استانادا ءوتىپ جاتقان ەۋرازيالىق ەكونوميكالىق كوميسسيا كەڭەسى وتىرىسىنىڭ بۇگىن سوڭعى كۇنى. كەڭەس جۇمىسى بۇرناعى كۇنى باستالعان بولاتىن. وعان قازاقستان تاراپىنان پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ قاتىسۋدا.
«كەڭەسىپ پىشكەن تون كەلتە بولماس» دەگەندەي, ءۇش كۇنگە ۇلاسقان كەڭەس وتىرىسىندا نەگىزىنەن ەۋرازيا ەكونوميكالىق وداعىن قۇرۋ تۋرالى كەلىسىمشارت جوباسى تالقىلانۋدا. بۇل جونىندە كەشە جۋرناليستەرمەن وتكىزگەن بريفينگتە باقىتجان ساعىنتاەۆ مالىمدەدى.
«بۇگىنگى تاڭدا ءبىز ەۋرازيا ەكونوميكالىق وداعى تۋرالى كەلىسىمشارتتىڭ نەگىزگى باعىتتارى بويىنشا كەزەڭدىك جانە ءوزارا ءتيىمدى ەكونوميكالىق ىنتىماقتاستىق نەگىزىندە ينتەگراتسيالىق پروتسەستەردى دامىتۋ قاجەتتىگى تۋرالى جالپى تۇسىنىك بار دەپ ايتا الامىز», دەدى ب.ساعىنتاەۆ.
پرەمەر-ءمينيستردىڭ ءبىرىنشى ورىنباسارى سونداي-اق, مۇندا جالپى العاندا ينستيتۋتتىق جانە فۋنكتسيالىق باعىتتار قارالىپ جاتقانىنا توقتالدى. نەگىزگى كوپ ۇسىنىس ايتىلىپ, كوپ تالقىلاۋعا تۇسكەنى قازىرگى فۋنكتسيالىق جاعداي بولىپ وتىر, دەي كەلە, وتىرىستىڭ قاتىسۋشىلارى كەلىسىمشارتتىڭ فۋنكتسيالىق بولىگى, ياعني ساۋدا ساياساتى تۋرالى ەرەجە, سالىق ساياساتى, قارجى سەكتورى, اگروونەركاسىپتىك كەشەن, ونەركاسىپتىك ساياسات تۋرالى ماسەلەلەر جان-جاقتى تالقىلاعانىن اتاپ ءوتتى.
«ساراپشىلار اراسىندا كەلىسپەۋشىلىك تۋدىرعان ساۋالداردى كەڭەس دەڭگەيىندە تالقىلاي باستادىق», دەپ تولىقتىردى ب.ساعىنتاەۆ.
كەڭەستە قامتىلعان تاعى ءبىر ءماسەلە – ارمەنيانىڭ كەدەن وداعى مەن ەۋرازيالىق ەكونوميكالىق كەڭىستىككە كىرۋ جونىندەگى جەلتوقسان ايىندا جاسالعان جول كارتاسى بولىپ وتىرعانىن دا ايتىپ ءوتتى. بۇگىنگى كۇنى سول جول كارتاسىنىڭ ەلۋ پايىزى ارمەنيا تاراپىنان ورىندالعان. ال ولار وزدەرىنە العان مىندەتتەرىن بيىلعى جىلدىڭ مامىر ايىنا دەيىن ورىندايمىز دەگەن ۇسىنىس ايتىپ وتىر, دەيدى ب.ساعىنتاەۆ. ايتىپ وتسەك, بۇل كەڭەسكە كەدەن وداعىنداعى ۇشتىك ەلمەن قاتار ارمەنيا وكىلدەرى دە قاتىسىپ جاتقان بولاتىن.
دينارا بىتىكوۆا,
«ەگەمەن قازاقستان».