قىزىلوردا – قازاقستانداعى قۇبىرىنان ىستىق سۋ اقپايتىن بىردەن-ءبىر وبلىس ورتالىعى. كۇلەرسىز, ەرىك وزىڭىزدە. بىراق اڭگىمەنىڭ اقيقاتى وسىنداي. سوندىقتان, قالا تۇرعىندارى ۇيىنە سۋدى ىسىتىپ, ونىڭ تەمپەراتۋراسىن ساقتاپ تۇراتىن «اريستون» دەيتىن زاتتى پايدالانادى. مۇنداي دۇنيە ءاربىر ۇيدە بار. اقمەشىتتە ساۋداسى ءجۇرىپ تۇرعان وسى «اريستون» ەندى از ساتىلاتىن شىعار. سەبەبى, قالاعا ىستىق سۋ كەلە باستادى.
بىلتىر ايماققا اكىم بولىپ تاعايىندالعان كەزىندە قىرىمبەك كوشەرباەۆ قالادا ىستىق سۋدىڭ جوقتىعىنا قايران قالىپ, الداعى ەكى جىلدا اعايىننىڭ اتالعان مۇقتاجدىقتان قۇتىلاتىنىن ايتقان. بىرەۋ سەندى, بىرەۋ سەنبەدى. سەبەبى, حالىق بۇعان دەيىن مۇنداي ۋادەنى ەستىگەن. بىراق سوڭعى 30 جىلدا قۇبىرلارىنان ىستىق سۋ اققان جوق. دەسەك تە, قىرىمبەك ەلەۋ ۇلى سوزىندە تۇردى. بۇگىندە قالانى تولىقتاي ىستىق سۋمەن قامتۋ ءۇشىن تەحنيكالىق-ەكونوميكالىق نەگىزدەمە دايىندالىپ جاتىر. وعان ارنايى 45 ميلليون تەڭگە بولىنگەن. ال قاناتقاقتى جوبا رەتىندە قورقىت اتا كوشەسىندە 40 پاتەرلى ەكى ءۇي ىستىق سۋعا قوسىلدى.
– 25 ميلليون تەڭگە قارجىعا ءبىز ەكى ۇيگە جىلدام جىلۋ الماستىرعىش قوندىرعىسىن ورناتتىق. وسى ارقىلى كوپقاباتتى ءۇيدى ىستىق سۋمەن قامتيمىز. بۇل جەرگە ارنايى قۇرىلعى ورناتىلعان. وزدەرىڭىز بىلەسىزدەر, قىسىم از بولعان ۋاقىتتارى جوعارى قاباتقا سۋ كوتەرىلمەي قالادى. ەندى مۇنداي پروبلەما بولمايدى. ازىرگە سۋدىڭ 1 كۋبى 250 تەڭگە شاماسىندا بولادى دەپ ەسەپتەپ وتىرمىز,– دەيدى قىزىلوردا وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى باسشىسىنىڭ ورىنباسارى اسىلبەك شامەنوۆ.
بۇل ۇلكەن جۇمىستىڭ باسى. الداعى ۋاقىتتا جوعارعى قاباتتارعا سۋ جەتپەي قالۋ, ىستىق سۋدىڭ كەلمەۋى دەگەن سياقتى پروبلەمالاردان قۇتىلاتىن سياقتىمىز. وبلىس ورتالىعىندا 584 كوپ قاباتتى تۇرعىن ءۇي بار. ەندى ەكى جىلدا وسى تۇرعىن ءۇيدىڭ ءبارى ىستىق سۋمەن قامتىلماق.
ەرجان بايتىلەس,
«ەگەمەن قازاقستان».
قىزىلوردا.