وسىدان ءبىر اي بۇرىن قىزىلوردادا «پوليتسيا قىزمەتكەرى جوعالىپ كەتىپتى» دەگەن اڭگىمە جەلدەي ەستى. ەل ىشىندەگى اڭگىمە راس ەكەن. جوعالعان جىگىت نۇربەك شومەنوۆ دەگەن قۇقىق قورعاۋ ورگانىنىڭ قىزمەتكەرى بولىپ شىقتى. بىراق ونىڭ نە ءولى, نە ءتىرى ەكەنى بەلگىسىز. ءىز-ءتۇزسىز جوعالىپ كەتكەن. ال كولىگى ورتەنىپ كەتكەن جەرىنەن تابىلعان. كۇدىكتى بار. ول ونىڭ بۇرىنعى باستىعى كورىنەدى. تەكسەرۋ-تەرگەۋ امالدارى ءجۇرىپ جاتقاندىقتان, اقپاراتتى جۇرتقا جاريا ەتۋگە بولمايدى. ونىڭ ۇستىنە, جوعالىپ كەتكەن نۇربەك شومەنوۆتىڭ ءتىرى ەكەنىنە ءۇمىت باسىم-تىن.
كەيىننەن كامەلەتكە تولماعاندار ءىسى جونىندەگى ءبولىمنىڭ بۇرىنعى باسشىسى بەرىك شيمانوۆتىڭ وسى ىسكە بايلانىستى قۇرىقتالعانىنان حاباردار بولدىق. شومەنوۆ اتالعان بولىمدە ينسپەكتور بولىپ ىستەگەن. الگى شيمانوۆتىڭ جۇمىستان شىعىپ كەتۋىنە نۇربەكتىڭ تىكەلەي قاتىسى بولعان. وتكەن جىلعى تاۋەلسىزدىك مەرەكەسىنە وراي پوليتسيا قىزمەتكەرلەرىنە سىياقى تاعايىندالادى. ماسەلە وسى جەردە تۋىنداعان. باستىعى نۇربەككە بولىنگەن سىياقىنىڭ تەڭ جارتىسىن وزىنە بەرۋدى تالاپ ەتەدى. ال شومەنوۆ وعان كەلىسپەيدى. اناۋ قوقان-لوقى جاسايدى. جاس جىگىت وعان دا يلىكپەيدى. اقىرى بولماعان سوڭ جوعارى جاققا ارىز تۇسىرەدى. ناتيجەسىندە, ءبولىم باستىعىنىڭ قىلمىسى اشكەرەلەنىپ, قىزمەتتەن قۋىلادى. وسى ءبىر جاعداي جاس پوليتسيا قىزمەتكەرىنىڭ جوعالۋىنا سەبەپ بولىپتى.
قاي قىلمىسكەر ءوز ارەكەتىن مويىنداي قويسىن؟ ءبولىم باستىعى دا مويىندامايدى. ونىڭ ۇستىنە, ناقتى دالەل جوق. تەك بولجام عانا. ءبىر اي بويىنا الگى قىلمىسىن مويىنداماي وتىردى. بۇل كەزدە ەلدىڭ نازارى باسقا جاققا اۋىپ, جۇرت اراسىنداعى جوعالعان پوليتسيا تۋرالى ءسوز دە تىيىلعان. دەسەك تە, قۇقىق قورعاۋشىلاردىڭ تىڭعىلىقتى تەكسەرۋ-تەرگەۋ امالدارىنىڭ ارقاسىندا قىلمىسكەر ءوز ءىسىن مويىندادى. ءتىپتى, جاس جىگىتتىڭ ءمايىتى قايدا جاتقانىنا دەيىن ايتىپ بەرىپتى. نۇربەك شومەنوۆتىڭ ءولى دەنەسى قالا شەتىندە كومىپ تاستاعان جەرىنەن تابىلدى. بۇرناعى كۇنى جەر قوينىنا بەرىلدى.
پوليتسيا پوليتسيانى ءولتىرىپ جاتىر. جاقسىلىق ەمەس, ارينە. قاراپايىم حالىقتىڭ قۇقىن قورعايدى دەگەن ادامدار ءبىر-ءبىرىن جەر جاستاندىرىپ جاتسا, نەسى جاقسىلىق بولسىن؟! قىلمىس اشىلدى. كىنالى جازاسىن الار. بىراق ودان قارا جامىلعان وتباسىنىڭ قايعىسى جەڭىلدەمەيدى عوي...
ەرجان بايتىلەس,
«ەگەمەن قازاقستان».
قىزىلوردا وبلىسى.