ۇستىمىزدەگى جىلى «كەدەرگىسىز كەلەشەك» جوباسى شەڭبەرىندە
مۇگەدەكتەرگە ارنالعان 5 مىڭ جۇمىس ورنى قۇرىلادى
«نۇر وتان» پارتياسىنىڭ 15 جىلدىعى كۇنى وتكەن رەسپۋبليكالىق قوعامدىق قابىلداۋدا مەملەكەت باسشىسىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» حالىققا جولداۋىنداعى بەرىلگەن تاپسىرمالاردى ورىنداۋ ماقساتىندا مۇمكىندىگى شەكتەۋلى جاندارعا الەۋمەتتىك قولداۋ كورسەتۋ ماسەلەسىنە ارنالعان سەلەكتورلىق كەڭەس ءوتتى. «نۇر وتان» پارتياسىنىڭ «كەدەرگىسىز كەلەشەك» جوباسى مۇمكىندىگى شەكتەۋلى جانداردىڭ ءومىر ساپاسىن ارتتىرۋعا باعىتتالىپ وتىر. اتالعان جوبانى ءتورت باعىت بويىنشا جۇزەگە اسىرۋ جوسپارلانعان: مۇگەدەكتەردى تۇراقتى ەڭبەك ورنىنا جۇمىسقا تۇرعىزۋ; مۇمكىندىگى شەكتەۋلى ادامدارعا جاعداي جاساۋ; قوعام مەن بيزنەستىڭ نازارىن مۇگەدەكتەردىڭ ماسەلەسىنە اۋدارۋعا باعىتتالعان تۇرعىنداردى اقپاراتتاندىرۋ جۇمىسىن كۇشەيتۋ; مۇگەدەكتەردىڭ قۇقىعىن ءتيىمدى جۇزەگە اسىراتىن قۇقىقتىق الاڭ قۇرۋ. جوبا شەڭبەرىندە 2014 جىلدىڭ سوڭىنا دەيىن 5 مىڭ مۇگەدەكتى جۇمىسقا ورنالاستىرۋ قاراستىرىلعان. ونىڭ سىرتىندا, ەڭبەك جانە حالىقتى الەۋمەتتىك قورعاۋ مينيسترلىگى مەن اكىمدىكتەردىڭ اقپاراتىنا سايكەس, ۇستىمىزدەگى جىلى 5 مىڭ مۇگەدەكتى جۇمىسقا تۇرعىزاتىن ەڭبەك ورنى قۇرىلادى. «كەدەرگىسىز كەلەشەك» جوباسى ىسكە قوسىلعان ءبىرىنشى ايدا 1300 مۇگەدەككە جۇمىس تابىلدى. مىسالى, تاياۋدا عانا تاراز بەن پاۆلودار قالاسىندا وتكەن بوس ورىنداردىڭ جارمەڭكەسىندە مۇمكىندىگى شەكتەۋلى 600 ادام جۇمىسپەن قامتاماسىز ەتىلدى. جالپى, ۇستىمىزدەگى جىلى ەلىمىزدىڭ بارلىق ايماقتارىندا مۇگەدەكتەرگە ارنالعان 440-قا جۋىق بوس ورىنداردىڭ جارمەڭكەسى وتەدى. ولاردىڭ نەگىزىندە «نۇر وتاننىڭ» العاشقى پارتيالىق ۇيىمدارى قۇرىلعان مەكەمەلەردە 14,5 مىڭعا جۋىق مۇگەدەك ەڭبەك ەتەدى. ونداعى مۇگەدەكتەردىڭ سانىن بەلگىلەنگەن 3% كۆوتاعا دەيىن جەتكىزۋ جوسپارلانىپ وتىر. بۇگىنگى تاڭدا الەۋمەتتىك جانە كولىك ينفراقۇرىلىم نىساندارىنىڭ 83%-عا (15,5 مىڭ) جۋىعى مۇگەدەكتەرگە قولجەتىمدى ەمەس. «نۇر وتان» پارتياسىنىڭ ايماقتىق فيليالدارى ول جاقتاعى نىسانداردى قۇجاتتاۋ مەن بەيىمدەۋ مونيتورينگى جۇمىسىن باستاپ كەتتى. قازاقستاندا 630 مىڭعا جۋىق مۇگەدەك ءومىر سۇرەدى. بۇگىنگى تاڭدا جۇمىس ىستەي الاتىن جاستاعى 405 مىڭ مۇگەدەكتىڭ 20%-دان استامى (83 مىڭ ادام) جۇمىسقا ورنالاسقان. سولاي بولا تۇرا, 17 مىڭ مۇگەدەكتىڭ جۇمىس ىستەي الاتىن قابىلەتى بار. «ەگەمەن-اقپارات».