قىرعىزستاننىڭ اۋىل شارۋاشىلىعى مينيسترلىگىنىڭ «جايىلىم تۋرالى» زاڭ مەن جەر كودەكسىنە وزگەرىستەر مەن تولىقتىرۋ ەنگىزۋ تۋرالى ۇسىنىسى پارلامەنتتە قارالىپ جاتىر. بۇل تۋرالى «جوگوركۋ كەنەش» وتىرىسىندا ۆەدومستۆو باسشىسىنىڭ ورىنباسارى نۇرلان شەرىپوۆ ءمالىم ەتتى, دەپ جازادى Egemen.kz.
«قىرعىزستان ازاماتتارىنا قۇنارسىز جەرلەردى دامىتۋ ماقساتىندا 20 جىلعا جالعا بەرگىمىز كەلەدى. ەلىمىزدە بارلىعى 9,5 ميلليون گەكتارعا جۋىق جايىلىم بار», دەدى نۇرلان شەرىپوۆ.
ال دەپۋتات يرينا كارامۋشكينا ەلدەگى جايىلىم جەرلەرىن بۇرىنعى بيلىككە جاقىن ادامدار يەلەنىپ العانىن ايتتى. ونىڭ ايتۋىنشا, ولاردىڭ كەيبىرەۋلەرىندە جۇزدەگەن گەكتار جەر بار.
«ۋاكىلەتتى مەملەكەتتىك ورگانداردان مەنشىگىندە جەر تەلىمدەرى بار مەملەكەتتىك قىزمەتكەرلەردىڭ ءتىزىمىن جاريالاۋدى سۇرايمىن. حالىق جەرگە كىمدەردىڭ يەلىك ەتىپ وتىرعانىن جانە وندا كىم جۇمىس ىستەيتىنىن ءبىلۋى كەرەك», دەدى يرينا كارامۋشكينا.