نان – توقشىلىق, بارشىلىق بەلگىسى. داستارقاننىڭ تورىندە تۇرعان نان, ءتىپتى, ناننىڭ ءيىسىنىڭ ءوزى ادامنىڭ كوڭىلىن حوش ەتەدى ەمەس پە؟ وسى اپتادا شىم-قالا تۇرعىندارىنىڭ داستارقانى مولشىلىققا, بەرەكەگە كەنەلە ءتۇستى. «اتامەكەن كورپوراتسياسى» جشس-ءنىڭ جەر جىرتىپ, ەگىن ەگىپ, ديىرمەن تارتۋمەن اينالىسىپ كەلە جاتقانىنا كوپ جىلدىڭ ءجۇزى بولدى. ادال ەڭبەكتەرىنىڭ ارقاسىندا ەلدىڭ العىسىنا بولەنگەن بۇل سەرىكتەستىك وسى اپتادا نان زاۋىتىن ىسكە قوسىپ, اس اتاسىنىڭ ءتۇر-ءتۇرىن شىعارۋدى قولعا الدى.
جوبانىڭ قۇنى 2,5 ملن. اقش دوللارىن قۇرايدى جانە 50 جاڭا جۇمىس ورنىن اشۋعا مۇمكىندىك بەرىپ وتىر. زاۋىتتاعى بارلىق قۇرال-جابدىقتار شۆەدتەر ەلىنەن اكەلىنگەن. بۇرىن-سوڭدى وڭتۇستىكتە شەتەلدىڭ مۇنداي وزىق ۇلگىلى جابدىقتارى پايدالانىلماعان. جالپى العاندا, كاسىپورىن تۇتىنۋشىلار ءۇشىن بارلىق جاعدايدى جاساۋدا. شىرايلى قالانى نانمەن قامتاماسىز ەتۋ ءۇشىن 10 «مەرسەدەس سپرينتەر» كولىگى ساقاداي-ساي تۇر. وسى كولىكتەر ارقىلى قالاداعى ازىق-ت ۇلىك ءدۇكەندەرىنىڭ 50-60 پايىزىنا نان جەتكىزىلەدى.
«بۇل نان زاۋىتى تاۋلىگىنە 50 توننا ۇندى قاجەت ەتەدى. ءبىزدىڭ باستى ماقساتىمىزدىڭ ءبىرى – الەۋمەتتىك ناننىڭ باعاسىن تۇراقتى ۇستاپ تۇرۋ. باعانىڭ اسپانداماۋىنا كوپ سەپتىگىمىز تيەدى دەپ ويلايمىن. ويتكەنى, ۇن وزىمىزدەن شىعادى جانە ونىڭ تاسىمالدانۋىنا كوپ اقشا كەتپەيدى. ءدال قازىر ءبىزدىڭ زاۋىتتان كوتەرمە باعامەن ساتىپ الامىن دەگەندەر بولسا, ءار بولكە ناندى 25-28 تەڭگە اراسىندا بەرۋگە دايىنبىز. سودان بولار, كۇن سايىن تاپسىرىستىڭ سانى ارتىپ كەلە جاتىر», دەيدى «اتامەكەن كورپوراتسياسى» جشس-ءنىڭ ديرەكتورى مۇرات تولتەباەۆ.
ال, وڭتۇستىك قازاقستان وبلىسى اكىمىنىڭ ورىنباسارى ساپاربەك تۇياقباەۆ زاۋىتتىڭ زاماناۋي تەحنولوگياسىنا ءتانتى بولعانىن جاسىرا المادى. «زاۋىتتىڭ تاۋلىگىنە 150 مىڭ دانا نان شىعارۋعا ءمۇمكىندىگى بار. وتە قىمبات جابدىقتارمەن جۇمىسىن باستاپ وتىرعان العاشقى كاسىپورىن. بۇل شەتەلدىك جابدىقتاردىڭ ەڭ باستى ەرەكشەلىگى – ەنەرگيانى ۇنەمدەيدى. بۇل, ارينە, شىعىندى ازايتاتىنى انىق. زاۋىت ناندى بارلىق تالاپتارعا ساي شىعارىپ وتىر, ارنايى زەرتحاناسى بار», دەيدى ساپاربەك قۇراقباي ۇلى.
ءبىر سوزبەن ايتقاندا, بارلىق تالاپقا ساي بۇل زاۋىت ءار ۇيگە توقشىلىق, بەرەكە سىيلاي بەرمەك.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.
سۋرەتتەردى تۇسىرگەن ارمان ابدىراش ۇلى.