ەلباسىنىڭ قازاقستان حالقىنا جولداۋىندا ەلىمىزدى الدىڭعى قاتارلى دامىعان ەڭسەلى ەلدەردىڭ قاتارىنا ەنگىزۋ ماقساتى انىق قويىلىپ وتىر. وسىنداي جوعارى ماقساتتى جۇزەگە اسىرۋدا مەملەكەت پەن مەملەكەتتىك قىزمەتشىلەردىڭ, ونىڭ ىشىندە قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسى ۇجىمى ۇلكەن ۇلەس قوساتىنى ءسوزسىز. اكادەميا ەلىمىزدە مەملەكەتتىك قىزمەتشىلەردى دايىنداۋدا جاقسى جەتىستىكتەرگە قول جەتكىزگەن ەڭسەلى وقۋ ورىندارىنىڭ ءبىرى. اكادەميا ۇجىمىنىڭ بارلىق قۇرىلىمدارىنىڭ مۇشەلەرى ەلباسىنىڭ جولداۋىنا ۇندەستىك تانىتتى. ۇجىمدا قىزۋ جانە جان-جاقتى تالقىلاۋ بارىسىندا جولداۋدى جۇزەگە اسىرۋعا مۇمكىندىك بەرەتىن باستى باعىتتار ايقىندالدى.
وتپەلى كەزەڭدى باسىنان كەشىپ وتىرعان جاعدايدا قالىڭ بۇقارانى الداعى مىندەتتەردى ورىنداۋعا جۇمىلدىرۋ قاشاندا مەملەكەتتىك بيلىكتىڭ ءىسى بولىپ كەلگەن. ال بيلىك ارقاشان مەملەكەتتىك قىزمەتشىلەر ارقىلى جۇزەگە اسىرىلاتىنىن ەسكە الساق, وندا وسى مىندەتتەردى اتقارۋدا اكادەميانىڭ ءرولى جوعارى. ەندەشە, باستى ماقساتتاردىڭ ءبىرى رەتىندە ءوزىنىڭ ەرەكشە دارەجەسىنە ساي اكادەميا مەملەكەتتىك قىزمەتكەرلەردىڭ كاسىبيلىك قۇزىرەتتىلىكتەرىن قالىپتاستىرۋمەن قاتار, ونەگەلىلىگىن, مادەنيەتىن, ادامگەرشىلىك بەينەسىن جەتىلدىرۋدى جۇزەگە اسىرۋى ءتيىس. سەبەبى, ەلباسىمىز العا قويعان شوقتىعى بيىك تالاپتاردى تۇلعاسى, ازاماتتىعى مەن جوعارى ونەگەلىلىگى شىڭدالعان مەملەكەتتىك قىزمەتشى عانا ورىنداي الادى.
قازاقستان قوعامىنىڭ الدىندا تۇرعان الەۋمەتتىك, ساياسي, ەكونوميكالىق وزگەرۋلەر مەملەكەتتىك قىزمەتشىلەردىڭ زياتكەرلىك, شىعارماشىلىق, كاسىبي الەۋەتىن جۇمىلدىرۋدى, ولاردىڭ مادەني, رۋحاني ادامگەرشىلىك دەڭگەيلەرىن جەتىلدىرۋدى قاجەت ەتەدى. مەملەكەتتىك قىزمەتتىڭ جەكە الەۋمەتتىك ينستيتۋت بولىپ قالىپتاسۋىندا مەملەكەتتىك ۇيىمدى باسقارۋدىڭ ارتىقشىلىقتارى ورىن الۋى كەرەك. مەملەكەتتىك قىزمەت الەۋمەتتىك ينستيتۋت رەتىندە وزىنە ءتان قۇندىلىقتاردى قالىپتاستىرادى جانە ولاردى پايدالانۋ ارقىلى ءوز قىزمەتتەرىن ناقتى جانە جان-جاقتى اتقارادى. قازاقستاندىق مەملەكەتتىك قىزمەتتى بەكىتۋدىڭ ماڭىزدى فاكتورلارىنىڭ ءبىرى رەتىندە مەملەكەتتىك قىزمەتشىلەردىڭ موتيۆاتسيالىق الەۋەتىن اتاۋعا بولادى. مەملەكەتتىك قىزمەت سۋبەكتىلەرىنىڭ وي-سانالارىن ولاردىڭ بويىندا وتانعا شىنايى قىزمەت ءداستۇرلەرى مەن الەۋمەتتىك پراكتيكانىڭ سۇرانىمدارىنا ساي ادامگەرشىلىك نورمالار, ۇستانىمدار جانە قۇندىلىقتارمەن تولىقتىرۋ اسا ماڭىزدى مىندەت.
سوندىقتان, مەملەكەتتىك قىزمەت جۇيەسى مەن مەملەكەتتىك قىزمەتشىلەردىڭ مادەنيەتىن دامىتۋدىڭ باعىتتارى مەن جولدارىن قاراستىرۋىمىز قاجەت. مەملەكەتتىك قىزمەتشىلەردىڭ جاڭا ۇرپاعىن قالىپتاستىرۋ ىسىندە قۇقىقتىق نورمالاردى مۇلتىكسىز ورىنداۋ, ادامگەرشىلىك, مورالدىق جانە جەكە باس مادەنيەتىنىڭ ءرولى جوعارى. قازاقستان حالقىنا ارنالعان «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىندا قازاقستان رەسپۋبليكاسىنىڭ پرەزيدەنتى ن.ءا. نازارباەۆ وسى ماسەلەگە جالپىقازاقستاندىق مادەنيەتتىڭ ءمانى ورايىندا ايرىقشا كوڭىل ءبولدى. قازىرگى مادەني كلاستەرلەردىڭ ءبىرى مەملەكەتتىك قىزمەت پەن مەملەكەتتىك قىزمەتشىلەردىڭ اكسيولوگيالىق مازمۇندارىن جانە الەۋمەتتىك-مادەني, ادامگەرشىلىك باعدارلارىن دامىتۋعا ارنالۋى كەرەك. قازاقستان رەسپۋبليكاسى مەملەكەتتىك قىزمەتىنىڭ جاڭا مودەلىن جۇزەگە اسىرۋ جولىندا مادەني قۇندىلىقتاردىڭ تامىرلانۋىنا قاجەتتى جاعدايلار جاساۋمەن قاتار, مەملەكەتتىك قىزمەتشى تۇلعاسىنىڭ رۋحاني-ادامگەرشىلىكتىك الەۋەتىن دامىتۋدى قولعا الۋ قاجەت. وسى ورايدا «قازاقستان رەسپۋبليكاسى مەملەكەتتىك قىزمەتشىلەردىڭ ار-نامىس كودەكسىندە» جازىلعان تالاپتاردى بۇلجىتپاي جانە تولىق ورىنداۋ ماڭىزدى. تەك سوندا عانا مەملەكەتتىك ورگانداردىڭ جەتەكشىلەرى مەن مەملەكەتتىك قىزمەتشىلەردىڭ كودەكستىڭ تالاپتارىن ورىنداماۋ, وعان نيگيليستىك تۇرعىدان قاراۋ, جۇمىس بارىسىندا دورەكى, اۆتوريتارلىق قۇرالداردى عانا پايدالانۋ سياقتى مەملەكەتتىك بيلىكتىڭ تيىمدىلىگىنە كەدەرگى كەلتىرەتىن جايتتەردىڭ الدىن الۋعا بولادى.
ەلتاي شاحانوۆ,
پرەزيدەنت جانىنداعى مەملەكەتتىك باسقارۋ اكادەمياسىنىڭ دوتسەنتى,
فيلوسوفيا عىلىمدارىنىڭ كانديداتى.