ءار ادام – تۋعان توپىراعىنىڭ جىرشىسى. مەيلى ول ونەر سالاسىنا قاتىسى جوق بولسا دا, العاش تابانى تيگەن جەردى ماڭگىلىك بيىگىندەي باعالايدى. دەگەنمەن دە سول سۇلۋ سەزىمدى باستان كەشىپ قانا قويماي, حالىققا جەتكىزەتىن ونەر يەلەرى ەكەنى داۋسىز. وعان سىزدەرگە ۇسىنىپ وتىرعان كارتينا كۋالىك ەتەدى.
تاۋەلسىز ەلىمىزدىڭ قاي تۇكپىرىنە ساپار شەكسەڭىز دە ايتەۋىر ۇلى ەستەلىكتەردىڭ جاڭعىرىعىنا جولىعاسىز. بابامىز باسقان جەردىڭ ءشوبى دە الدەنەدەن حابار بەرەتىندەي. قاراڭىزشى, بەلگىلى سۋرەتشى قاجىبەك ءبايمولديننىڭ «قاتاركول» كارتيناسى ءبىزدى سول ەسكى زاماننىڭ ەستەلىگىنە قايتا جولىقتىرعانداي. بۇل اسەم مەكەن تاڭعاجايىپ تابيعاتىمىزدان سىر تارتادى.
اۆتوردىڭ جەكە شىعارماشىلىعىنا كوز سالساڭىز, ونىڭ كەسكىندەمەلەرى اركەلكى. قىلقالام شەبەرى بىرنەشە باعىتتا ەسكيزدەر سىزىپ, شابىتىن تولىقتاي سىناپ كورگەن سىڭايلى. تۋىندىلارى ابستراكتىلى سۋرەتكە جاقىن. ءتىپتى اكادەميالىق ناتيۋرمورتتار مەن پورترەتتەر دە كەزدەسەدى.
كارتينالارىنىڭ باستى تاقىرىبى – تۋعان ولكەنىڭ سۇلۋلىعىن ماداقتاۋ. ول باياناۋىل مەن بۋرابايدىڭ اسەم كورىنىستەرىن بىرنەشە رەت ءوز تۋىندىسىنا ارقاۋ ەتكەن ەدى. باقساڭىز, الدارىڭىزداعى شىعارما سونىڭ ءبىر بولشەگى عانا.
جالپى, بۋراباي كۋرورتى ءتۇرلى-ءتۇستى كولدەرى بار ايماق سانالادى. ولاردىڭ اراسىندا الەم كوز تىككەن بىرنەشە كول بار. سولاردىڭ ءبىرى – قاتاركول كولى. سۋى ءمولدىر ءارى دالالى ولكەدە اسەم ورمانىمەن ورىلگەن جاعاجايىنىڭ كورىنىسى كورگەن جاندى ارباپ الاتىن عاجايىپقا يە.
سۋرەتشى «قاتاركول» كارتيناسىندا بوياۋدى ءىرى-ءىرى جالپاق كولدەنەڭ ەتىپ جاعۋ ارقىلى كولدىڭ ايدىنىن بەرسە, ءدال سول سۋدىڭ قاسىنا بوياۋدى ۇزىن-ۇزىن ءارى تىك ەتىپ جاعۋ ارقىلى ورماندى بەينەلەگەن. ءپىشىنى ءتورتبۇرىشتى سۋىق جانە جىلى تۇستەرمەن سالىنعان داقتار سۋ بويىنداعى تاستى جاعاجاي اۋماعىن كورسەتىپ تۇر.
كوركەم پەيزاجدا تابيعاتتى ەگجەي-تەگجەيلى اشىپ كورسەتپەي, ءدال سول ساتتە كوزگە ءتۇسىپ تۇرعان نارسەنىڭ جالپى اسەرىن جەتكىزگەن. ول بۇل اسەرگە تۇستەردى ويناتۋ مەن بوياۋلاردى جاعۋدىڭ ەرەكشە فاكتۋراسى ارقىلى قول جەتكىزەدى.