اسقار مامين قازاقستان-باشقۇرتستان ىسكەرلىك فورۋمىنا قاتىستى

تاراپتار قازاقستان-رەسەي ستراتەگيالىق سەرىكتەستىگىن ودان ءارى تەرەڭدەتۋ تۇرعىسىنان ءوزارا ءىس-قيمىلدىڭ قازىرگى جاي-كۇيى مەن پەرسپەكتيۆالارىن تالقىلادى.

ۇكىمەت باسشىسى قازاقستاننىڭ باشقۇرتستانمەن ساۋدا-ەكونوميكا, ينۆەستيتسيا, كولىك-لوگيستيكا, ەنەرگەتيكا, اوك, ونەركاسىپتىك كووپەراتسيا جانە باسقا دا سالالارداعى ىنتىماقتاستىعىن ارتتىرۋ ءۇشىن ەلەۋلى الەۋەتتىڭ بار ەكەنىن اتاپ ءوتتى.

وسى جىلدىڭ 10 ايىنىڭ قورىتىندىسى بويىنشا قر مەن رف اراسىنداعى ساۋدا كولەمى 30%-عا ارتىپ, $19,5 ملرد-قا جەتتى. بۇل رەتتە ساۋدا قۇرىلىمىن ءارتاراپتاندىرۋدا ىلگەرىلەۋشىلىك بايقالادى — قازاقستاننىڭ ەكسپورت كولەمى 39,4%-عا, ونىڭ ىشىندە وڭدەلگەن ءونىم كولەمى 47,7%-عا ءوستى.

بيىلعى قاڭتار-قازان ايلارىندا قازاقستان مەن باشقۇرتستان اراسىنداعى تاۋار اينالىمىنىڭ كولەمى وتكەن جىلدىڭ سايكەس كەزەڭىمەن سالىستىرعاندا 32,1%-عا ءوسىپ, $305 ملن قۇرادى. بۇل كورسەتكىش پاندەمياعا دەيىنگى دەڭگەيدەن 10,3%-عا جوعارى. الداعى جىلدارى تاراپتار تاۋار اينالىمىن $1 ملرد دەيىن جەتكىزۋگە نيەتتى.

ا. مامين مەن ر. حابيروۆ ۋفا قالاسىندا ءوتىپ جاتقان «حالىقارالىق بيزنەس اپتالىعى-2021» اياسىندا «قازاقستان – باشقۇرتستان» ىسكەرلىك فورۋمىنا قاتىستى. فورۋمدا 100-گە جۋىق ادام — مەملەكەتتىك ورگانداردىڭ, وڭىرلەردىڭ باسشىلارى, سونداي-اق ەكى رەسپۋبليكانىڭ ىسكەر توپتارىنىڭ وكىلدەرى باس قوستى.

«باشقۇرتستان رەسپۋبليكاسى قازاقستان مەن رەسەيدىڭ ستراتەگيالىق سەرىكتەستىگىندە ەرەكشە ورىن الادى. بيىلعى قىركۇيەك ايىنىڭ سوڭىندا رادي حابيروۆتىڭ قر-عا ساپارىنىڭ قورىتىندىسى بويىنشا بەكىتىلگەن قازاقستان مەن باشقۇرتستان اراسىنداعى ەكىجاقتى ىنتىماقتاستىقتى دامىتۋ جونىندەگى 2022-2024 جىلدارعا ارنالعان جول كارتاسى ساۋدا-ەكونوميكالىق جانە ينۆەستيتسيالىق ءوزارا ءىس-قيمىلدى ارتتىرۋدىڭ سەنىمدى تەتىگىنە, سونداي-اق بيزنەس-توپتار ءۇشىن بىرقاتار پەرسپەكتيۆالى سالالاردا قالىپتاساتىن مۇمكىندىكتەردىڭ تەرەڭدىگى مەن ۇزاق مەرزىمدىلىگىنىڭ بەلگىسىنە اينالۋدا»,  دەدى ا. مامين فورۋمدا سويلەگەن سوزىندە.

سونداي-اق باشقۇرتستان رەسپۋبليكاسىنىڭ پرەمەر-ءمينيسترىنىڭ ءبىرىنشى ورىنباسارى – ەكونوميكالىق دامۋ جانە ينۆەستيتسيالىق ساياسات ءمينيسترى ر. مۋراتوۆ, قازاقستان رەسپۋبليكاسىنىڭ ساۋدا جانە ينتەگراتسيا ءمينيسترى باقىت سۇلتانوۆ, قر جانە بر ءىرى بيزنەس وكىلدەرى بايانداما جاسادى.

فورۋم اياسىندا حيميا جانە توقىما ونەركاسىبى, ماشينا جاساۋ, اوك, سونداي-اق مۇناي-گاز سالاسىنداعى كونسالتينگتىك قىزمەتتەر سالالارىندا 8 ينۆەستيتسيالىق جانە كوممەرتسيالىق كەلىسىمشارتقا قول قويىلدى.

اسا ماڭىزدى قۇجاتتاردىڭ ءبىرى «كاۋستيك» اق مەن «باشقۇرت سودا كومپانياسى» اق اراسىندا بىرلەسكەن كاسىپورىن قۇرۋ تۋرالى قول قويىلعان كەلىسىم بولدى. بك شەڭبەرىندە قازاقستان مەن رەسەي اۋماعىندا جالپى كولەمى $1 ملرد دەيىنگى جوبالار ىسكە اسىرىلاتىن بولادى. كاۋستيكالىق سودا, ناتري گيپوحلوريتى, حلور, تۇز قىشقىلى, تيتان قوستوتىعى جانە باسقا دا حيميالىق ونىمدەر ءوندىرىسى قامتاماسىز ەتىلەدى. سونىمەن قاتار تمد-داعى جالعىز تسيركوني وكسيحلوريدىنىڭ ءوندىرىسى جولعا قويىلادى.

ۇكىمەت باسشىسى ۋفا قالاسىنا ساپارى بارىسىندا سالاۆات يۋلاەۆتىڭ ەسكەرتكىشىنە گۇل شوقتارىن قويىپ, باشقۇرتستانداعى جوبالىق باسقارۋ جانە الەۋمەتتىك مونيتورينگ تاجىريبەسىمەن تانىستى, سونداي-اق تەلەكوپىر رەجيمىندە باشقۇرتستان رەسپۋبليكاسىنىڭ جوعارى وقۋ ورىندارىندا ءبىلىم الىپ جۇرگەن قازاقستاندىق ستۋدەنتتەرمەن اڭگىمەلەستى.

جۇمىس ساپارىنا ساۋدا جانە ينتەگراتسيا ءمينيسترى باقىت سۇلتانوۆ, ەنەرگەتيكا ءمينيسترى ماعزۇم مىرزاعاليەۆ, ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ, اقتوبە وبلىسىنىڭ اكىمى وڭداسىن ورازالين, باتىس قازاقستان وبلىسىنىڭ اكىمى عالي ەسقاليەۆ, ىسكەر توپتار وكىلدەرى جانە ت. ب. قاتىستى.