يندۋستريا جانە ينفراقۇرىلىمدىق دامۋ مينيسترلىگىندە اكىمدىكتەردىڭ, كومىر ءوندىرۋشى كومپانيالاردىڭ جانە «قازاقستان تەمىر جولى» ۇك» اق وكىلدەرىنىڭ قاتىسۋىمەن كەڭەيتىلگەن كەڭەس وتكىزىلىپ, حالىقتى كومىرمەن قامتۋ ماسەلەلەرى قاراستىرىلدى.
جاۋاپتى ۆەدومستۆونىڭ دەرەكتەرىنە سايكەس بيىل قاڭتار-قازان ارالىعىندا ەلىمىزدە 88 ملن تونناعا جۋىق كومىر (كومىر كونتسەنتراتىن قوسپاعاندا) ءوندىرىلدى. بۇل بىلتىرعى دەڭگەيدەن (100,2%) جوعارى.
«ەنەرگيا ءوندىرۋشى كاسىپورىندارعا شامامەن 48 ملن توننا, ونەركاسىپتىك كاسىپورىندارعا 5 ملن توننا, كوممۋنالدىق-تۇرمىستىق قاجەتتىلىكتەرگە جانە حالىققا 7,6 ملن توننادان استام كومىر تيەلدى. «قازاقستان تەمىر جولى» ۇق» اق وڭىرلەرگە كومىردى جەتكىزۋ جوسپارى باسىم نەگىزدە ورىندالاتىنىن جانە كومىر كەنىشتەرىنەن تۇسەتىن وتىنىمدەر ۇلعايسا, قاجەتتىلىكتى اشىق ۆاگوندارمەن قامتاماسىز ەتۋگە ءوزىنىڭ دايىن ەكەنىن راستادى», دەلىنگەن مينيسترلىكتىڭ اقپاراتىندا.
كەڭەس بارىسىندا اقمولا, الماتى, شىعىس قازاقستان, قوستاناي, قىزىلوردا, پاۆلودار, سولتۇستىك قازاقستان وبلىستارىنىڭ, الماتى مەن نۇر-سۇلتان قالالارىنىڭ تۇرعىندارى ءۇشىن كومىردى جونەلتۋ جوسپارى پىسىقتالدى. وسى وڭىرلەردىڭ اكىمدىكتەرى تۇرعىنداردىڭ كومىرگە قاجەتتىلىگىن قامتاماسىز ەتۋدى ۋاقتىلى باقىلاۋى ءتيىس.
قۇزىرلى ورگاننىڭ باستاماسىمەن جانە وندىرۋشىلەردىڭ قولداۋىمەن قاراشادا وڭىرلەرگە كومىر جەتكىزۋ كولەمى 487 مىڭ تونناعا ۇلعايتىلماق. حالىق اراسىندا ۇلكەن سۇرانىسقا يە شۇباركول كومىرىنىڭ 240 ۆاگونى وڭىرلەرگە كۇن سايىن قوسىمشا جونەلتىلەدى دەيدى مينيسترلىك.
كومىر كاسىپورىندارى قاتتى وتىننىڭ قاجەتتى كولەمىن وندىرۋگە, ال تەمىرجولشىلار كومىردى ۋاقتىلى جەتكىزۋگە جاۋاپتى. جەرگىلىكتى اتقارۋشى ورگاندار تۇتىنۋ كولەمىن ناقتى جوسپارلاۋعا, كومىر ساتىپ الۋدى ۋاقىتىندا جۇرگىزۋگە, سونداي-اق ونىڭ وڭىردەگى جانە بارلىق قورىن باقىلاۋدا ۇستاۋى ءتيىس دەپ سانايدى يندۋستريا مينيسترلىگى.
باعا مونيتورينگىن جۇرگىزۋ جانە قاتتى وتىن قۇنىن كوتەرۋ جاعدايلارىن انىقتاۋ – قۇزىرەتتى ۋاكىلەتتى ورگانداردىڭ مىندەتى.
كومىر باعاسىنىڭ وسۋىنە جول بەرمەۋ ماقساتىندا ءتيىستى ۆەدومستۆو تاۋ-كەن ءوندىرۋ جانە تاۋ-كەن مەتاللۋرگيا كاسىپورىندارىنىڭ قاۋىمداستىعىمەن مەموراندۋمعا قول قويدى.
رەسمي ستاتيستيكاعا سايكەس كەنىشتەردەن كومىردى جىبەرۋ باعاسى قاراعاندى وبلىسىندا تونناسىنا – 7 093 تەڭگە, پاۆلودار وبلىسىندا – 3 375 تەڭگە, سونداي-اق تۇتاستاي ەلىمىزدە – 5 600 تەڭگە.