مەملەكەت باسشىسى نۇرسۇلتان نازارباەۆ قحر سىرتقى ىستەر ءمينيسترىنىڭ ورىنباسارى چەن گوپيندى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا ەكىجاقتى ىنتىماقتاستىق ماسەلەلەرى, سونداي-اق, حالىقارالىق كۇن ءتارتىبىنىڭ وزەكتى جايتتارى تالقىلاندى.
نۇرسۇلتان نازارباەۆ قازاقستان مەن قىتاي اراسىنداعى قارىم-قاتىناستاردىڭ ءتيىمدى دامىپ كەلە جاتقانىن, ءبىزدىڭ ەلىمىز ەكونوميكالىق جانە ساياسي سەرىكتەستىكتىڭ ودان ءارى نىعايۋىنا مۇددەلى ەكەنىن اتاپ ءوتتى.
مەملەكەت باسشىسى قحر-دىڭ ازياداعى ءوزارا ءىس-قيمىل جانە سەنىم شارالارى جونىندەگى كەڭەس قىزمەتىنە بەلسەنە قاتىسىپ كەلە جاتقانىنا توقتالدى, سونداي-اق, 2014 جىلى مامىردا شانحايدا وتەتىن اوسشك-ءنىڭ الداعى سامميتىنە دايىندىقتىڭ دەڭگەيى جوعارى ەكەنىن ايتتى.
چەن گوپين ءوز كەزەگىندە نۇرسۇلتان نازارباەۆقا قحر توراعاسى سي ءتسزينپيننىڭ سالەمىن جەتكىزدى جانە قازاقستان پرەزيدەنتىنىڭ قىتايعا الداعى مەملەكەتتىك ساپارىنا دايىندىق بارىسى تۋرالى حابارلادى.
سۋرەتتەردى تۇسىرگەندەر
س.بوندارەنكو, ب.وتارباەۆ.