وتكەن جىلدىڭ سوڭىندا ۇلتتىق ادەبيەتتانۋ عىلىمىندا ۇلكەن ءىز قالدىرعان كورنەكتى عالىم, سىنشى, اۋدارماشى ايقىن نۇرقاتوۆتىڭ تۋعانىنا 85 جىل تولعان ەدى. نەبارى 37 جىل عانا عۇمىر كەشكەن قالامگەر از ۋاقىت ىشىندە تىندىرىمدى جۇمىس ىستەپ, ىرگەلى زەرتتەۋلەرىندە ءسوز ونەرىنىڭ كوكەيكەستى ماسەلەلەرىن, ادەبي ءۇردىس پەن ادەبيەتتەر بايلانىسىن جان-جاقتى قاراستىردى, اباي, م.اۋەزوۆ, س.مۇقانوۆ, ع.مۇسىرەپوۆ, ع.مۇستافين, ي.بايزاقوۆ, ح.ەرعاليەۆ, ءا.تاجىباەۆ, ۆ.ماياكوۆسكي, ت.جاروكوۆ, ع.ورمانوۆ, ت.ب. شىعارمالارىن سان قىرىنان تالدادى, ءبىر عانا «ابايدىڭ اقىندىق ءداستۇرى» مونوگرافياسى ارقىلى ابايتانۋ عىلىمىنا تىڭ وزگەرىس اكەلدى.
نۇرقاتوۆ زەرتتەۋلەرىنە لوگيكالىق وي جۇيەلىلىگى, پىكىر ايقىندىعى, تۇجىرىمنىڭ دايەكتىلىگى ءتان بولىپ, ەڭبەكتەرىندە قوعامدىق وي-پىكىر مەن كوركەمدىك ەستەتيكا قيىسا ۇشتاسقاندىعىن جاقىندا عانا وسى ەلەۋلى وقيعاعا بايلانىستى ا.نۇرقاتوۆ قىزمەت اتقارعان الماتىداعى م.اۋەزوۆ اتىنداعى ادەبيەت جانە ونەر ينستيتۋتىندا وتكەن «ايقىن نۇرقاتوۆ الەمى» اتتى رەسپۋبليكالىق عىلىمي كونفەرەنتسيادا باياندامالار جاساپ, ءسوز سويلەگەن عالىمدار مەن جازۋشىلار كەڭىنەن اڭگىمەلەدى. القالى جيىندى اشىپ جۇرگىزگەن ينستيتۋت ديرەكتورى, ۇعا كوررەسپوندەنت-مۇشەسى ءۋاليحان قاليجانوۆ وسىعان ورايلاستىرا جارىق كورگەن ا.نۇرقاتوۆ ەڭبەكتەرىنىڭ بەس تومدىعىن قاۋىمعا تانىستىرىپ, وسى باسىلىمدى دايىنداپ شىعارۋداعى پروفەسسور سەرىك نەگيموۆتىڭ سىڭىرگەن ەڭبەگىن ەرەكشە اتاپ ءوتتى.
كونفەرەنتسيادا نەگىزگى بايانداما جاساعان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى سەرىك نەگيموۆ, عالىمنىڭ ابايتانۋشىلىق جانە اۋەزوۆتانۋشىلىق قىرلارىنا جەكە توقتالعان ينستيتۋتتىڭ ابايتانۋ جانە جاڭا ءداۋىر ادەبيەتى ءبولىمىنىڭ مەڭگەرۋشىسى سەرىكقازى قوراباي مەن اۋەزوۆتانۋ ءبولىمىنىڭ اعا عىلىمي قىزمەتكەرى كەلىس راحىمجانوۆ, قالامگەردىڭ تالانت قىرلارىن ءسوز ەتكەن اكادەميك ومىرزاق ايتباي ۇلى, مەملەكەتتىك سىيلىقتىڭ لاۋرەاتى, جازۋشى ءسابيت دوسانوۆ, پروفەسسورلار, اقىن وتەگەن كۇمىسباەۆ پەن تەمىرحان تەبەگەنوۆ, «انا ءتىلى» باسپاسىنىڭ ديرەكتورى, جازۋشى جاقاۋ داۋرەنبەكوۆ ا.نۇرقاتوۆتىڭ ۇلت مادەنيەتىندەگى ورنىن, باعا جەتپەس عىلىمي ۇلەسىن جان-جاقتى سارالاپ بەردى. ءوز كەزەگىندە عالىممەن اباي اتىنداعى قازپي-دە بىرگە وقىعان ساباقتاستارى, بەلگىلى ءتىلشى-عالىم, فيلولوگيا عىلىمدارىنىڭ دوكتورى, پروفەسسور تەلقوجا جانۇزاقوۆ, اقىندار مىڭباي ءراش پەن قالامداس ءىنىسى سەيفوللا وسپان تەبىرەنىستى ەستەلىكتەر ايتتى. عيبراتتى جيىن سوڭىندا عالىم تۋىستارى مەن ۇرپاقتارى ا.نۇرقاتوۆ رۋحىنا باعىشتاپ اس بەردى.
قورعانبەك امانجول,
«ەگەمەن قازاقستان».
الماتى.
سۋرەتتى تۇسىرگەن يۋري بەككەر.