سولتۇستىك قازاقستان وبلىسىنىڭ پوليتسەيلەرى سوڭعى ءتورت كۇندە «قاۋىپسىز جول» اتتى رەسپۋبليكالىق جەدەل-پروفيلاكتيكالىق ءىس-شارا جۇرگىزىپ, وعان 370-تەن اسا پوليتسيا قىزمەتكەرى جۇمىلدىرىلدى. وسى ءتورت كۇننىڭ ىشىندە عانا 1865 قۇقىق بۇزۋشىلىق انىقتالدى. سونىڭ ىشىندە ءاۆتوموبيلدى الكوگولدى ىشىمدىك ءىشىپ الىپ جۇرگىزگەن 30 جۇرگىزۋشى ۇستالدى.
قازىر مۇنداي قۇقىق بۇزۋشىلىقتىڭ جازاسى اۋىرلاتىلعان, ەكىنشى رەت ۇستالعاندار جەتى جىلعا دەيىن جۇرگىزۋشىلىك كۋالىگىنەن ايرىلادى. سوعان قاراماي ادامداردىڭ ماس كۇيىندە رۋلگە وتىرۋى تىيىلار ەمەس. ۇستالعانداردىڭ اراسىندا جاستار عانا ەمەس, جاسى ۇلعايعان ادامدار دا بار. ماسەلەن, توقتاتىلعان Lada Granta اۆتوكولىگىنىڭ ماس جۇرگىزۋشىسى 68 جاستاعى قالا تۇرعىنى بولىپ شىقتى. مەديتسينالىق كۋالاندىرۋ ونىڭ «جەڭىل دارەجەدەگى الكوگولدىك ماساڭ» ەكەنىن كورسەتتى. وعان اكىمشىلىك قۇقىق بۇزۋشىلىق تۋرالى كودەكسىنىڭ 608-بابى 1-بولىگى بويىنشا حاتتاما تولتىرىلدى. ەندى ول جەتى جىلعا اۆتوكولىك باسقارۋدى ۇمىتۋىنا تۋرا كەلەدى. ويتكەنى ول بۇرىن دا ماساڭ كۇيدە كولىك جۇرگىزەمىن دەپ ۇستالعان ەكەن.
سونىمەن قاتار پروفيلاكتيكالىق شارا بارىسىندا قاۋىپسىزدىك بەلدىگىن تاقپاۋدىڭ 226, رۋلدە كەلە جاتىپ تەلەفونمەن سويلەسۋدىڭ 165 فاكتىسى, جاياۋ جۇرگىنشىلەر تاراپىنان 301 بۇزۋشىلىق تىركەلدى. سونداي-اق جىلدامدىقتى اسىرۋدىڭ 94, تەحنيكالىق بايقاۋدان وتپەگەن كولىك قۇرالىن باسقارۋدىڭ 70, بۇرىن كولىك باسقارۋ قۇقىعىنان ايىرىلعان ادامداردىڭ اۆتوكولىكتى باسقارۋىنىڭ 11 فاكتىسى انىقتالدى.
ءتورت كۇننىڭ ىشىندە عانا وسىنشا بۇزۋشىلىق انىقتالعانى – ماسەلەنىڭ وزەكتى ەكەنىن كورسەتەدى.
كەيبىرەۋلەردىڭ جولاۋشىلار مەن جۇكتەردى زاڭسىز تاسىمالدايتىنى دا انىقتالعان. ماسەلەن, ارنايى توقتاتىلعان Nissan اۆتوكولىگىنىڭ يەسى جولاۋشىلار مەن جۇكتەردى زاڭسىز تاسىمالداۋمەن اينالىسىپ جۇرگەن. ەشقانداي رۇقسات قاعازى بولماعان بۇل ادامعا قاتىستى اقبتك 463-بابى بويىنشا اكىمشىلىك حاتتاما تولتىرىلدى جانە پروتسەسسۋالدىق شەشىم قابىلداۋ ءۇشىن سوتقا جولداندى.
قازىر سولتۇستىك قازاقستاننىڭ جولدارىندا كوكتايعاق قاۋپى جوعارى. كەشكى مەزگىل مەن تاڭەرتەڭگى ۋاقىتتاردا كۇندىز جىپسىگەن قاردىڭ سۋى قاتىپ, ناعىز مۇز ايدىنعا اينالادى. سولتۇستىك قازاقستان پد جەرگىلىكتى پوليتسيا قىزمەتى باسقارماسىنىڭ باستىعى, پوليتسيا پودپولكوۆنيگى ايدىن بايماتوۆتىڭ ايتۋىنا قاراعاندا, 8 قاراشادان باستاپ پوليتسەيلەر كوكتايعاققا بايلانىستى جۇرگىزۋشىلەر مەن جاياۋ جۇرگىنشىلەردەن اسا ساق بولۋ مەن قىراعىلىق تانىتۋىن, جىلدامدىق رەجىمىن, اراقاشىقتىقتى ساقتاۋدى, بەلگىلەنبەگەن جەرلەردەن جولدى كەسىپ وتپەۋدى ەسكەرتۋدە. «قاۋىپسىز جول» وپەراتسياسىنىڭ باستى ماقساتى – جول ءجۇرىسى قاعيدالارىن ورەسكەل بۇزۋدىڭ الدىن الۋ جانە كولىك اپاتتارىن ەسكەرتۋ. جەدەل-پروفيلاكتيكالىق ءىس-شارا 17 قاراشاعا دەيىن جالعاسادى», دەيدى ا.بايماتوۆ.
سولتۇستىك قازاقستان وبلىسى