شاردارادا جانارماي بەكەتىنە شابۋىل جاسالدى

رەسمي مالىمەتكە سايكەس, شاردارا اۋدانىندا ورنالاسقان جانار-جاعارماي ستانتسياسىنا تۇندە Daewoo Nexia كولىگى كەلگەن. ىشىنەن مەديتسينالىق بەتپەردە كيگەن ءۇش ادام قارۋ ۇستاپ تۇسكەن. ال جانار-جاعارماي ستانتسياسىندا ەكى ادام عانا بولعان. بىرەۋى – كاسسير, ەكىنشىسى – قاراپايىم جۇمىسكەر. قاراقشىلار ەكەۋىن قورقىتىپ, اقشا تالاپ ەتكەن. سوسىن كاسسادان 120 مىڭ تەڭگەنى الىپ, قاشىپ كەتكەن. دالاداعى كولىكتە ولاردى تاعى ءبىر سىبايلاسى كۇتىپ وتىرعان.

وقيعا ورنىنا بارعان پوليتسەيلەر كۇدىكتىلەردىڭ قاي باعىتقا كەتكەنىن انىقتادى. ءسويتىپ, جەتىساي اۋداندىق پوليتسيا بولىمىنە حابارلاسىپ, قىلمىسكەرلەردى ۇستاۋعا اتتاندى. قاراقشىلار 40 شاقىرىم شالعاي جەرگە كەتىپ قالعان. ال پوليتسيانى كورگەن بويدا كولىكتى تاستاپ, قاشا جونەلىپتى. ەكەۋى قولعا ءتۇستى, ەكەۋى قاشىپ كەتتى.

«تەرگەۋ كەزىندە ەكى كۇدىكتىنىڭ جەتىساي اۋدانىنىڭ تۇرعىنى ەكەنى انىقتالدى. ءۇشىنشىسى – اقمولا وبلىسىنىڭ تۋماسى, ءتورتىنشىسى – شىمكەنت تۇرعىنى. تورتەۋى دە بۇرىن سوتتالعان. ىزدەۋ شارالارى جالعاسىپ جاتىر», دەيدى پوليتسەيلەر.  

قازىرگى كەزدە قىلمىستىق كودەكستىڭ 192-بابى بويىنشا سوتقا دەيىنگى تەرگەۋ شارالارى باستالدى. بۇل باپتا مۇلكiن تاركiلەپ, بەس جىلدان ون جىلعا دەيiنگi مەرزiمگە باس بوستاندىعىنان ايىرۋ جازاسى قاراستىرىلعان.