ءۇندىستان استاناسى نيۋ-دەليدە ءۇندىستان سىرتقى ىستەر ءمينيسترى سۋبرامانيام دجايشانكاردىڭ شاقىرۋىمەن قازاقستان پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى «ورتالىق ازيا - ءۇندىستان» ديالوگى Cىرتقى ىستەر مينيسترلەرىنىڭ 3-ءشى كەزدەسۋىنە قاتىستى, دەپ حابارلايدى Egemen.kz.
ءىس-شاراعا تۇرىكمەنستان مينيسترلەر كابينەتى توراعاسىنىڭ ورىنباسارى – سىرتقى ىستەر ءمينيسترى راشيد مەرەدوۆ, قىرعىز رەسپۋبليكاسىنىڭ سىرتقى ىستەر ءمينيسترى رۋسلان كازاكباەۆ, تاجىكستان رەسپۋبليكاسىنىڭ سىرتقى ىستەر ءمينيسترى سيروجيددين مۋحريددين, سونداي-اق وزبەكستان رەسپۋبليكاسىنىڭ سىرتقى ىستەر ءمينيسترى ابدۋلازيز كاميلوۆ قاتىستى.
كەزدەسۋ بارىسىندا سىرتقى ىستەر مينيسترلەرى كوپجاقتى ىنتىماقتاستىقتىڭ پەرسپەكتيۆالىق باعىتتارىن جانە ەكونوميكالىق ءوزارا ءىس-قيمىلدىڭ تيىمدىلىگىن ارتتىرۋ, ونىڭ ىشىندە ءوزارا ساۋدا, ينۆەستيتسيا, ونەركاسىپ جانە ۇندىستانمەن كولىك بايلانىسىن نىعايتۋ ماسەلەلەرىن تالقىلادى.
قاتىسۋشىلار زاماناۋي سىن-قاتەرلەر مەن قاۋىپ-قاتەرلەرگە بىرلەسىپ ارەكەت ەتۋدىڭ ماڭىزدىلىعىن اتاپ ءوتتى. ايماقتاعى ەكولوگيالىق پروبلەمالاردى شەشۋ, ترانسۇلتتىق قاتەرلەردىڭ الدىن الۋ, سونداي-اق مادەني الماسۋدى نىعايتۋ جولدارىن تالدادى. ورتالىق ازيا وڭىرىندەگى بىرلەسكەن جوبالاردى جۇزەگە اسىرۋعا ەرەكشە نازار اۋدارىلىپ, ديالوگتىڭ باسىم باعىتتارى بەلگىلەندى.
قازاقستان دەلەگاتسياسىنىڭ باسشىسى ءوز سوزىندە ەلدەر اراسىنداعى ءوزارا ءىس-قيمىلدى نىعايتۋدىڭ ماڭىزدىلىعىن اتاپ, وسى فورۋمنىڭ ينستيتۋتسيونالدىق تەتىكتەرىن جەتىلدىرۋ, وڭىرارالىق ساۋدانى ءارتاراپتاندىرۋ, ترانزيتتىك باعىتتار مەن جاسىل ەنەرگەتيكانى دامىتۋ, سونداي-اق قارجى تەحنولوگياسى, تسيفرلاندىرۋ جانە IT يندۋسترياسى سياقتى باعىتتار بويىنشا وڭىرلىك ءوزارا ءىس-قيمىلدى كەڭەيتۋدىڭ ماڭىزدىلىعىن اتاپ ءوتتى.
فورۋمنىڭ قورىتىندىسى بويىنشا «ورتالىق ازيا - ءۇندىستان» ديالوگى سىرتقى ىستەر مينيسترلەرىنىڭ بىرلەسكەن مالىمدەمەسى قابىلداندى.
سول كۇنى قازاقستاننىڭ ءسىم باسشىسى ءۇندى ارىپتەسى س.دجايشانكارمەن ەكىجاقتى كەلىسسوزدەر جۇرگىزىپ, تاراپتار ەكىجاقتى جانە وڭىرلىك كۇن تارتىبىندەگى ماسەلەلەردى, سونداي-اق ەلدەر اراسىنداعى ستراتەگيالىق ارىپتەستىكتى ودان ءارى تەرەڭدەتۋ جولدارىن, ونىڭ ىشىندە الداعى جوعارى جانە اسا جوعارى دەڭگەيدەگى ءىس-شارالار ماسەلەلەرىن تالقىلادى.
سونداي-اق, ورتالىق ازيا ەلدەرىنىڭ سىرتقى ساياسي ۆەدومستۆولارى باسشىلارىنىڭ ءۇندىستان پرەمەر-ءمينيسترى نارەندرا موديمەن ۇجىمدىق كەزدەسۋى وتەدى دەپ كۇتىلۋدە.