سىرتقى ىستەر ءمينيسترى ج. بوررەلمەن ماڭىزدى كەلىسسوزدەر جۇرگىزدى

ەو دەلەگاتسياسىن ەۋروكوميسيانىڭ ۆيتسە-پرەزيدەنتى جانە سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەلل جانە حالىقارالىق ارىپتەستىكتەر بويىنشا ەۋروپالىق كوميسسار يۋتتا ۋرپيلاينەن باسقاردى.

كەزدەسۋ كەزىندە تاراپتار وڭىرارالىق جانە جاھاندىق ىنتىماقتاستىق ماسەلەلەرىن, سونىڭ ىشىندە پاندەميانىڭ كەلەڭسىز سالدارىن ەڭسەرۋدى, ءوزارا ساۋدا مەن ينۆەستيتسيانىڭ قارقىندارىن قالپىنا كەلتىرۋدى, وڭىردەگى ەو باعدارلامالىق قىزمەتىنىڭ باسىمدىقتارىن, سونداي-اق اۋعانستانداعى جاعدايدى تالقىلادى.

كازاقستاندىق دەلەگاتسيا باسشىسى سويلەگەن سوزىندە عىلىم, تەحنولوگيالار مەن يننوۆاتسيالار سالاسىنىڭ نەگىزگى رولىنە توقتالىپ, ەۋروپالىق تاراپقا جاڭا وڭىرلىك باعدارلامالارىن اتالعان سالالاردا قۇراستىرۋدى ۇسىندى. قازاقستاننىڭ باستاماسىن بارلىق ورتالىق ازيا مەملەكەتتەرىنىڭ وكىلدەرى ءبىراۋىزدان قولدادى.

قاتىسۋشىلار دەنساۋلىق ساقتاۋ, ەكونوميكا, ادام قۇقىقتارىن قورعاۋ مەن زاڭ ۇستەمدىگى سالالارىندا ءوزارا ىقپالداستىقتى كەڭەيتۋگە, تەرروريزم, ەكسترەميزم جانە زاڭسىز ەسىرتكى اينالىمىنا قاتىستى وڭىرلىك قاۋىپ-قاتەرلەردى بىرگە ەڭسەرۋگە, شەكارالاردى باسقارۋ مەن قۇقىق قورعاۋ ورگاندارى اراسىنداعى ۆەدومستۆوارالىق ىنتىماقتاستىقتى نىعايتۋعا, سونداي-اق اۋعان پروبلەماسىنىڭ شەشۋ جولدارىن بىرلەسە پىسىقتاۋعا ءوزارا مۇددەلىلىگىن راستادى.

بۇعان قوسا, ءوڭىردىڭ ورنىقتى دامۋ, سونىڭ ىشىندە ترانسشەكارالىق سۋ رەسۋرستارىن راتسيونالدى پايدالانۋ, ەكولوگيا جانە كليمات وزگەرۋىنىڭ پروبلەمالارىن شەشۋ سالاسىنداعى ىنتىماقتاستىق ماسەلەلەرى قوزعالدى. كەزدەسۋدىڭ ناتيجەسىندە بىرلەسكەن كومميۋنيكە قابىلداندى.

مينيستر م.تىلەۋبەردى ەو سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى ج.بوررەللمەن جەكە كەلىسسوزدەر وتكىزدى. تاراپتار قازاقستان مەن ەۋروپالىق وداق اراسىنداعى ىنتىماقتاستىقتى ودان ءارى دامىتۋ ماسەلەلەرىن ەگجەي-تەگجەيلى قاراستىرىپ, سونداي-اق قر پرەزيدەنتى قاسىم-جومارت توقاەۆتىڭ بريۋسسەلگە الداعى رەسمي ساپارىنا دايىندىق بارىسىن تالقىلادى.