رەسپۋبليكامىزدىڭ كەيبىر ايماقتارىندا قاتتى اياز بولاتىنى ەسكەرتىلدى

بۇگىن, 24 اقپان كۇنى ەلىمىزدىڭ باسىم بولىگىندە انتيتسيكلون اسەرىنەن قاتتى اياز بولادى. بۇل تۋرالى «قازاقستان» تەلەارناسى حابارلادى. ەلىمىزدىڭ شىعىس جانە وڭتۇستىك-شىعىس بولىگىندە اتموسفەرالىق اۋانىڭ اۋىسۋىنا بايلانىستى اۋا رايى قۇبىلمالى بولادى. سونداي-اق بىرقاتار وڭىرلەردە قارلى بۇرقاسىن بولىپ, جەل كۇشەيەدى. تۇمان ءتۇسىپ, كوكتايعاق بولۋى دا مۇمكىن. ماسەلەن,شىعىس قازاقستان وبلىسىنىڭ كەي ايماقتارىندا تۇندە جەلدىڭ جىلدامدىعى سەكۋندىنا 15-20 مەترگە جەتىپ, بوران بولۋى ىقتيمال. قىزىلوردا, ماڭعىستاۋ, اتىراۋ, سولتۇستىك جانە وڭتۇستىك قازاقستان وبلىستارىندا تۇمان تۇسەدى. قوستاناي وبلىسىندا تۇندە جانە تاڭەرتەڭ تۇمان ءتۇسىپ, كۇندىز جەلدىڭ جىلدامدىعى سەكۋندىنا 15-20 مەترگە دەيىن جەتەدى. ال الماتى وبلىسىندا تۇمان ءتۇسىپ, كوكتايعاق بولاتىنى ايتىلدى. وسى ايماقتا جەلدىڭ ەكپىنى سەكۋندىنا 15-20 مەترگە دەيىن جەتەدى. بۇگىن تۇندە قاراعاندى, قىزىلوردا, اقتوبە, ماڭعىستاۋ مەن وڭتۇستىك قازاقستان وبلىستارىنىڭ كەي جەرلەرىندە قاتتى اياز بولۋى ىقتيمال. ءامىرحان الماعانبەتوۆ. دەرەككوز: «قازاقستان» تەلەارناسى. فوتو: Ria.ru.