بۇقار جىراۋ اۋدانىندا قۇسبەگىلەردىڭ وبلىستىق چەمپيوناتى وسىمەن بەسىنشى رەت ۇيىمداستىرىلدى. بۇل سايىستا قاراعاندى مەن تەمىرتاۋ قالالارىنان, سونىمەن بىرگە وبلىستىڭ بەس اۋدانىنان 15 قۇسبەگى باق سىنادى.
«سارىارقا-2021» سايىسىنىڭ وتۋىنە جاۋاپتى ماماننىڭ ءبىرى بۇقار جىراۋ اۋداندىق دەنە شىنىقتىرۋ جانە سپورت ءبولىمىنىڭ باسشىسى ولەگ تسىگانكوۆ اۋداندا ۇلتتىق سپورت تۇرلەرىنەن جارىس ءجيى ۇيىمداستىرىلىپ تۇراتىنىن اتاپ ءوتتى.
– جارىستار كۇزدە دە, قىستا دا وتەدى. بۇل سپورت ءتۇرىنىڭ جانكۇيەرلەرى نەگىزىنەن اۋىلدىق جەرلەردەن كەلەدى. دەگەنمەن قازىر قالالىقتار دا قىزىعۋشىلىق تانىتا باستادى. مىسالى, وسى جولى قاراعاندى مەن تەمىرتاۋدىڭ وكىلدەرى دە سىنعا ءتۇستى. كوشباسشىلار قاتارىندا قارقارالى جانە جاڭاارقا اۋداندارىنىڭ سپورتشىلارى بولدى, – دەيدى و.تسىگانكوۆ.
بۇل جولعى جارىستا قىران قۇستار قويانعا ءتۇسىپ, تۇلكىنىڭ ت ۇلىبىن ءىلىپ, سونداي-اق ارنايى جاتتىعۋلاردى ورىندادى.
اسا تارتىستى وتكەن چەمپيونات قورىتىندىسىندا بۇقار جىراۋ اۋدانىنداعى دوسكەي اۋىلىنىڭ تۇرعىنى تەمىرعالي تولەگەن ۇلى بۇركىتپەن اڭ اۋلاۋ سىنىندا جەڭىمپاز اتاندى. قاراعاندىلىق اسلان ەگىنباي ەكىنشى جۇلدەگە يە بولسا, ءۇشىنشى ورىندى بۇقار جىراۋ اۋدانىنداعى توعىزقۇدىق اۋىلى اتىنان سىنعا تۇسكەن مەتاي ەسەنكەلدى مىسە تۇتتى.
ال قارشىعالار سىنعا تۇسكەن سايىستا قاراعاندىلىق زاڭعار دوساننىڭ قۇسى توپ جاردى. جاڭاارقالىق كاريفۋللا امانگەلدى مەن شاكارىم ءابدىراحمان, سايكەسىنشە ەكىنشى جانە ءۇشىنشى جۇلدەلەردى يەمدەندى.
اقتوعاي اۋدانىنىڭ نامىسىن قورعاعان تاڭات وسپانقۇلوۆتىڭ قۇسى سۇڭقارلار سىنىندا ۇزدىك شىقتى. شەت اۋدانىنان قاتىسقان اسان ابدىرازاقوۆقا ەكىنشى جۇلدە بۇيىردى. ال قولا مەدال قاراعاندىلىق كۇنتۋعان ءادىلحاننىڭ ەنشىسىنە ءتيدى.
جوعارى دەڭگەيدە وتكەن بەسىنشى چەمپيوناتتا توپ جارعان قۇسبەگىلەر الدىمىزداعى اقپان ايىندا وتەتىن رەسپۋبليكالىق چەمپيوناتتىڭ جولداماسىنا يە بولدى.
قاراعاندى وبلىسى,
بۇقار جىراۋ اۋدانى