1992 جىلعى 29 قاراشاداعى قازاقستان رەسپۋبليكاسى اۋماعىندا ورنالاسقان سىناق پوليگوندارىن قولدانۋ تۋرالى قازاقستان رەسپۋبليكاسى مەن رەسەي فەدەراتسياسى اراسىنداعى كەلىسىمدى ىسكە اسىرۋ شەڭبەرىندە 2013 جىلى ەكى ەل قورعانىس مينيسترلىكتەرى اراسىندا 2014 جىلى سىناق جۇمىستارىن جۇرگىزۋ جوسپارىنا قول قويىلعان بولاتىن.
جوسپارعا سايكەس ناۋرىز ايىندا ءۇش سىناق زىمىرانىن جىبەرۋدى جۇرگىزۋ جوسپارلانعان ەدى. قازاقستان رەسپۋبليكاسىنىڭ قورعانىس مينيسترلىگى 2014 جىلعى 19 اقپاندا سىناق جۇرگىزۋ تۋرالى ءوتىنىم الدى. وتىنىمگە 28 اقپاندا كەلىسىم بەرىلدى. قازاقستان رەسپۋبليكاسىنىڭ قورعانىس مينيسترلىگى بەلگىلەنگەن تارتىپپەن ءتيىستى مەملەكەتتىك جانە جەرگىلىكتى ورگانداردى حاباردار ەتتى.
«توپول-ە» بالليستيكالىق زىمىرانىن سىناۋ 5 ناۋرىز كۇنى استانا ۋاقىتىمەن ساعات 00.10-دا جۇرگىزىلدى. سىناق شتاتتى رەجىمدە ءوتتى. ونىڭ ناتيجەلەرى قازاقستان رەسپۋبليكاسى مەن رەسەي فەدەراتسياسى قارۋلى كۇشتەرىنىڭ مۇددەسىنە ساي تالدانىپ, ساراپتالدى, دەپ حابارلادى قازاقستان رەسپۋبليكاسى قورعانىس مينيسترلىگىنىڭ ءباسپاسوز قىزمەتى.