تاۋەلسىزدىك كۇنى, ياعني 16 جەلتوقساندا تۇركىستان وبلىسىندا 190 ءسابي دۇنيەگە كەلدى. ونىڭ 96-ىسى ۇل بولسا, 94-ءى – قىز بالا. وبلىستىق قوعامدىق دەنساۋلىق باسقارماسىنىڭ حابارلاۋىنشا, بۇگىندە نارەستەلەر مەن انالاردىڭ جاعدايى جاقسى. مەرەكە كۇندەرى كەزەكشى اۋىسىمدا جوعارى بىلىكتى دارىگەرلەر, تاجىريبەلى اكۋشەرلەر مەن مەدبيكەلەر نارەستە مەن اناعا كۇتىم جاساعان.
ەلىمىزدە بالا تۋ كورسەتكىشى بويىنشا كوش باستاپ تۇرعان وبلىستا مەكتەپ قۇرىلىسى قارقىندى جۇرگىزىلۋدە. مىسالى, بيىل باستالعان 78 مەكتەپتىڭ قۇرىلىسىنا مەملەكەت قازىناسىنان 18,2 ملرد تەڭگە قارالدى. ونىڭ ىشىندە 2,3 ملرد تەڭگە «اۋىل – ەل بەسىگى» باعدارلاماسى ارقىلى, 15,9 ملرد تەڭگە وبلىستىق بيۋدجەتتەن بولىنگەن. بۇگىندە 29 مەكتەپتىڭ قۇرىلىسى اياقتالىپ, پايدالانۋعا بەرىلدى. سونىمەن قاتار بيىل 7 سپورت نىسانىنىڭ قۇرىلىس جۇمىستارىن جۇرگىزۋگە 7,4 ملرد تەڭگە قارالدى. ال وڭىردە پايدالانۋعا بەرىلەتىن تۇرعىن ءۇيدىڭ جالپى الاڭى جىلدىق جوسپار بويىنشا 800 مىڭ شارشى مەتردى قۇراماق. بيىل قاڭتار-قاراشا ايلارىندا وبلىستاعى قۇرىلىس جۇمىستارىنىڭ كولەمى 252 ملرد تەڭگە بولدى.
قۇرىلىس قارقىنىنىڭ ءبىر ناتيجەلى كورىنىسى تاۋەلسىزدىكتىڭ 30 جىلدىعى مەرەكەسى قارساڭىندا تۇركىستان قالاسىندا 40 وتباسى باسپانالى بولدى. جەلتوقسان ايىنىڭ سوڭىنا دەيىن باسپانا كەزەگىندە تۇرعاندارعا جالپى 610 پاتەر بەرىلەدى. تۇركىستان قالاسىنىڭ اكىمى نۇربول تۇراشبەكوۆتىڭ مالىمدەۋىنشە, ولاردىڭ بارلىعى – كوپبالالى جانە الەۋمەتتىك جاعىنان ءالسىز توپتاعى وتباسىلار. ونىڭ ىشىندە, كوپبالالى وتباسىنا – 470, ءالسىز توپتاعى وتباسىلارعا 140 پاتەر بەرىلەدى. سونداي-اق وبلىس ورتالىعىنداعى 14 كوپقاباتتى تۇرعىن ءۇيدىڭ 763 پاتەرى «وتباسى بانك» اق ارقىلى جانە كوپقاباتتى 3 تۇرعىن ءۇيدىڭ 151 پاتەرى «7-20-25» باعدارلاماسى ارقىلى نەسيە جۇيەسىمەن ساتىلىمعا قويىلدى. بۇگىندە مۇندا بيۋدجەت ەسەبىنەن 7, 9 جانە 12 قاباتتى 67 تۇرعىن ءۇيدىڭ قۇرىلىسى جۇرۋدە. سونىمەن بىرگە جاڭا ۇيلەردىڭ اۋلالارى اباتتاندىرىلىپ, بالالار الاڭقايلارى سالىنۋدا.
تۇركىستان وبلىسى