ.
«الەمدىك قاۋىمداستىق ادام قۇقىقتارىن قورعاۋ ماسەلەلەرىنە, اسىرەسە, ىشكى ساياسي جانە ەكونوميكالىق وقيعالار اياسىندا قيىن كەزەڭدى باستان وتكەرىپ جاتقان ەلدەردە ەرەكشە كوڭىل بولەدى. ءاربىر مەملەكەت قيىن ومىرلىك جاعدايعا تاپ بولعان ميگرانتتارعا قاتىستى قابىلداي الاتىن قولداۋ شارالارىنىڭ پاكەتىن دەربەس ايقىندايدى. اكتسيانىڭ نەگىزگى باعىتتارىنىڭ ءبىرى - ءبىلىم الۋدى جالعاستىرۋ ءۇشىن اۋعانستاننان كەلگەن ازاماتتاردىڭ قازاقستاندا بولۋىنىڭ قۇقىقتىق مارتەبەسىن زاڭداستىرۋ, بۇل ولاردىڭ كوپشىلىگى ءۇشىن قۇقىقتىق سەبەپتەر بويىنشا عانا ەمەس, تىلدىك كەدەرگىلەرگە بايلانىستى دا كۇردەلى بولىپ تابىلادى. ولاردىڭ بارلىعى بۇل جاعدايعا ءوز ەرىكتەرىمەن ەمەس, ولارعا دەگەن ادامگەرشىلىك كوزقاراسىنىڭ كورىنىسى - مەملەكەتتىڭ مىندەتى عانا ەمەس, ەڭ الدىمەن ءبىزدىڭ ورتاق ادامي بورىشىمىز», دەدى قر ادام قۇقىقتارى جونىندەگى ۋاكىل ەلۆيرا ءازىموۆا.