ەلگە قىزمەت ەلەۋسىز قالمايدى

سالتاناتتى شارا قازاق­ستان­نىڭ تاۋەلسىزدىك العان 30 جىل­داعى قول جەتكەن تابىستارى مەن العان اسۋلارىنا ارنال­عان كوركەم كورىنىستەرمەن اشىل­دى. سونىڭ ىشىندە سەمەي ياد­رولىق پوليگونىنىڭ جابىلعانى, توق­تار اۋباكىروۆتىڭ عارىش­قا ۇشۋى, مەملەكەتتىك رامىز­دەر­دىڭ قابىلدانۋى, ۇلتتىق ۆاليۋ­تانىڭ ومىرگە كەلۋى, جاڭا كونس­تي­تۋتسيانىڭ قابىلدانۋى, قحا-نىڭ قۇرىلۋى, «قىسقى ۋني­ۆەر­سيادا» مەن ەكسپو-2017-ءنىڭ وتكىزىلۋى – ءبارى قامتىلدى. وب­لىس حالقىن ۇلىق مەرەكەمەن قۇت­تىق­تاعان سپيكەر تۇڭعىش پرەزي­دەنت – ەلباسى نۇرسۇلتان ءابىش ۇلى نازارباەۆتىڭ «الدىمەن – ەكونوميكا, ودان كەيىن – سايا­سات» دەگەن سالي­قالى ساياساتىنىڭ ارقاسىندا ەلىمىزدىڭ بارلىق قيىندىقتان امان-ەسەن شىعىپ, ءبىر بيىكتەن ءبىر بيىككە جەتكەنىن اتاپ ءوتتى. وسى جولدا مەملەكەت باسشىسى قاسىم-جومارت كەمەل ۇلى توقاەۆ ەلىمىزدىڭ دامۋ ستراتەگياسىن ودان ءارى جالعاستىرىپ, ساياسي, الەۋمەتتىك-ەكونوميكالىق رەفورمالاردى جۇزەگە اسىرىپ جاتقانىن ايتتى. سونىمەن قاتار نۇرلان نىع­ماتۋلين سولتۇستىك قازاقستان وبلىسى مەن تۇرعىندارىنىڭ تاۋەلسىز قازاقستاننىڭ جەتىس­تىك­تەرىنە قوسقان ەلەۋلى ۇلەسىن اتاپ ءوتتى. ءماجىلىس توراعاسى اتاپ وت­كەندەي, قازىرگى ۋاقىتتا سول­تۇس­تىك قازاقستان وبلىسى وندىرىس­تىك سالادا جوعارى ناتيجە كورسە­تىپ, وندا جىل سايىن جاڭا كاسىپ­ورىنداردى ىسكە قوسىپ, كوپتەگەن جاڭا جۇمىس ورىندارىن اشۋدا. ءونىمنىڭ كوپ­تەگەن ءتۇرى تەك قازاقستاندا عا­نا ەمەس, الەمدىك نارىقتا دا بەل­گىلى.

وسىدان ءارى پارلامەنت ءماجى­لى­سىنىڭ سپيكەرى پرەزيدەنت ق.توقاەۆ­تىڭ تاپسىرماسىمەن مەملەكەت­تىك ناگرادالار تاپسىردى. مارا­پاتقا يە بولعانداردىڭ اراسىن­دا عالىمدار, اۋىل شارۋا­شى­لىعى تاۋارلارىن وندىرۋ­شىلەر, مۇعالىمدەر مەن دارىگەر­لەر, جۇمىسشىلار مەن قۇتقارۋ­شىلار, كاسىپكەرلەر, ارتىستەر مەن سپورتشىلار بار. «پاراسات» وردە­نىمەن ارحەولوگ ۆيكتور زاي­بەرت ماراپاتتالدى. ول سول­تۇس­تىك قازاقستاننىڭ ەجەلگى تاريحى بويىنشا بىرنەشە عىلىمي جاڭا­لىقتىڭ, كوپتەگەن كىتاپ پەن ماقالا اۆتورى. قازاقستاندىق عالىم تاراپىنان جىل­قى­نى قولعا ۇيرەتۋدىڭ ەڭ كونە ەسكەرتكىشى سانالاتىن ەنەوليت ءداۋىرىنىڭ «بوتاي قونىسى» بىرەگەي ەسكەرتكىشىنىڭ اشىلۋى الەمدىك تانىمالدىلىققا يە بولدى. «قۇر­مەت» وردەنىمەن پەتروپاۆل با­لالار الەۋمەتتىك قىزمەت كورسەتۋ ورتالىعىنىڭ تاربيەشىسى ەلەنا كيسلياكوۆا, كاسىپكەر ەكپىن ابيەۆ جانە تۋعان اۋىلدارىن دا­مىتۋعا قارجىلىق قولداۋ كورسەتىپ وتىرعان فەرمەرلىك شارۋا­شى­لىق­تاردىڭ باسشىلارى قالىم دانياروۆ, ابدۋراحيم نۋكاەۆ مارا­پاتتالدى. III دارەجەلى «ەڭ­بەك داڭقى» وردەنىن ەڭبەك اردا­گەر­لەرى, مەحانيكالىق جيناۋ تسە­حى­نىڭ توكارى سەرگەي كارەتوۆ جانە قۇرىلىس سالاسىندا 40 جىلدان استام جۇمىس ىستەيتىن كرانشى فارحان سافارگالەەۆ يەلەندى. «ەر­لىگى ءۇشىن» مەدالى 16 ادامنىڭ ءومىرىن قۇتقارعان ءورت ءسوندىرۋشى ايتباي سادۋاقاسوۆقا, «ەرەن ەڭ­بەگى ءۇشىن» مەدالى – كارديولوگ دارىگەر اسقار مولجىگىتوۆكە, جەڭىل اتلەت يرينا ەكتوۆاعا, «شا­پاعات» مەدالى – بالالار ءۇيى­نىڭ تاربيەشىسى ايىم ابدىراح­مانوۆاعا, ءۋاليحانوۆ اۋداندىق اۋرۋحاناسىنىڭ باس مەدبيكەسى مارينا وحماتقا تاپسىرىلدى.

ماراپاتتان سوڭ نۇرلان نىع­ما­تۋلين ءوڭىر تۇرعىندارىن ايتۋلى كۇنمەن جانە جوعارى ناگرا­دالارمەن قۇتتىقتاي وتىرىپ, سولتۇستىكقازاقستاندىقتار ەلى­مىز دامۋىنىڭ ماڭىزدى كەزە­ڭىندە جاڭا تابىستارعا جەتەتىنىنە سەنىم ءبىلدىردى.

وسىدان كەيىن ءسوز وبلىس اكىمى قۇمار اقساقالوۆقا بە­رىلدى. ءوڭىر حال­قىن 30 جىلدىق مە­رەي­­­توي­مەن قۇتتىقتاي وتىرىپ, اكىم «تاۋەلسىزدىكتىڭ ماڭى­زى­نا جانە وبلىستىڭ وسى جىل­دار­دا قول جەتكىزگەن تابىستارىنا توقتالدى.

– تاۋەلسىزدىك – ءبىزدىڭ ۇلى قۇن­دىلىعىمىز, ەڭ بيىك جەتىستىگىمىز. ەلىمىز 30 جىلدا كەمەلدەنىپ, دا­مۋدىڭ جاڭا بەلەسىنە شىقتى. ۇلى جەرلەسىمىز, اقىن ماع­جان جۇماباەۆ ايتقانداي, ء«بىز عاسىر­لار توعىسىندا اتا-بابا­لارى­مىز اڭساپ, ارمانداپ كەتكەن ازات­تىقتىڭ التىن ايىنا قول سوزدىق. ەجەلدەن ەركىندىكتى اڭساعان قازاق ۇلى مۇراتىنا قول جەتكىزدى. تاۋەلسىز مەملەكەتىمىزدىڭ ىرگەسىن بەكەمدەپ, ەلىمىزدىڭ تىنىشتىعى مەن قاۋىپسىزدىگىن نىعايتۋعا, قازاقستاننىڭ ايداي الەمگە تانىلۋىنا ەرەكشە ەڭبەك سىڭىرگەن تۇڭعىش پرەزيدەنتىمىز نۇرسۇلتان ءابىش ۇلى نازارباەۆتىڭ كۇنى كەشە عانا جارىق كورگەن «تاۋەلسىزدىك تاعىلىمى» ماقالاسىندا تاۋەل­سىزدىك تە باقىت سياقتى, باعالاعان ادامنىڭ, ايالاعان قوعامنىڭ قولىنا تۇراقتايدى. مىنە, بۇگىن ءبىز قۋاتتى, ەگەمەن, ەركىن ەلدە ءومىر ءسۇرىپ جاتىرمىز, – دەدى.

بۇگىنگى تاڭدا ايماقتىق جالپى ءونىم 30 جىلدا 15 ەسە ءوستى. جان باسىنا شاققاندا ءىجو كولە­مى 23 ەسە ارتتى. ەڭبەك ونىمدى­لىگى سوڭعى 10 جىلدا 7 ەسە ءوستى. اۋىل­ شا­رۋا­شىلىعىنىڭ بيىلعى جالپى ءونىمى 890 ملرد تەڭگەگە جەتىپ, 2017 جىلمەن سالىستىرعاندا 2 ەسە وسكەن. ال ونەركاسىپ ءونىمى بيىل 360 ملرد تەڭگەگە جەتىپ, الدىنداعى جىلمەن سالىستىرعاندا 8 پايىزعا ارتتى. تاۋەلسىزدىك جىلدارىندا وبلىس ەكونوميكاسىنا 2,2 ترلن تەڭگە ينۆەستيتسيا سالىندى. اكىمنىڭ بايانداماسىندا وسى جانە باسقا دا جەتىستىكتەر ايتىلدى.

ودان ءارى سالتاناتتى ءىس-شارا مەرەكەلىك كونتسەرتكە جالعاستى. وعان جەرگىلىكتى ونەرپازدارمەن قا­تار, اباي اتىنداعى وپەرا جا­نە بالەت تەاترىنىڭ ارتىستەرى ازا­مات اس­قاروۆ, جانەل تۋكەەۆا, ءجا­مي­لا سەركەباەۆا جانە باسقالار قاتىستى.

پەتروپاۆل