ەنەرگەتيكا ءمينيسترى پاۆلودار وبلىسىنىڭ ەلەكتر ستانتسيالارىن ارالاۋ بارىسىندا كەڭەس وتكىزدى, وندا ستانتسيالاردىڭ جوندەۋ ناۋقاندارىن ورىنداۋ, قازاقستان رەسپۋبليكاسىنىڭ 2035 جىلعا دەيىنگى ەنەرگەتيكالىق تەڭگەرىمىن ازىرلەۋ جانە باتىس قازاقستاننىڭ قالالارى مەن اۋداندارىن ەلدىڭ ءبىرتۇتاس ەنەرگيا جۇيەسىنە قوسۋ تۋرالى ماسەلەلەر تالقىلاندى, دەپ جازادى Egemen.kz ەنەرگەتيكا مينيسترلىگىنىڭ ءباسپاسوز قىزمەتىنە سىلتەمە جاساپ.
بۇعان قوسا, مينيستر ەكىباستۇز گرەس-1-دە ءبىرىنشى ەنەرگيا بلوگىن قالپىنا كەلتىرۋ جانە ەكىباستۇز گرەس-2-دە ءۇشىنشى ەنەرگيا بلوگىن سالۋ جانە پاۆلودار وبلىسىنىڭ ستانتسيالارىندا جوندەۋ جۇمىستارىن جۇرگىزۋ جوبالارىن ىسكە اسىرۋ بارىسىمەن تانىستى.
ەكىباستۇز گرەس-1 ەنەرگيا بلوگىن, سونداي-اق اقسۋ گرەس-ىندەگى تۋربواگرەگات پەن قازاندىق اگرەگاتتى جوندەۋ جۇزەگە اسىرىلعاننان كەيىن جەلىگە قوسۋ بويىنشا دايىندىق جۇمىستارى اياقتالۋدا. ۇلتتىق ەلەكتر جەلىسىنە ەنگىزىلەتىن جيىنتىق قۋات 650 مۆت قۇرايدى. قاراشا ايىنىڭ سوڭىنا قاراي ەكىباستۇز گرەس-2-دەگى ەنەرگيا بلوگىن جوندەۋ اياقتالادى دەپ كۇتىلۋدە, بۇل ەلدىڭ ەنەرگيا جۇيەسىنە تاعى 500 مۆت قوسادى.
مينيستر بۇل جۇمىستاردى 10 كۇن ىشىندە اياقتاپ, ەنەرگوبلوكتاردى ىسكە قوسۋدى تاپسىردى. وسىلايشا, ەلدىڭ ەنەرگيا جۇيەسى تاعى دا 1150 مۆت ەلەكتر ەنەرگياسىنا ۇلعاياتىن بولادى.
كەڭەس قورىتىندىسى بويىنشا مينيستر بىرقاتار تاپسىرمالار بەردى.
ەنەرگيا ءوندىرۋشى ۇيىمدارعا:
- جوندەۋدەگى جابدىقتاردى ۋاقتىلى ەنگىزۋ بويىنشا بارلىق قاجەتتى شارالاردى قابىلداۋ تاپسىرىلدى. بۇل رەتتە جوندەۋ ساپاسىنىڭ تومەندەۋىنە جول بەرمەۋ كەرەك;
- 2022 جىلى گەنەراتسيالايتىن جابدىقتى جوسپاردان تىس اجىراتۋ تاۋەكەلىن بولدىرماۋ ءۇشىن جازعى جوندەۋ ناۋقانىن جۇزەگە اسىرۋدى جوسپارلاۋ بويىنشا ماسەلەنى جۇيەلىك وپەراتورمەن پىسىقتاۋدى باستاۋ تاپسىرىلدى.
جۇيەلىك وپەراتورعا («KEGOC» اق) بولجامدى تەڭگەرىمدى ازىرلەۋشىلەرمەن بىرلەسىپ, قازاقستان رەسپۋبليكاسىنىڭ 2035 جىلعا دەيىنگى ەنەرگەتيكالىق تەڭگەرىمىنىڭ قورىتىندى نۇسقاسىن 15 قاراشادان كەشىكتىرمەي ەنەرگەتيكا مينيسترلىگىنە ەنگىزۋ جونىندە تاپسىرما بەرىلدى.