ون جىلعا جۋىق ۋاقىتتان بەرى مەديتسينالىق قۇرال-جابدىقتارمەن, جيھاز وندىرۋمەن جانە ولاردى ساتۋمەن اينالىسىپ كەلە جاتقان «قازمەدپريبور» كومپانياسى بۇگىندە ەلىمىزگە كەڭىنەن تانىمال. جاقىندا «قازمەدپريبور» دۋباي قالاسىندا وتكەن حالىقارالىق «Arab Health - 2014» كورمەسىنە قاتىسىپ قايتتى. بۇل كورمە تاياۋ شىعىس ەلدەرىنىڭ مەديتسينا سالاسىندا ۇلكەن ورىن الادى جانە وتىز بەس جىلدان بەرى ۇيىمداستىرىلىپ كەلەدى.
ايتا كەتۋ كەرەك, كورمە جۇمىسىنا قازاقستان اتىنان قاتىسقان وسىناۋ جالعىز كومپانيانىڭ الەمنىڭ الپاۋىت ءوندىرۋشى كاسىپورىندارىمەن يىق ءتىرەستىرىپ ءوز ءونىمىن حالىقارالىق دەڭگەيدە ۇسىنۋى, ارينە, «كازمەدپريبوردىڭ» قازىرگى مەديتسينا سالاسى نارىعىندا اتقارىپ كەلە جاتقان ناتيجەلى جانە ساپالى ەڭبەگىنىڭ كورىنىسى ەكەنى انىق. ءتورت كۇنگە سوزىلعان كورمە جۇمىسىندا قازاقستاندىق تاۋارلاردى الەمنىڭ 30 ەلىنەن كەلگەن 15 مىڭنان استام ادام تاماشالادى. ءسويتىپ, «قازمەدپريبور» يتاليا, پاكىستان, سيريا, وڭتۇستىك كورەيا سەكىلدى ەلدەردىڭ ءىرى كومپانيالارىمەن كەلىسىمشارتقا وتىرۋعا قول جەتكىزدى. سونداي-اق, كورشىلەس اۋعانستان, تاجىكستان, وزبەكستان, سونىمەن قاتار, ءۇندىستان, سيريا, يران جانە تاعى دا باسقا ەلدەرگە ەكسپورتقا تاۋار شىعارۋ ۇسىنىستارى تالقىلاندى. اتالمىش ەلدەردىڭ وكىلدەرى بۇل كاسىپورىن ونىمدەرىنىڭ ساپاسىنا قىزىعۋشىلىق تانىتىپ, بىرقاتار ءتيىمدى ۇسىنىستار جاسادى.
– ءبىز مەديتسينا قۇرال-جابدىقتارىن شىعارۋ, جەدەل ءجاردەم كولىكتەرىن جابدىقتاۋ باعىتىنداعى وتە اۋىر جۇمىستى قولعا العانبىز. بىراق, قاجىرلى ەڭبەگىمىزدىڭ ارقاسىندا وسىناۋ وتاندىق ونىمدەردى جوعارى دەڭگەيگە جەتكىزە بىلدىك. وسى ءدۇبىرلى كورمەگە قاتىسۋىمىزدىڭ ءوزى ءبىزدىڭ كومپانيانىڭ وسى سالاداعى تابىستى ەڭبەگىنىڭ ءبىر كورىنىسى ەكەنى داۋسىز, – دەيدى «قازمەدپريبور» كومپانياسىنىڭ پرەزيدەنتى راحات بايزاقوۆ.
اتالمىش كورمەدە ەلىمىزدىڭ ءباا-دەگى ەلشىسى اسقار شوقىباەۆ كومپانيا ونىمدەرىمەن تانىسىپ, قازاق ەلىنىڭ قارىشتاپ دامىپ كەلە جاتقان مەديتسينا سالاسىنا ۇلكەن ۇلەس قوسىپ جۇرگەن «قازمەدپريبوردىڭ» العا قويعان ماقساتتارىنا, جۇمىسىنا ساتتىلىك تىلەدى.
الەمنىڭ 145 ەلىنەن كەلگەن 85 مىڭ قاتىسۋشى تاماشالاعان كورمەدە كاسىپورىن مەن ونىڭ باسشىسى ۇيىمداستىرۋشىلار تاراپىنان العىس حاتقا يە بولدى. ساپالى ءونىم مەن قىزمەت ۇسىنۋدى ماقسات ەتكەن «قازمەدپريبور» كومپانياسىنىڭ الار اسۋى ءالى دە الدا ەكەنىنە سەنىم مول.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.